HEADLINES

Umangat ng labing-apat na puntos ang satisfaction rating sa administrasyon ni Pangulong Ferdinand Marcos Jr. nitong June 2026.

Batay sa survey ng Social Weather Stations (SWS), 42-percent ng mga adult Filipino ang nagsabing kuntento sila sa performance ng administrasyon, habang 40-percent ang hindi satisfied at 17-percent ang hindi matukoy ang kanilang pananaw.

Ayon sa SWS, ito ay 14-point recovery mula sa negative-13 net satisfaction rating noong March 2026, na naitalang record low para sa administrasyong Marcos at pinakamababa sa loob ng labing-anim na taon.

Kabilang sa mga larangang mababa ang ratings ang pagtugon ng administrasyon sa inflation, na may negative-12, at paglaban sa korapsyon na may negative-14.

Nakakuha naman ng “very good rating” ang administrasyon sa basic education, pagtulong sa mahihirap, at mga polisiya para sa paglikha ng trabaho.

Isinagawa ang survey sa isanlibo dalawangdaang respondents noong June 20 hanggang June 29, isang buwan bago ang ika-limang SONA ni Pangulong Marcos.  | sa panulat ni Jordan Gutierrez

Mala-himala ang sinapit ng St. John the Evangelist Cathedral sa Dagupan City dahil nanatili itong tuyo at hindi naapektuhan ng baha dulot ng tuloy-tuloy na malakas na ulang dulot ng bagyo at Habagat.

Gayunman, ayon kay Dagupan Cathedral Parish Priest, Msgr. Manuel Bravo, ito’y dahil kinabitan nito ng isang underground cistern ang parking lot ng simbahan noong 2025 upang doon imbakin ang tubig-baha tuwing umuulan, sa tulong ni dating Public Works Secretary Rogelio “Babes” Singson.

Dagdag pa ng pari, may lalim na tatlong metro ang nasabing imbakan na inilagay sa ilalim ng paradahan sa patyo ng katedral; at mayroon din itong mga pump upang mailabas ang tubig-baha sa drainage system ng lungsod.

Nakatulong din anya na elevated ang pasukan sa nasabing simbahan upang maiwasang pumasok sa compound nito ang baha mula sa kalsada.

Iginiit din ni Msgr. Bravo na si Singson ang nagpaliwanag sa pamunuan ng simbahan na gamitin ang naturang teknolohiya, na nakabatay naman sa flood control system ng Bonifacio Global City (BGC) sa Taguig.

Nagpadala rin anya ang dating kalihim ng DPWH ng ilan sa kanyang mga tauhan upang umalalay sa pagsasagawa ng nasabing imbakan.  | sa panulat ni Anjo Riñon

Isinailalim na sa state of calamity ang buong lalawigan ng Cavite dahil epekto ng pinalakas na Habagat at mga nagdaang bagyo.

Ayon kay Cavite Governor Abeng Remulla, nagdulot ang masamang panahon ng pagbaha, pinsala sa mga ari-arian, at iba pang epekto sa iba’t ibang komunidad sa lalawigan.

Layunin anya ng deklarasyon na mapabilis ang pagtugon ng pamahalaan, at pagbibigay ng tulong sa mga residenteng naapektuhan.

Tiniyak ng pamahalaang panlalawigan na patuloy nilang mino-monitor ang mga lugar na nangangailangan ng agarang tulong at kaligtasan ng mga residente.  l mula sa panulat ni Jordan Gutierrez

Isiniwalat ng isang state auditor ng Commission on Audit (COA) ang ilang tala sa umano’y paggamit ng confidential funds ng Office of the Vice President noong December 2022.

Sa ika-labing-apat na araw ng impeachment trial ni Vice President Sara Duterte kahapon, kinuwestyon ni private prosecutor Atty. Lorna Kapunan ang mga gastusing nakatala sa COA records.

Ayon kay COA Auditor Xylene Del Campo, nakatala sa mga dokumento ang inilaan na pondo para sa 2022 Partners Appreciation Night ng Department of Education sa Mandaluyong City noong December 13, 2022.

Naglaan din anya ang OVP ng pondo para sa ilang aktibidad noong December 17, 2022, kabilang ang Christmas Activity sa Happy Land at Extension Office sa Barangay 101 sa Tondo, Maynila.

Tinanong ni Atty. Kapunan si Del Ocampo kung itinuturing itong confidential activity batay sa Joint Circular na nagtatakda kung saan maaaring gamitin ang confidential funds.

Iginiit ng COA Auditor na hindi kasama sa mga pinapayagang paggamit ng confidential funds sa ilalim ng Joint Circular ang mga nasabing okasyon at aktibidad ng Office of the Vice President.   l mula sa panulat ni Jordan Gutierrez

Nakakita ang National Bureau of Investigation (NBI) ng indikasyon ng korapsyon sa paggamit ng pondo ng gobyerno para sa pagho-host ng Pilipinas sa 2019 Southeast Asian Games.

Ayon kay NBI Director Melvin Matibag, sapat na ang mga nakalap na dokumento upang makabuo ng matibay at makatwirang findings sa kasalukuyang imbestigasyon.

Kabilang sa humarap sa NBI si Philippine Sports Commission Chair John Patrick Gregorio, na dating miyembro ng PHISGOC o Philippine Southeast Asian Games Organizing Committee.

Nagbigay si Gregorio ng testimonya at mga dokumentong kaugnay ng imbestigasyon sa 2019 SEA Games.

Tiniyak ni Director Matibag na may iba pang nagsumite ng mga dokumento, habang ilang dating opisyal ng PHISGOC ay hindi pa rin humarap sa NBI sa kabila ng mga subpoena.

Matatandaang iniimbestigahan ng NBI ang nasa 3.7 bilyong pondong inilipat mula sa PSC at Philippine Olympic Committee patungo sa PHISGOC na umano’y hindi dumaan sa kinakailangang audit at liquidation process. l mula sa panulat ni Jordan Gutierrez

Inatasan na ng Senate Impeachment Court na humarap at tumestigo ang dalawang dating special disbursing officers ng Office of the Vice President (OVP) at Department of Education (DepEd) sa panahon ni Vice President Sara Duterte.

Pinagbigyan ng korte ang kahilingan ng prosekusyon na maglabas ng subpoena ad testificandum laban kina dating OVP Special Disbursing Officer Gina Acosta at dating DepEd Special Disbursing Officer Eduard Fajarda.

Ayon kay Lead Prosecutor at Batangas Representative Gerville Luistro, inaasahang haharap ang dalawang dating opisyal sa impeachment trial sa August 10 hanggang August 12, kung saan bahagi ng kanilang testimonya ang paglilinaw sa paggamit at paglalabas ng confidential funds ng OVP at DepEd.

Nauna nang tumestigo ang mga dating Land Bank branch managers na sina Violeta Constantino at Nenita Camposano, na nagsabing sina Acosta at Fajarda ang mga nakatalang payee sa mga tseke ng confidential funds na winithdraw bilang cash.  l mula sa panulat ni Jordan Gutierrez

Wala nang prenuhan ang nakatakdang transport strike ng Manibela sa August 10 hanggang August 12, sa kabila ng desisyon ng pamahalaan na itaas sa dose pesos ang kasalukuyang diyes pesos na fuel discount para sa mga jeepney at UV Express driver.

Ayon kay Manibela Chairman Mar Valbuena, hindi fuel subsidy kundi dagdag-pasahe ang mas epektibong solusyon sa patuloy na pagtaas ng presyo ng langis.

Iginiit ng Manibela na sapat na ang dalawang pisong dagdag-pasahe para makatulong sa mga driver nang hindi maging mabigat sa mga pasahero.

Kung maaaprubahan anila ang kanilang kahilingan, maaari itong magdagdag ng nasa 120-pesos sa arawang kita ng bawat jeepney driver.

Bukas naman ang Manibela sa pakikipagdayalogo sa Malacañang upang talakayin ang kanilang panawagan. l mula sa panulat ni Jordan Gutierrez

Ibinabala ng Department of Education (DepEd) na mahaharap sa legal at administrative penalties ang mga estudyanteng nagpapakalat ng hoax threats o pekeng banta sa mga paaralan.

Ito’y matapos arestuhin ng Philippine National Police (PNP) ang sampung estudyante na sangkot sa pagpapakalat ng mga mapanlinlang na mensahe online.

Ayon kay DepEd Secretary Sonny Angara, mahigpit na ipatutupad ang campus safety policies upang matiyak ang kaligtasan ng mga mag-aaral at guro.

Maaaring managot ang mga sangkot sa ilalim ng Article 282 o Grave Threats ng Revised Penal Code, Cybercrime Prevention Act of 2012, Anti-Bomb Joke Law, at DepEd Order No. 006, Series of 2026 o Guidelines on Ensuring a Safe and Motivating Learning Environment.

Kabilang sa mga naaresto ang pitong kinse-anyos na mag-aaral na iniugnay sa online threat laban sa Tinajero National High School Annex sa Magalang, Pampanga, gayundin ang dalawang disi-otso-anyos na suspek sa Nueva Ecija na umaming nagpakalat ng pekeng bomb threats upang magdulot ng takot at makapagpasuspinde ng klase.  l mula sa panulat ni Jordan Gutierrez