HEADLINES

Posibleng luwagan pa ang quarantine restriction sa Metro Manila matapos ang pilot implementation ng alert level 4 dito hanggang Setyembre 30.

Ayon kay MMDA chairman Benhur Abalos uubrang isailalim sa alert level 3 ang NCR kapag umayos na ang sitwasyon sa COVID-19 sa ikalawang linggo nang pagpapatupad ng alert level 4.

Tinukoy ni Abalos ang report ng OCTA research group kung saan naitala sa 1.9 ang reproduction number sa NCR noong Agosot  8, naging 1.39 nang Setyembre  4 at 1.03 ng Setyembre 22 na patunay aniya nang pagbaba ng kaso ng COVID-19 matapos ding mag-negatibo ang growth rate sa unang linggo nang pagsailalim sa alert level 4 ng Metro Manila.

Kumbinsido si Retired Supreme Court Associate Justice Antonio Carpio na tatakbo sa 2022 Presidential Elections si Davao City Mayor Sara Duterte-Carpio.

Sinabi ni Carpio na mayruong pahiwatig na si Dating Senador Ferdinand Bongbong Marcos ang magiging bise presidente ni Mayor Duterte.

Naniniwala si Carpio na ang tambalang Mayor Sara at Bongbong ang pinakamatibay na tandem ng administrasyon base na rin sa resulta ng mga survey.

Pabor ang Management Association of the Philippines (MAP) na mabawasan ang quarantine period ng fully vaccinated travelers.

Ayon kay MAP President Aurelio Montinola, III limang araw na lang dapat sa halip na sampung araw ang pagsailalim sa quarantine ng fully vaccinated tourist para mapalakas ang industriya ng turismo.

Tinukoy ni Montinola ang pagluluwag ng ibang bansa ng travel restrictions tulad nang pagbabawas ng quarantine period at no quarantine na sa mga fully vaccinated.

Mayroon na rin aniyang ilang airline companies ang nagsulong na mabawasan ang quarantine priod ng fully vaccinated para makagalaw na rin anila ang ekonomiya ng bansa.

Tinututukan ng DOH ang pag revise sa face shield policy.

Ayon ito kay Health Undersecretary Maria Rosario Vergeire, matapos aprubahan ng Pangulong Rodrigo Duterte ang rekomendasyon ng DOH technical advisory group na limitahan lamang sa high risk activities sa ilalim ng 3C’s o Closed, Crowded at Close Contact ang paggamit ng faceshields.

Una nang ipinag-utos noon ng Pangulo ang hindi na pagsusuot ng faceshield subalit nagbago ang isip matapos bumulaga ang Delta variant ng Coronavirus.

Ituturing nang APOR ang mga empleyado ng COMELEC gayundin ang mga maghahain ng Certificate of Candidacy (COC) para sa 2022 National Elections.

Ayon ito kay Presidential Spokesman Harry Roque matapos aprubahan ng IATF ang pagsasama sa lahat ng COMELEC officials at employees sa listahan ng APOR.

Ang filing ng COC ay itinakda mula Oktubre 1 hanggang 8.

Kasabay nito, ipinabatid ni Roque na ang mga kalahok sa WHO Solidarity Trial para sa COVID-19 vaccines tulad ng researchers, workers, members at affiliate staff ng solidatiry trial vaccines team gayundin ang health workers ay papayagan sa interzonal at intrazonal movement, anupaman ang maging community  quarantine classification at ipinatutupad na granular lockdowns.

Pumapalo na sa halos 2.5-M ang kumpirmadong kaso ng COVID-19 kabilang na ang halos 19,000 o 18,659 na mga bagong kaso ng nasabing virus.

Dahil dito, sinabi ng DOH na nasa 175,324 na ang active cases ng COVID-19 kung saan 88.1% ang mild, 6.9% ang asymptomatic, 1.5%  ang severe at .7% ang critical condition.

Sumipa rin sa mahigit 2.2-M ang total recoveries matapos maitala ang 9,088 na mga bagong gumaling sa COVID-19.

Nananatili naman sa 37,405 ang death toll matapos walang ini-report na bagong nasawi ang DOH dahil sa technical issues.

Pinasu subpoena at pinaaaresto ng Senate Blue Ribbon Committee ang mga opisyal ng isa sa mga supplier ng face mask na binili ng gobyerno nuong 2020.

Ito ay matapos ipaabot ni Panel Director General Rodolfo Noel Quinto sa panel na bigo silang maisilbi ang Subpoena Ad Testificandum sa mga opisyal ng Greentrends Trading International Incorporated na sina Raffy Barcina, Andres Aquino, Ryan Escano, Carlos Agustin at Jayson Espino.

Sinabi ni Quimbo na pawang peke ang mga address nina Aquino, Escano at Bacina samantalang wala naman o  hindi naman nageexist ang mga address na ibinigay nina Espino at Agustin.

Hiniling ni Senador Richard Gordon bilang Chairman ng Senate Blue Ribbon Committee, kay Senate President Tito Sotto na mag isyu ng Subpoena with Warrant of Arrest para mapuwersa ang mga nasabing opisyal ng Greentrends sa mga susunod pang pagdinig at arestuhin ang mga ito ng Office of the Sergeant at Arms.

Posibleng ianunsyo na ng 1Sambayan ang isasabong nitong presidentiable sa May 2022 Elections sa Setyembre 30.

Isang araw ito bago ang pagsisimula ng filing ng Certificate of Candidacy (COC) para sa national positions.

Ayon kay Retired Supreme Court Justice Antonio Carpio, Convenor ng 1Sambayan, mahigpit ang pag screen nila sa potential nominees sa tulong ng survey at assessment ng track record ng tao gayundin ang competence, integrity, patriotism at vision o pananaw para sa bansa.

Gayunman sinabi ni Carpio na maaaring lumampas din ng Setyembre 30 ang anunsyo nila sa kanilang The Anointed One, depende sa magiging kaganapan pa sa loob ng isang linggo.

Magtutuluy-tuloy aniya ang unity talks nila kahit pa nag deklara na ng kandidatura sa pagka-presidente ang ilan sa mga personalidad.

Magsasagawa ng hakbang ang Commission on Election (COMELEC) hinggil sa posibilidad na magkaroon ng vote buying sa 2022 National Election sa pamamagitan ng teknolohiya.

Ayon kay COMELEC Spokesperson James Jimenez, kabilang sa kanilang kinausap ay ang Gcash upang mamonitor kung mayroong magaganap na kahina-hinalang transaksyon.

Kasama na rito ang mga accounts na babagsakan ng malaking pondo at makikitang maglilipat ng maliliit na halaga sa ibang account, ilang araw bago ang araw ng botohan.

Dahil dito, sisikapin ng ahensya na tugunan ang patagong anomalya tuwing botohan sa pamamagitan ng binuong “task force kontra bigay”.

Maliban dito, nakikipag-ugnayan na rin ang COMELEC sa mga courier service na posibleng magamit sa iligal na transaksyon sa eleksyon.