HEADLINES

Naghain ng manifestation ang depensa ni Vice President Sara Duterte kaugnay ng mga dokumentong ginagamit sa nagpapatuloy na impeachment trial.

Ayon kay defense counsel Atty. Kristine Ferrer, napansin nilang walang lagda at petsa ang listahan ng mga account na inihanda ni dating COA State Auditor Roderick Wamil.

Dagdag pa ng abogado, tila inilipat lamang ni COA ICFAO State Auditor Xylene Del Campo ang mga pahina ng dokumento nang hindi ikinukumpara ang mga acknowledgment receipt sa listahang umano’y inihanda ni COA State Auditor Roderick Wamil.

Bukod dito, sinabi rin ng depensa na hindi pa namamarkahan bilang ebidensya ng prosekusyon ang mga folder na naglalaman ng mga acknowledgment receipt.

Agad namang pinigilan ni Presiding Officer Francis Escudero si private prosecutor Atty. Lorna Kapunan na maghain ng counter-manifestation. | via Jenn Patrolla (Patrol 38)

Hihilingin ng House prosecution sa Senate Impeachment Court na magpalabas ng subpoena laban kay Mary Grace Piattos, isa sa mga pangalang nakalista na tumanggap ng confidential funds ng Office of the Vice President.

Ayon kay Private Prosecution Counsel Atty. Lorna Kapunan, hindi pa rin nila matagpuan ang nasabing indibidwal kaya ipapadala nila ang subpoena sa tanggapan ng Pangalawang Pangulo.

Ipinunto ni Atty. Kapunan na lumitaw ang pangalan ni Mary Grace Piattos sa mga acknowledgment receipt na isinumite ng OVP, na kinukuwestyon ng prosekusyon dahil sa pagiging kahina-hinala ng mga dokumento.

Maghahain din anya ang prosekusyon ng expert witness upang suriin at mapatunayan ang pagiging tunay ng mga lagda sa mga acknowledgment receipt na isinumite bilang bahagi ng liquidation reports.

Binubusisi na ng Impeachment Court ang unang artikulo ng impeachment case laban kay Vice President Sara Duterte, na may kaugnayan sa umano’y maling paggamit ng 500-million pesos confidential funds ng OVP at karagdagang 112.5-million pesos mula sa Department of Education noong siya pa ang kalihim ng naturang kagawaran.  l mula sa panulat ni Jordan Gutierrez

Tuluy-tuloy ang pagtugis ng National Bureau of Investigation (NBI) kay Senador Ronald “Bato” Dela Rosa sa gitna ng mga kumalat na ulat na naaresto na umano ang senador.

Ayon kay NBI Director Melvin Matibag, wala silang kumpirmasyon na nahuli na si Senador Dela Rosa at nananatili itong at large.

Samantala, kinumpirma ni Atty. Israelito Torreon, abogado ni Senador Dela Rosa, na wala rin siyang natanggap na impormasyon tungkol sa pagkakaaresto ng kaniyang kliyente.

Nilinaw ng abogado na huli silang nagkaroon ng komunikasyon ni Senador Dela Rosa dalawang oras matapos umalis ang mambabatas sa gusali ng Senado noong Mayo a-katorse. l mula sa panulat ni Jordan Gutierrez

Pinasinungalingan ng mga otoridad ang mga ulat na naaresto na si Senador Ronald “Bato” Dela Rosa matapos kumalat sa mga mamamahayag ang impormasyon na nahuli na ang senador sa Davao.

Ayon kay Justice Spokesman Atty. Polo Martinez, walang kumpirmasyon ang napabalitang naaresto na ang senador, habang iginiit naman ni Interior Secretary Jonvic Remulla na wala ring impormasyon ang Philippine National Police tungkol sa sinasabing pagdakip.

Nababahala naman ang mga kaalyado ng senador na sina Atty. Jimmy Bondoc at dating Presidential Spokesman Harry Roque matapos nilang ihayag na may “bad news” at may “nang-Hudas” umano kay Senador Dela Rosa.

Gayunman, iginiit ni Manila International Airport Authority General Manager Eric Ines na wala pa silang namo-monitor na chartered flight patungong The Hague, Netherlands.

Matatandaang nahaharap si Senador Dela Rosa sa arrest warrant ng International Criminal Court matapos pangalanang co-perpetrator ni dating Pangulong Rodrigo Duterte sa kasong crimes against humanity kaugnay sa madugong war on drugs.  l mula sa panulat ni Anjo Riñon

Palalawakin pa ng Pilipinas ang ugnayang pangkalakalan sa iba pang pandaigdigang merkado habang nagpapatuloy ang negosasyon nito sa Estados Unidos kaugnay ng bagong taripang ipinataw ng administrasyon ni U.S. President Donald Trump.

Ayon kay Trade Secretary Cristina Roque, layunin ng Department of Trade and Industry na mabawasan ang pagdepende ng bansa sa iisang merkado at makahanap ng mas maraming destinasyon para sa mga produktong Pilipino.

Inaasahan anyang makukumpleto ng administrasyon ni Pangulong Ferdinand Marcos Jr. ang limang free trade agreements bago matapos ang taon, kabilang ang mga kasunduan sa European Union, Japan, Canada at Chile.

Tiniyak ni Secretary Roque na patuloy ang pakikipag-usap ng pamahalaan sa U.S. at iginiit nitong mahigpit na ipinagbabawal sa Pilipinas ang paggamit at pag-aangkat ng mga produktong mula sa forced labor.

Matatandaang noong Hulyo a-bente kwatro, nagpataw ang Estados Unidos ng 12.5-percent taripa sa mga produkto mula sa tatlumpu’t walong bansa, kabilang ang Pilipinas, dahil sa umano’y kakulangan sa pagpapatupad ng pagbabawal sa mga produktong gawa sa sapilitang paggawa.  l mula sa panulat ni Jordan Gutierrez

Tinanggihan ng Sandiganbayan Second Division ang mosyon ng Office of the Ombudsman na alisin si dating Public Works Secretary Manuel “Manny” Bonoan bilang akusado sa kasong graft kaugnay ng umano’y 573 million pesos kickback sa mga flood control project ng pamahalaan.

Sa inilabas na resolusyon, iginiit ng Sandiganbayan na walang sapat na batayan upang aprubahan ang Motion for Leave to File Amended Information na inihain ng prosekusyon.

Nilinaw ng graft court na ang pagtanggal kay Bonoan bilang akusado ay maaaring makaapekto sa depensa ng kapwa akusadong si Senador Jinggoy Estrada, dahil mahalagang maipakita ang partisipasyon ng bawat isa sa paglalahad ng ebidensya.

Iginiit ng Sandiganbayan na ang pananatili ni Bonoan bilang akusado ay hindi otomatikong nangangahulugang hindi na siya maaaring magsilbing testigo ng prosekusyon, basta’t matugunan ang mga itinakdang requirements para sa pagiging state witness sa ilalim ng batas.

Matatandaang nais ng Ombudsman na matanggal si Bonoan sa kaso upang maging state witness laban sa iba pang mga inaakusahan sa flood control scandal. l mula sa panulat ni Jordan Gutierrez

Iginiit ni dating Energy Secretary Jericho Petilla na may kapangyarihan ang Energy Regulatory Commission na alisin ang system loss charge sa electric bill kahit hindi na amyendahan ang EPIRA Law o Electric Power Industry Reform Act of 2001.
Ayon kay dating Energy Secretary Petilla, ang ERC ang nagtatakda ng pinapayagang threshold ng system loss na maaaring ipasa sa mga consumer, na kasalukuyang 8.5-percent para sa Meralco at 13-percent para sa mga electric cooperative.
Samantala, sinabi ni House Committee on Energy Chairman at Palawan Rep. Jose Alvarez, na hindi lamang ang non-technical system loss ang maaaring alisin, kundi maging ang technical system loss sa mga susunod na taon.
Gayunman, nagbabala ang BA Securities Inc. na kahit alisin ang “system loss” bilang hiwalay na line item sa electric bill, maaari pa rin itong maipasa sa mga consumer sa pamamagitan ng distribution, supply at metering charges.
Ipinaliwanag din ng brokerage firm na mahirap tuluyang ipagbawal ang system loss dahil may hindi maiiwasang pagkawala ng kuryente habang dumadaloy ito sa mga linya at transformer, at maaari ring humantong sa usaping ligal ang ganap na pagbabawal sa naturang pass-through charges. l mula sa panulat ni Jordan Gutierrez