Abiso sa mga motorista!
Matapos ang ilang sunod na taas-presyo, asahan na sa susunod na linggo ang rollback sa presyo ng produktong petrolyo.
Batay sa pagtataya ng UniOil Petroleum Philippines, posibleng bumaba sa P2.90 hanggang P3.00 ang tapyas sa presyo kada litro ng diesel.
Habang P0.40 hanggang P0.60 kada litro naman ang mababawas sa kada litro ng gasolina.
Aabot sa 200 gamot ang exempted na mula sa Value-Added Tax (VAT).
Batay sa Bureau of Internal Revenue (BIR) – Revenue Memorandum Circular 68-2022 na kabilang sa inaprubahan ay ang mga generic name ng mga gamot sa sakit na Hypertension, Cancer, Mental illness, Tuberculosis, Kidney disease, Diabetes at mataas na Cholesterol.
Kabilang din dito ang COVID-19 related medicines at medical devices na nakapaloob sa Corporate Recovery and Tax Incentives for Enterprises.
Ang nasabing kautusan ay nakabatay sa isinumiteng listahan ng Food and Drug Administration na nilagdaan naman ni BIR Commissioner Caesar Dulay.
Ibinida ng Philippine Army ang kanilang mga makabagong kagamitan sa isang exhibit sa Philippine Military Academy, sa Fort Del Pilar sa Baguio City.
Sinasabing ito ay bahagi ng mga aktibidad sa pagtatapos ng PMA “Bagsik Diwa” Class of 2022 sa layong makahikayat ng mga kadete na piliing sumali sa Army sa kanilang pagtatapos.
Sa 214 na miyembro ng “Bagsik Diwa”, nasa 104 ang nakatakdang sumama sa Philippine Army, ang pinaka-una at pinaka-malaking serbisyo ng Armed Forces of the Philippines (AFP).
Aprubado na ng Regional Tripartite Wages and Productivity Board – National Capital Region ang petisyong umento sa sahod ng mga manggagawa sa Metro Manila.
Batay sa Wage Order No. NCR-23 na na inilabas kahapon, dagdag na P33 kada araw ang matatanggap ng mga manggagawa sa rehiyon.
Ibig sabihin, papalo na sa P570 ang arawang sahod ng mga minimum wage workers at P533 sa mga non-agriculture and agriculture sectors.
Matatandaang Nobyembre 2018 pa nang aprubahan ng gobyerno ang P25 na dagdag sahod sa mga manggagawa sa Metro Manila.
Maliban dito, aprubado rin ng nasabing Wage Board ang dagdag na P500 kada buwan ng mga kasambahay sa Western Visayas kasabay ng P55 hanggang P110 na dagdag sa mga manggawa sa nasabing lugar.
Paliwanag ng DOLE, ang ginawang umento sa sahod ay bilang tugon sa tumataas na presyo ng ilang pangunahing pangangailangan ng mga Pilipino.
Ipinag-utos na ni Quezon City Mayor Joy Belmonte sa Quezon City Police District (QCPD) at Bureau of Jail Management and Penology (BJMP) ang imbestigasyon sa nangyaring gulo sa pagitan ng dalawang grupo sa Quezon City Jail kahapon, Mayo a-13.
Ayon kay Belmonte, dapat na magkasa ng malalimang imbestigasyon ang otoridad para malaman ang puno’t dulo ng nangyaring riot.
Aniya, kailangang ding maparusahan ang mga nagpabaya sa kanilang tungkulin para hindi na maulit pa ang nangyaring insidente sa loob ng pasilidad.
Nabatid na batay sa salaysay ni PLt. Col. Alex DJ Alberto, agad na rumesponde ang QCPD Station 10 matapos matanggap ang ulat ukol sa nangyaring gulo na pinaniniwalaang sumiklab bandang alas 4:30 ng hapon.
Isa ang naiulat na nasawi habang siyam ang sugatan na agad itinakbo sa pinakamalapit na ospital.
Mayorya na ng mga rehiyon sa Pilipinas ang nakapag-transmit na ng election returns sa pagkasenador at partylist groups.
Ayon kay Comelec Spokesperson John Rex Laudiangco, nagmula ang ERs sa Cordillera Administrative Region, Metro Manila, Regions 1, 2, 3, 4A, 4B, Bicol, Region 6, 7, 8, 9, 11, 12 at 13.
Sa Northern Mindanao at Cagayan De Oro City, nasa mahigit 85% na lamang ng transmission ang hinihintay.
Sa Bangsamoro Autonomous Region in Muslim Mindanao, magdaraos pa lamang ng special elections sa tatlong bayan sa Lanao del Sur habang hindi pa nagsisimula ang Overseas Absentee Voting sa Shanghai, China.
Kahapon, target ng poll body na makuha ang boto mula sa Lungsod ng Maynila, Taguig-Pateros, South Cotabato, Cebu, Davao City, Zamboanga del Sur at Basilan.
Dumagsa sa Ateneo De Manila University sa Katipunan Avenue sa Quezon City kagabi ang libo-libong tagasuporta nina Vice President Leni Robredo at Senator Francis Kiko Pangilinan.
Nagsimula ang programa ganap na alas-5 ng hapon na pinangunahan ng isang misa.
Sinundan ito ng pagtatanghal ng iba’t ibang personalidad.
Dumating si Robredo sa venue dakong alas-7 ng gabi na pinasalamatan ang lahat ng tumulong, sumuporta at nag-ambag sa kaniyang kampaniya.
Nagdulot naman ng bigat ng daloy ng trapiko ang pagtitipon kaya tumulong ang mga tauhan ng Quezon City Department of Public Order and Safety sa pagmamando ng trapiko.
Hindi pa napapanahon upang magpatupad nang mandatory COVID-19 vaccinations sa susunod na administrasyon.
Ayon kay Dr. Ted Herbosa, medical adviser ng National Task Force, sa kasalukuyan ay experimental pa ang mga bakuna.
Hindi aniya kailangang magmadali ang pamahalaan dahil kailangan munang masuri ang datos at matiyak ang resulta.
Sa ngayon, tanging ang mga Immunocompromised ang pinayagang makatanggap ng ikalawang booster.
Magsasagawa ang DPWH ng repair at reblocking sa ilang pangunahing kalsada sa Metro Manila ngayong weekend.
Ayon sa MMDA, nagsimula ito alas-11 kagabi na magaganap sa mga sumusunod na lansangan;
* Northbound lane ng EDSA Quezon City paglagpas ng New York St. Kamuning 1st lane
* C-5 Road Northbound (4th lane) bago sumapit ng McKinley Road sa Makati City
* EDSA Southbound Caloocan City bago sumapit ng Urbano Plata St (2nd lane mula sa bangketa)
* Agham RD paglagpas ng Quezon Avenue
* Southbound lane ng EDSA service road, 3rd lane sa bahagi ng South Avenue Intersection at 2nd lane mula bangketa at kanto ng South Avenue patungong Kamuning RD.
* C.P. Garcia Avenue Quezon City, kahabaan ng Pasig Blvd. Southbound sa harap ng St. Ignatius de Loyola Health Care Services at malapit sa Sitel Building
* Times Street sa Quezon City kanto ng West Avenue tapat ng Kowloon House
* Tandang Sora Avenue sa Quezon City partikular sa bahagi ng Visayas Avenue patungong San Miguel St.
Pinayuhan naman ang mga motorista na maghanap ng alternatibong ruta upang hindi maabala.
Ilulunsad ni Vice President Leni Robredo sa Hulyo a-1 ang Angat Pinas, Inc. bilang isang Non-Government Organization (NGO).
Inihayag ni Robredo ang ulat sa ginanap na Thanksgiving speech kasama ang tandem na si Senator Kiko Pangilinan sa Ateneo De Manila University sa Katipunan Avenue, Quezon City kagabi.
Ayon kay Robredo, bubuuin ng programa ang pinakamalawak na volunteer network sa kasaysayan ng Pilipinas.
Hindi mamimili ng miyembro ang NGO na layong ipakita ang buong pwersa ng radikal na pagmamahal.
Pinayuhan naman ng Bise-presidente ang kaniyang mga nadismayang tagasuporta na magmove-on na sa partial counts ng election sa pagkapangulo at huwag itong gawing dahilan ng pagkawatak-watak ng bansa.
Tiniyak naman ng mga tagasuporta at volunteers ni Robredo ang pakikilahok sa gagawing NGO.