HOT STORIES OF THE WEEK

Inaprubahan na ng Food and Drug Administration (FDA) ang inamyendahang emergency use authorization (EUA) ng Pfizer BioNTech COVID-19 vaccine para maisama ang mga batang edad 12 hanggang 15 anyos na maaari nang mabakunahan.

Ayon kay Health Secretary Francisco Duque III, maaari nang maturukan ng bakuna ng Pfizer ang mga batang edad 12 hanggang 15, mayroon man o walang comorbidity.

Gayunman sinabi ni Duque na magiging prayoridad pa rin ang mga batang may comorbidities o ang mga kabilang sa A3 category.

Ito ay dahil sa limitadong suplay ng Pfizer vaccine na dumating sa bansa kaya’t susundin pa rin ang prioritization list.

Kaugnay nito, kinumpirma ni Dr. Nina Gloriani, head ng vaccine expert panel ang pag-apruba sa amended Eua ng Pfizer matapos ang masusing pagsisiyasat sa mga iprinisintang batayan na uubra ang nasabing bakuna sa mga batang edad 12 hanggang 15 anyos.

Maaari nang magamit sa Pilipinas ang bakuna kontra coronavirus disease 2019 (COVID-19) na Sinopharm ng bansang China matapos itong bigyan ng emergency use authorization (EUA) ng Food and Drug Administration (FDA).

Gayunman, nilinaw ng Department of Health (DOH) na daraan pa rin sa regulatory process ang nasabing bakuna kahit pa may basbas na ito ng World Health Organization (WHO).

Magugunitang naging kontrobersyal ang Sinopharm nang aminin ni Pangulong Rodrigo Duterte na ito ang ginamit na bakuna ng kaniyang Presidential Security Group noong isang taon kahit wala pang pahintulot mula sa FDA.

Ito rin siyang itinurok sa pangulo ni Health Secretary Francisco Duque III noong ika-3 ng Mayo makaraang bigyan naman na ito ng compassionate use noong buwan ng Pebrero.

Inilarga na ang “symbolic rollout” ng COVID-19 vaccine para sa mga essential workers o mga kabilang sa A4 priority group ngayong araw.

Sa pangunguna ni Joey Concepcion, presidential adviser on entrepreneurship, isinagawa ang ceremony sa Mall of Asia Arena.

Ayon kay Concepcion, idinaos ang pledging ceremony para magkaroon ng simbolo ang pagtutulungan ng mga lokal na pamahalaan at pribadong sektor para mabilis na maisagawa ang pagbabakuna kontra COVID-19 ng publiko.

Ani Concepcion, handa na sila sa programang ito ngunit dahil sa kakulangan sa bakuna ay hindi naiiwasan ang pagkaantala.

Una nang nakabili ang pribadong sektor ng 1.17 million na AstraZeneca COVID-19 vaccines na nakatakdang dumating sa Hulyo.

TINGNAN: Pagpapabakuna sa mga nasa A4 priority group sinimulan na sa pangunguna ni DOH Sec. Francisco Duque III na siyang mismo nagbakuna sa mga ito. pic.twitter.com/MOLwA2905E

— DWIZ Newscenter (@dwiz882) June 7, 2021

Isinailalim na ni Pangulong Rodrigo Duterte sa general community quarantine (GCQ) ‘with restrictions’ ang National Capital Region at kalapit nitong mga lalawigan simula ika-1 ng Hunyo.

Sa mensahe sa bayan ni Pangulong Duterte, mananatili sa GCQ ‘with restrictions’ ang Metro Manila, Bulacan, Rizal, Laguna at Cavite mula ika-1 hanggang ika-15ng Hunyo ng kasalukuyang taon.

Bukod sa mga naturang lugar, iiral din ang GCQ sa kaparehong petsa sa mga sumusunod na lugar:

• Baguio City
• Kalinga
• Mountain Province
• Abra
• Isabela
• Nueva Vizcaya
• Quirino
• Batangas
• Quezon
• Iligan City
• Davao City
• Lanao del Sur
• Cotabato City

Isinailalim naman sa mas mahigpit na quarantine classification na modified enhanced community quarantine (MECQ) mula ika-1 hanggang ika-15 ng Hunyo ng kasalukuyang taon ang mga sumusunod na lugar:

• City of Santiago, Cagayan
• Apayao
• Benguet
• Ifugao
• Puerto Princesa City
• Iloilo City
• Zamboanga City
• Zamboanga Sibugay
• Zamboanga del Sur
• Zamboanga del Norte
• Cagayan de Oro City
• Butuan City
• Agusan del Sur

BREAKING: Metro Manila, Rizal, Cavite, Bulacan, Laguna, mananatiling nakasailalim sa general community quarantine (GCQ) ‘with restrictions’ sa buong buwan ng Hunyo, ayon kay Pangulong Rodrigo Duterte https://t.co/HHOy7zaafm pic.twitter.com/HteHLQdrJw

— DWIZ Newscenter (@dwiz882) May 31, 2021

Samantala, iiral naman ang modified GCQ sa nalalabing bahagi ng bansa.

Ibinasura ng House Committee on Justice sa unang araw pa lamang ng hearing ang impeachment complaint laban kay Supreme Court Associate Justice Marvic Leonen.

Sa botong 44 na sang-ayon at wala namang pagtutol ay bumoto ng “dismiss outright” ang mga myembro ng panel matapos kakitaan na walang sapat na porma ang reklamong pagpapatalsik laban kay Leonen.

Nagmosyon si Senior Deputy Speaker Doy Leachon na ibasura na ang impeachment complaint laban kay Leonen.

Ayon kina Deputy Speaker Rufus Rodriguez at Albay Rep. Edcel Lagman, wala umanong isinumiteng certified at authentic records o documents ang complainant na si Edwin Cordevilla.

Anila, puro photocopy sa dyaryo at sa online news website pinagkukuha ang mga dokumentong ibinigay sa komite.

“Purely hearsay” rin umano at hindi tatayo ang reklamong ito sa trial.

Naging batayan naman sa pagbasura ng naturang reklamo ang Section 1 Rule 16 ng rules of court.

Hindi naman na ibabalik sa tanggapan ng Secretary General ang impeachment complaint bagkus ay gagawan na ito ng committee report para sa tuluyang pagsasara ng kaso. —ulat mula kay Jill Resontoc (Patrol 7)

Umakyat na sa ikalawang puwesto ang Pilipinas sa “vaccination rollout” sa Southeast Asia ito’y matapos umakyat sa 4,097,425 doses na ang naipamahagi sa mga mamamayan.

Sa inilabas na datos ng Bloomberg World Data, nasa kabuuang 4,097,425 doses ang bakunang naibigay na sa mga mamamayan ng Pilipinas.

Nangunguna naman ang Indonesia na may 24, 723,728 doses , nasa ikatlo ang Cambodia na may 3, 673, 639 doses , nasa ikaapat na pwesto naman ang Singapore na may 3, 407, 068, habang nasa ikalimang pwesto ang Myanmar na may 2, 994,900 doses.

Habang nasa top 13 ang Pilipinas sa 47 bansa sa Asya at ika-37 mula sa 196 na bansa sa buong mundo.

Umabot na sa 4-milyong Pilipino ang nabakunahan sa buong bansa.

Samantala, sinabi ni vaccine czar Secretary Carlito Galvez Jr. na maaaring madoble ang bilang sa Hunyo dahil isasalang ang mga economic frontliners at indigenous population sa patuloy na pagdating ng mga bakuna sa bansa.

Aniya, posible na rin maaabot ang herd immunity bago matapos ang taon.

Itinaas na sa 30% ang pinapayagang kapasidad sa mga religious gathering sa NCR plus hanggang sa katapusan ng Mayo.

Ayon kay Justice Secretary Menardo Guevarra, miyembro ng Inter Agency Task Force (IATF), mula sa 10% capacity napagdesisyunan nang itaas ito sa 30% sa NCR plus na ngayon ay nasa ilalim ng general community quarantine “with heightened restrictions”.

Ito aniya ay kahilingan na rin ng mga religious group.

Ngunit nilinaw ni Guevarra na ang mga lokal na pamahalaan pa rin ang magbibigay ng otorisasyon para ipatupad ang 30% capacity sa mga religious gathering sa kanilang nasasakupan.

Nilinaw ng PhilHealth na may sapat silang pondo para mabayaran ang kanilang obligasyon sa lahat ng kasosyong ospital.

Ito’y matapos aminin ng PhilHealth na ang sanhi ng pagkaantala ng proseso ng claims ay dahil sa coronavirus disease 2019 (COVID-19).

Pagdepensa ni PhilHealth Spokesperson Shirley Domingo na naapektuhan din ng pandemya ang workforce ng ahensya.

Dahil dito, marami sa kanilang empleyado ang kailangan i-confine at isolate dahil sa pagkakaexpose sa COVID-19.

Kasabay nito, tiniyak ng PhilHealth na inaasikaso na nila ang lahat ng kailangan upang matupad ang pangakong pagbabayad sa lahat ng utang sa mga ospital.

Sa ngayon, nabanggit ng PhilHealth na nagbayad na ito ng P6-bilyon sa debit-credit payment method sa 182 na ospital.

Itinanghal na na 2020 Miss Universe si Miss Mexico Andrea Meza sa isinagawang 69th coronation night sa Seminole Hard Rock Hotel and Casino sa Hollywood, Florida, USA.

Sampung (10) taon ito matapos huling mapasakamay ng Mexico ang Miss Universe Crown noong 2010 at unang nakuha ang titulo noong 1991.

Tinalo ng 26-anyos at software engineer na si Meza ang 73 iba pang kandidata kabilang si Miss Philippines Rabiya Mateo matapos ang kanyang sagot sa usapin ng changing beauty standards.

Itinanghal na first runner up si Miss Brazil, second runner up si Miss Peru, third runner up si Miss India at fourth runner up si Miss Dominican Republic.

Bagamat nakapasok sa Top 21, bigo si Rabiya na makapasok sa Top 10 bagamat una nang lumabas sa pageant website na Missosology ang pagpili kay Rabiya na ikatlo sa mga posibleng manalong Miss Universe ngayong taon.

Una nang pumasok sa Top 10 ang mga pambato ng Jamaica, Dominican Republic, India, Peru, Australia, Puerto Rico, Thailand, Costa Rica, Mexico at Brazil.

Negatibo naman ang reaksyon ng mga netizens sa resulta ng pageant ngayong taon dahil maliban sa hindi nakapasok sa Top 10 si Rabiya, sa simula’t simula pa lamang ng show ay malalamya na ang mga pageant hosts partikular si Miss USA Olivia Culpo na itinanghal na Miss Universe 2012.

Idineklara ng Anti-Terrorism Council (ATC) ang 19 na umano’y matataas na opisyal ng Communist Party of the Philippines (CPP) kabilang ang founder nitong si Jose Maria Sison bilang terorista.

Ang deklarasyon ay nakasaad sa Resolution Number 17 na nag-aatas sa Anti-Money Laundering Council para i-freeze ang mga assets nito.

Bukod kay Sison, kabilang  sa mga idineklarang terorista na pawang miyembro ng central committee ng CPP sina Vicente Ladlad, Adelberto Silva, Rafael Baylosis at Wilma at Benito Tiamzon.

Sa hiwalay na resolusyon, idineklara rin ng ATC bilang terorista ang 10 miyembro ng local terrorist groups tulad ng Bangsamoro Islamic Freedom Fighters, Abu Sayyaf Group at Daulah Islamiyah.