HEADLINES

Sasailalim na sa arraignment ang labing-walong Maleta Boys at kanilang abogado na si Atty. Levito Baligod sa apat na Regional Trial Court sa Metro Manila ngayong araw at magpapatuloy sa susunod na linggo.

Ayon kay Prosecutor General Richard Anthony Fadullon, naipasa na ang mga kasong kriminal sa mga RTC sa Caloocan, Las Piñas, Muntinlupa at San Juan City, at nakahanda na ang mga prosecutor ng Department of Justice (DOJ) na dumalo sa mga nakatakdang pagdinig.

Isinampa noong Hulyo A-bente-otso ang mga criminal information laban kina Baligod at sa Maleta Boys na haharap sa magkakahiwalay na kaso na kabilang ang multiple counts ng cyberlibel at perjury.

May four counts ng cyberlibel naman si Baligod, kung saan tatlo bilang co-accused ng Maleta Boys at isa sa kanyang indibidwal na kakayahan habang walang perjury charge na inirekomenda laban sa abogado.

Kabilang sa nagsampa ng mga reklamo sina dating Senador Antonio Trillanes IV, ML Party-list Rep. Leila de Lima, Fr. Flaviano Villanueva, Bureau of Corrections Director General Gregorio Catapang Jr. at National Security Adviser Eduardo Año.   | mula sa panulat ni Jordan Gutierrez

Nanindigan ang Malacañang na hindi dapat gumamit ng misleading questions ang mga abogado lalo na sa cross-examination dahil posible itong magdulot ng maling sagot.

Ito ang naging tugon ni Palace Press Officer Claire Castro kasunod ng mainit na sagutan nina Prosecutor Lorna Kapunan at Defense Atty. Kristine Ferrer sa ika-labinglimang araw ng paglilitis.

Binigyang-diin ni Usec. Castro na walang puwang ang fake news sa impeachment trial.

Sa cross-examination noong Miyerkules, iginiit ni Atty. Ferrer na “oo o hindi” lamang ang isagot ng isang state auditor ng Commission on Audit, ngunit sumingit si Atty. Kapunan at nagbabala na hindi pinahihintulutan ang mga misleading questions sa cross-examination. | Sa panulat ni Reianne Antiquina

Sinimulan na ng Energy Regulatory Commission (ERC) ang proseso para alisin ang value-added tax o VAT sa system loss charge sa singil sa kuryente.

Ito’y kasunod ng direktiba ni Pangulong Ferdinand Marcos Jr. na bawasan ang pasanin ng mga consumer sa mataas na presyo ng kuryente.

Ayon kay ERC Chairman Francis Saturnino Juan, magsasagawa ang komisyon ng public consultation sa draft resolution na magdedeklara sa system loss charge bilang government-mandated pass-through cost.

Sa ilalim nito, hindi isasama ang system loss charge sa gross receipts ng mga generation company at ng National Grid Corporation of the Philippines (NGCP) para sa pagkukuwenta ng VAT.

Iginiit ni Chairman Juan na ginagamit na ng ERC ang kasalukuyang kapangyarihan nito habang hinihintay ang kinakailangang legislative at policy measures para sa ganap na pagpapatupad ng direktiba ng Pangulo.

Bukas anya ang public consultation sa mga komento at rekomendasyon ng mga generation company, distribution utility, NGCP, mga consumer at iba pang stakeholder bago ilabas ang pinal na resolusyon. | sa panulat ni Jordan Gutierrez

Posibleng tumaas ang singil sa kuryente sa Visayas at Mindanao sa mga susunod na buwan dahil sa sunod-sunod na yellow at red alert sa mga power grid.

Ayon sa National Grid Corporation of the Philippines (NGCP), dalawampu’t pitong power plants ang hindi umaandar habang labing-apat pa ang nag-ooperate sa mas mababang kapasidad, kaya 931.5 megawatts ang hindi available sa Visayas Grid.

Nauna nang inilagay sa red alert ang Visayas Grid habang yellow alert sa Mindanao kahapon, dahil sa pagkaka-outage ng tatlong malalaking coal plant at limitadong power import sa naturang power grids.

Kinumpirma ng Association of General Managers of Electric Cooperatives, bukod sa posibleng rotating blackouts, maaaring mas tumaas din ang electricity bills sa susunod na buwan dahil sa mas mataas na presyo ng kuryente sa Visayas at Mindanao spot markets.

Ipinaalala na ang red alert ay nangangahulugang wala nang nakalaang reserve power at maaaring magdulot ng rotating power outages, habang ang yellow alert naman ay senyales na numinipis na ang naturang reserve.  | sa panulat ni Jordan Gutierrez

Posibleng ipasauli ng Commission on Audit (COA) ang 612.5-million pesos confidential funds ni Vice President Sara Duterte.

Sa ika-labinglimang araw ng impeachment trial, nilinaw ni COA Auditor Xylene Del Campo na posibleng bawiin ang naturang pondo dahil sa paglipat ng paghawak nito sa mga taong hindi otorisado.

Kinuwestyon ni Senate President Sherwin Gatchalian kung maaari ring ma-disallow ang 125-million pesos OVP confidential fund para sa fourth quarter ng 2022 at ang buong Dep-Ed confidential funds.

Iginiit ni Del Campo na ang paglipat ng cash advance mula sa Special Disbursing Officer patungo sa ibang tao ay nakakaputol sa “chain of accountability,” dahil nawawala ang personal na kaalaman ng SDO kung saan at paano talaga ginamit ang pondo.

Nilinaw ng COA Auditor na patuloy pa rin pinag-aaralan ang pag-disallow sa Dep-Ed confidential funds dahil itinuturing na itong settled accounts at kailangan ng pahintulot ng COA Chairperson para muling buksan.

Ibinibala ni Del Campo na kapag nailipat na sa hindi otorisadong opisyal, maaaring magamit ang pondo sa mga gastusing hindi pinapayagan para sa paggasta ng confidential funds.   | sa panulat ni Jordan Gutierrez