HOT STORIES OF THE WEEK

Itinanggi ng kampo ni presumptive president Ferdinand ‘Bongbong’ Marcos Jr. ang kumalat na listahan ng umano’y miyembro ng kaniyang gabinete.

Ayon kay Atty. Vic Rodriguez, tagapagsalita ni Marcos, walang inilalabas na listahan ang kanilang kampo maliban kina presumptive vice president Sara Duterte na magiging kalihim ng Department of Education at Benhur Abalos para sa Department of the Interior And Local Government.

Nagkasundo naman sina Rodriguez na nangunguna sa Transition team ni Marcos at kampo ni Executive Secretary Salvador Medialdea na isagawa ang transition sa sandaling iproklama na si BBM.

Una nang tiniyak ni Pangulong Rodrigo Duterte na magiging maayos ang transition ng kapangyarihan sinuman ang uupong bagong pangulo.

‘’Approved in Principle’’ na ng Commission on Elections (Comelec) ang karagdagang bayad sa mga gurong nag Over-Time noong May 9 elections.

Ayon kay Comelec Commissioner George Garcia, pinag-uusapan na kung magkano ang idaragdag na honararia sa mga poll worker.

Pantay-pantay ang matatanggap ng lahat nang nagsilbi na karamiha’y guro, support staff at technicians.

Ang naranasang aberya sa Vote-Counting Machines (VCMs), rejected ballots, paper jam at problema sa scanner at printer ang karaniwang naging problema noong botohan kaya’t nag-overtime ang mga guro.

Hindi pa tuluyang maipatutupad ang inaprubahang wage order ng Regional Tripartite Wages and Productivity Board para sa dagdag-sahod ng mga manggagawa sa National Capital Region at Western Visayas.

Ayon kay Maria Criselda Sy, Executive Director ng National Wages and Productivity Commission (NWPC), sasalain pang mabuti ng komisyon ang kautusan kung tumatalima sa labor laws.

Kapag nasunod anya ang tamang proseso, dito na maaaring pagtibayin ang wage order sa dalawang rehiyon na ilalabas matapos ang 15 araw.

Tiniyak naman ni Sy na walang naibabasurang wage order ang komisyon maliban kung may kailangang itama sa pagsunod sa batas.

Handa ang Department of Social Welfare and Development (DSWD) para sa transition plan ng susunod na administrasyon.

Paliwanag ni Irene Dumlao, tagapagsalita ng DSWD, bumubuo na ng transition handbook ang ahensya na naglalaman ng accomplishments at mga programang dapat palakasin.

Kabilang dito ang mga nagawa mula 2016 hanggang 2022 gaya ng Pantawid Pamilya Pilipino Program (4Ps), Sustainable Livelihood Program at Kalahi-CIDSS Program.

Samantala, umaasa si Dumlao magiging maayos ang pagsasalin ng mga programa sa papasok na administrasyon ni presumptive president Bongbong Marcos.

Maglalabas na ng desisyon sa lalong madaling panahon ang Regional Wage Board para sa dagdag sahod ng ilan pang rehiyon sa bansa.

Ayon kay Labor Secretary Silvestre Bello III, siyam pang petisyon ang binubusisi ng Wage board para sa hirit na umento.

Kasabay ito ng epekto ng pagtaas ng presyo ng oil products, pagmahal ng bilihin at singil sa kuryente.

Samantala, hinikayat naman ni Bello ang mga employer at negosyo na maghain din nang apela kung hindi kayang magbigay ng dagdag-sahod.

Magugunitang inaprubahan ng Wage board ang P33 wage increase sa mga minimum wage earners sa Metro Manila habang P55 hanggang P110 sa Western Visayas.

Mababa pa rin sa 1.1% ang COVID-19 positivity rate sa Pilipinas o bilang nang nahahawa sa COVID-19.

Ayon kay Dr. Guido David ng OCTA research team, hindi tumataas sa 200 ang naitatalang bagong kaso kada araw.

Nananatili sa Low risk classification ang bansa na may Reproduction number na 0. 6.

Sa ngayon, kahit na mayroong naitalang Omicron sub-variant na BA.2.12.1 sa bansa, hindi pa naman anya ito dapat ikabahala.

Patuloy kasi ang kanilang pagbabantay lalo na sa Palawan at Metro Manila na nakapagtala ng nasabing subvariant.

Umapela sa gobyerno ang Parish Pastoral Council for Responsible Voting (PPCRV) na buksan sa mas maraming suppliers ang bidding process para sa pagbili ng mga Vote-Counting Machine (VCM).

Ito, ayon kay PPCRV Chairperson Myla Villanueva, ay matapos ang mga aberya sa iba’t ibang polling precincts noong May 9 elections.

Sa pamamagitan din nito, maraming pagpipilian ang gobyerno na VCM supplier lalo’t mayroon anyang limitasyon sa batas ang pagbili ng mga nasabing makina.

Ang mga ginamit na VCM noong halalan ay ini-refurbish lamang matapos hindi mabigyan ng sapat na pondo para bumili ng mga bagong makina.

Nababahala ang Employers Confederation of the Philippines (ECOP) sa magiging epekto sa maliliit na negosyo nang inaprubahang dagdag arawang sahod para sa mga manggagawa sa Metro Manila at Western Visayas.

Ayon kay Sergio Ortiz-Luis, Pangulo ng ECOP, mayorya ng maliliit na negosyo ay hindi alam kung saan huhugutin ang ipasasahod dahil sa pagkalugi bunsod ng COVID-19 pandemic.

Kahit maliit lang anya ang P33 na umento, marami pa ring employers ang umaaray dito.

Nabatid na nasa 90% ng mga negosyo sa Pilipinas ay kabilang sa Micro Enterprises na nag-aambag ng 65% workforce sa bansa.

Inihayag ng Department of Labor and Employment (DOLE) na maaaring mag-apply ng exemption mula sa inaprubahang minimum wage hike order ang maliliit na negosyo

Nilinaw ni labor secretary Silvestre Bello III na maaaring magpa-exempt sa wage hike order ang mga establisimyento na nasa 10 o mas mababa pa ang bilang ng mga empleyado.

Dagdag pa ng kalihim na maaari ring mag-apply ang malalaking mga negosyo kung biktima ang mga ito ng kalamidad.

Magugunitang i-anunsyo ng DOLE ang pag-apruba ng wage board sa 33 pesos na dagdag-sahod sa Metro Manila at 55 hanggang 110 pesos naman na umento sa Western Visayas.

Samantala, umaasa si Bello na magpapalabas na rin ng wage increase order ang ibang regional wage board.

Nagpaalala ang Commission on Elections na magsumite na ng kanilang Statement of Contribution and Expenditures o SOCES ang lahat ng mga lumahok sa 2022 National and Local Elections, kabilang ang mga kandidatong nag-withdraw.

Ayon kay Comelec commissioner George Garcia, dito malalaman kung saan galing ang pondong ginastos ng mga kandidato sa kampanya.

Nakasaad sa batas na kailangan maisumite ang SOCES sa poll body 30 araw pagkatapos ng araw ng botohan at hindi makakaupo sa kanyang puwesto ang sinumang mahahalal na kandidato hangga’t hindi siya nakapaghahain nito.

Mababatid na sa ilalim ng Section 14 ng Republic Act 7166, bawat kandidato at treasurer ng political party ay kinakailangan maghain sa Comelec ng listahan ng buo, totoo at itemized statement ng lahat ng kontribusyon at gastos na may kinalaman sa halalan.