HEADLINES

Posibleng ipaubaya na sa Local Government Units (LGUs) ang pagbubukas ng mga negosyo sa bansa.

Ito ang hiniling ni Deputy Speaker Bernadette Herrera kasabay ng rekomendasyon na tularan ang bansang Singapore sa hakbang na mamuhay ng ligtas sa gitna ng COVID-19 pandemic.

Ayon kay Herrera, dapat pangunahan ng mga alkalde, konsehal at barangay officials ang mabilis at tiyak na pag-aksyon laban sa COVID-19.

Aniya, mas maalam ang mga LGUs sa kanilang mga lugar kung saan maaari silang maglatag ng mga paraan para sa ligtas na pagbubukas ng mga negosyo at pagbabalik sa mga nawalan ng trabaho.

Dagdag ni Herrera, maaari rin magtakda ng standards ang mga LGUs upang pati ang mga small at medium businesses ay makapagbukas na rin ng mga negosyo sa 100%.

Tiwala si Herrera na mas magagawa ito ng mga LGUs ng mas maayos at mas mabilis kumpara sa national government.

Posibleng gamitin ang mga barangay covered court at mga barangay hall para sa botohan sa 2022 National Elections.

Ayon kay Commission on Election Director for Operations Teopisto Elnas, Jr., may direktiba na sa kanilang mga election officers para paluwagin ang mga voting centers.

Dahil dito ay ikinokonsidera ng ahensya ang posibilidad na idaos ang botohan sa mga covered courts ng barangay.

Kasama rin sa ikinokonsiderang lugar para pagbotohan ay dapat may magandang bentilasyon, mas kumbinyente, maluwag, at nakasusunod sa minimum health standards.

Handa ang Commission on Election (COMELEC) sa posibilidad na palawigin pa ng isang linggo ang pagpaparehistro ng mga botante.

Ayon kay COMELEC Spokesman James Jimenez na malaki ang epekto sa trabaho ng COMELEC kung palalawigin ng mas mahaba ang voter registration.

Bukod dito, kinumpirma rin ng ahensya na nalagpasan na nila ang target na 59-M mga botanteng nagparehistro.

Sa kasalukuyan, nasa halos 60-M na ang nakakapagparehistro at kumpiyansa ang COMELEC na tataas pa ang naturang bilang na ito.

Pumalo na sa 38,916 o halos 39,000 na ang bilang ng mga tinamaan ng COVID-19 sa hanay ng Philippine National Police (PNP).

Batay sa tala ng PNP Health Service, nadagdagan ng 144 na bagong kaso sa nakalipas na araw kung saan umabot na sa 2,266 ang aktibong kaso.

Nakapagtala ang PNP ng 168 na bagong gumaling sa sakit kaya’t umabot na sa 36,535 ang total recoveries nito.

Samantala, pumalo na sa 115 ang bilang ng nasawi dahil sa COVID-19 sa hanay ng PNP matapos madagdagan ng 1. —sa ulat ni Jaymark Dagala (Patrol 9)

Inihayag ni Senator Bong Go na posibleng makapagsagawa ng limited face to face classes sa ilang programa sa Higher Education Institutions (HEI).

Ayon kay Go, maaari itong gawin sa mga lugar na nasa ilalim ng Modified General Community Quarantine (MGCQ).

Dagdag ni Go, kailangan lamang sundin ang mga utos at payo ng mga eksperto sa mga paraan para hindi tumaas ang bilang ng hawaan ng virus sa bansa.

Sinabi pa ni Go na sa lahat ng hakbang na ginagawa ng gobyerno ay palagi nilang inuuna ang pagprotekta sa buhay ng mga Pilipino.

Aniya, kailangan lang mayroong malinaw na protocols na magsisilbing gabay sa mga awtoridad sa pagdedesisyon kung paano isasagawa ang limitadong pagbabalik eskuwelahan.

Sumasailalim sa “regular quality  assurance checks” ang lahat ng laboratories na may COVID-19 testing.

Ito ang pagtitiyak ng health department para na rin matiyak ang accuracy ng mga test results.

Ayon kay DOH Undersecretary Maria Rosario Vergeire, nagsasagawa ang Research Institute for Tropical Medicine (RITM) ng quality check sa lahat ng COVID-19 laboratories sa buong bansa.

Dagdag ni Vergeire, regular itong ginagawa upang masiguro ang quality assurance sa mga laboratoryo.

Dahil dito, makikita kung mayroong in-accurancies sa mga resultang inilalabas sa lahat ng laboratory.

Hindi lamang aniya isa kundi lahat ng laboratoryo sa bansa ay kasama sa quality assurance.

Hinimok ng Food and Drug Administration (FDA) ang mga pribadong sektor laban sa mga nagbebenta ng COVID-19 booster shots.

Ayon kay FDA Director-General Eric Domingo, may mga reklamo silang natatanggap hinggil sa mga ospital na nagbebenta ng booster shot.

Dagdag ni Domingo, kailangan pang puntahan ng enforcement unit ang mga naturang ospital upang ipaalala lamang na hindi maaaring ibenta at hindi pwedeng magbakuna na wala sa guidelines ng Department of Health (DOH).

Aniya, hindi rin maaaring tumanggap ng booster shot na mula sa mga pribadong sektor.

Paliwanag ni Domingo, ang maaari lamang bumili ng naturang bakuna ay ang gobyerno.

Sinabi pa ni Domingo na bago payagang bumili ng bakuna ay kailangan munang sumang-ayon sa Tripartite Agreement na susunod sila sa DOH.

Lalo pang bumaba ang COVID-19 reproduction number sa 0.97 sa National Capital Region (NCR).

Ayon kay Dr. Guido David ng OCTA research, mula sa 0.99 nuong nakaraang araw ay nagpapakita na talaga umano ito ng pababang reproduction numbers ng nakakahawang virus sa rehiyon.

Ang reproduction number ay tumutukoy sa dami ng mga hawaang naitatala dulot ng COVID-19.

Ipinabatid pa ni David na nakapagtala ang NCR ng growth rate na negative 22% sa nakalipas na isang linggo kung saan may average na 4,480 cases.

Lumalabas na sa 17 Local Government Unit (LGU) ay mayroong negative 1 na growth rate.

Tiniyak ng Philippine National Police (PNP) na mapapanatili nila ang kapayapaan at kaayusan hanggang sa huling araw ng voters registration.

Ito’y matapos maraming reklamo ang natatanggap ng PNP hinggil sa pagdagsa ng mga magpaparehistro kung saan hindi nasusunod ang social distancing na posibleng maging sanhi ng super spreader event.

Ayon kay PNP Chief Gen. Guillermo Eleazar, pinaalalahanan na ng pamunuan ng PNP ang mga tauhan na tiyaking naipatutupad ang minimum health protocols sa mga voters registration site.

Aniya, mas lalo nilang paiigtingin ang pagpapatupad ng health protocols at mahigpit na paaalalahanan ang mga kapulisan na magkaroon ng sapat na mga tauhan sa mga voter registration site para masiguro na magiging maayos at payapa ang pagpaparehistro ng mga botante.

Magugunitang, nakatakda na ang deadline ng voter registration ng Commission on Elections (COMELEC) sa a-30 ng Setyembre.

Hindi nababahala ang Malakanyang sa pagbaba ng satisfaction rating ni Pangulong Rodrigo Duterte.

Sa pinakahuling survey ng Social Weather Stations (SWS), bumaba sa 75% ang rating ng Pangulo.

Ayon kay Presidential Spokesperson Harry Roque, na wala namang presidente ang hindi bumababa ang satisfaction at trust rating habang malapit na ang halalan.

Maituturing pa rin aniya itong very good sa kabila ng pagbaba ng naturang ratings.

Dagdag ni Roque na natural lamang na ginagawa ng mga kandidato ang ilang paraan para bumaba ang rating ng administrasyon para manalo.

Magugunitang, noong Nobyembre ng nakaraang taon  nakuha ng Pangulo ang pinakamataas na satisfactory rating na pumalo sa 84% sa kabila ng COVID-19 pandemic.