HEADLINES

Inatasan ng Department of the Interior and Local Government (DILG) ang mga lokal na pamahalaan na magsagawa ng precautionary measures hinggil sa magiging epekto ng La Nina sa gitna ng COVID-19 pandemic.

Batay sa inilabas ng PAGASA, malaki ang tyansang magkaroon ng La Nina sa Oktubre 2021 hanggang sa unang bahagi ng 2022.

Sinabi ni DILG Secretary Eduardo Año, kailangan tiyakin ng LGU na handa sila sa magiging epekto ng La Nina sa bansa.

Hinihikayat din ni Año ang LGU na makipag-ugnayan sa local health officers para ma-assess ang structural integrity at kapasidad ng mga pasilidad lalo na ang mga evacuation centers, vaccination centers, at ospital para sa COVID-19 cases.

Bukod dito, kailangan din magsagawa ang mga lokal na pamahalaan ng monthly assessment at siguraduhin na maayon ang Early Warning Systems (EWS).

Samantala, pinaalalahanan ng DILG ang LGU na mahigpit na makipag-ugnayan sa iba pang ahensya ng gobyerno tulad ng PAGASA, DENR-MGB, at DOH.

Pumapalo na sa halos 2.5M ang kumpirmadong kaso ng COVID-19 kabilang na ang halos 19,000 o 18,659 na mga bagong kaso ng nasabing virus.

Dahil dito, sinabi ng DOH na nasa 175, 324 na ang active cases ng COVID-19 kung saan 88.1% ang mild, 6.9% ang asymptomatic, 1.5% ang severe at .7% ang critical condition.

Sumipa rin sa mahigit 2.2 million ang total recoveries matapos maitala ang 9, 088 na mga bagong gumaling sa COVID-19.

Nananatili naman sa 37, 405 ang death toll matapos walang ini-report na bagong nasawi ang DOH dahil sa technical issues.

Pinasu-subpoena at pinaaaresto ng senate blue ribbon committee ang mga opisyal ng isa sa mga supplier ng face mask na binili ng gobyerno noong 2020.

Ito ay matapos ipaabot ni panel director General Rodolfo Noel Quinto sa panel na bigo silang maisilbi ang subpoena ad testificandum sa mga opisyal ng greentrends trading international incorporated na sina Raffy Barcina, Andres Aquino, Ryan Escano, Carlos Agustin at Jayson Espino.

Sinabi ni Quimbo na pawang peke ang mga address nina Aquino, Escano at Bacina samantalang wala naman o  hindi naman nag-e-exist ang mga address na ibinigay nina Espino at Agustin.

Hiniling ni senador Richard Gordon bilang chairman ng senate blue ribbon committee, kay senate president Tito Sotto III na mag isyu ng subpoena with warrant of arrest para mapuwersa ang mga nasabing opisyal ng greentrends sa mga susunod pang pagdinig at arestuhin ang mga ito ng office of the sergeant at arms.

Posibleng ianunsyo na ng 1Sambayan ang isasabong nitong presidentiable sa May 2022 elections sa Setyembre 30.

Isang araw ito bago ang pagsisimula ng filing ng COC o Certificate of Candidacy para sa national positions.

Ayon kay retired supreme court justice antonio carpio, convenor ng 1Sambayan, mahigpit ang pag-screen nila sa potential nominees sa tulong ng survey at assessment ng track record ng tao gayundin ang competence, integrity, patriotism at vision o pananaw para sa bansa.

Gayunman sinabi ni Carpio na maaaring lumampas din ng Setyembre 30 ang anunsyo nila sa kanilang the anointed one, depende sa magiging kaganapan pa sa loob ng isang linggo.

Magtutuloy-tuloy aniya ang unity talks nila kahit pa nag-deklara na ng kandidatura sa pagka-presidente ang ilan sa mga personalidad.

Nagsanib-puwersa ang Globe at Quezon City government sa pagbibigay ng internet at digital solutions bilang suporta para suportahan ang mga online na pangangailangan ng mga residente lalo na ang mga mag-aaral.

Bahagi nang ugnayan ng Globe at QC government ang pagpapalawak ng Globe Go-Wifi at Konektayo WiFi gayundin ang paggamit ng SMS API ng Globe labs, school bus Wifi at load up para mapag-igting ang suporta sa mga mag-aaral at guro habang online pa ang mga klase.

Nabatid na dagdag na isanlibong access points ng Go Wifi ang ilalagay sa mga pangunahing establishments sa quezon city upang magamit sa mga piling ospital,  barangay hall, supermarket, mall, istasyon ng pulisya at bombero at coffee shops para sa mas malawak na pag-access sa e-services hub ng QC.

Magiging kaagapay rin ng QC government ang SMS API ng Globe labs sa pagpapadala ng news alert sa mga gumagamit ng e-services hub samantalang ang Konektayo Wifi ay makapagbibigay ng mabilis at ligtas na Wifi sa mga komunidad gaya ng Bistekville 4, Bistekville 15, Sitio Pingkian, Republic Residences, at bagong lipunan pag-asa condominium.

Sa pamamagitan ng mga nasabing serbisyo, makatutulong ang Globe na pabilisin ang paggamit ng teknolohiyang digital sa bansa.  Kinikilala ng Globe ang halaga ng pananatiling konektado ng mga Pilipino lalo na ngayon ang mga serbisyo at oportunidad ay nalipat na sa online.

Natutuwa naman si Quezon City Mayor Joy Belmonte sa tulong ng globe na kailangang-kailangan nila para matiyak na maayos ang magiging takbo ng online classes ng mga estudyante mula sa lungsod.

Ilang linggo nang nagpapatupad ng mas mahigpit na hakbangin kontra COVID-19 ang Baguio City.

Ayon ito kay Baguio City Mayor Benjamin Magalong, bago pa man ianunsyo ng gobyerno ang pagsailalim sa lungsod sa GCQ with heightened restrictions hanggang Setyembre 30.

Ipinabatid ni Magalong na hiniling niya sa National Task Force against COVID-19 at IATF, tatlong linggo na ang nakalilipas na isailalim ang lungsod sa nsabing restriction matapos sumirit ang kaso ng COVID-19 noong Agosto 20.

Sinabi ni Magalong na nasa 3,700 na ang active cases ng lungsod.

Pumapalo na sa 53 ang mga lugar sa Quezon City na nasa ilalim ng granular lockdown dahil sa pagtaas ng kaso ng COVID-19.

Ayon kay Quezon City Mayor Joy Belmonte, nakatatanggap ng food packs at essential kits ang mga pamilyang apektado ng special concern lockdown areas sa lungsod habang naka-quarantine ng 14 days bago isailalim muli sa swab testing.

Samantala, 100% nang okupado ang Quezon City General Hospital, Rosario Maclang Bautista General Hospital at Novaliches District Hospital.

Kasabay nito, umapela ang QC government sa kanilang mga residente na kaagad makipag-ugnayan sa barangay at Epidemiology and Disease Surveillance Unit sakaling kailanganing magpa-admit sa hope facilities.

Lumakas pa ang bagyong may international name na Mindulle habang nasa Silangang bahagi ng Pilipinas.

Ayon sa Pagasa, inaasahang papasok sa bansa ang nasabing bagyo na papangalanang Lannie ngayong darating na araw ng linggo.

Ang  sentro ng nasabing bagyo ay pinakahuling namataan sa layong halos dalawang libong kilometro silangan ng Southern Luzon.

Taglay ng naturang bagyo ang pinakamalakas na hanging umaabot sa 75 kilometers kada oras malapit sa gitna at may pagbugso na umaabot sa 90 kilometro kada oras.

Walang makapapasok na imported na bigas sa bansa ngayong buwan.

Ito ayon kay Agriculture Undersecretary Ariel Cayanan ay dahil harvest season ngayon.

Una nang sinisi ng mga magsasaka ang pagdagsa ng imported rice sa bagsak presyo anilang bentahan ng palay sa ilang lalawigan.

Batay sa monitoring ng Sinag o Samahang Industriya ng Agrikultura, nasa 45 hanggang 50 pesos ang kada kilo ng imported na bigas habang nasa 38 hanggang 40 pesos naman sa lokal na bigas.

Pumalo na sa 38,916 o halos 39,000 na ang bilang ng mga tinamaan ng COVID-19 sa hanay ng Philippine National Police o PNP.

Ayon sa PNP Health Service, ito’y matapos madagdagan ng 144 bagong kaso sa nakalipas na araw kung saan ay aabot sa 2,266 ang aktibonbg kaso.

Gayunman, nakapagtala ang PNP ng 168 na bagong gumaling sa sakit kaya’t pumalo na sa 36, 535 ang total recoveries nito.

Subalit, nadagdagan na naman ng 1 ang bilang ng mga nasawi dahil sa COVID-19 sa hanay ng PNP kaya’t umabot na ito sa 115.