HEADLINES

Nakikipag-ugnayan na ang Commission on Elections (COMELEC) sa Armed Forces of the Philippines (AFP) at Philippine National Police (PNP).

Ito’y para mapaghandaan nang maaga at mahadlangan ang posibleng karahasan sa 2022 National Elections.

Binigyang diin ng COMELEC na ang poll body ay may otoridad na magpatupad ng mga hakbangin sakaling may magtangkang gumawa ng gulo sa halalan sa susunod na taon.

Kabilang dito ang pagsasailalim sa COMELEC control sa mga lugar na may kaguluhan dahil sa eleksyon

Magugunitang, nanawagan si Pangulong Duterte na magkaroon ng mapayapa at maayos na halalan.

Nanawagan ang Philippine General Hospital (PGH) ng donasyon ng dugo.

Ito’y dahil nasa “critical level” na ang suplay ng dugo ng kanilang ospital.

Batay sa facebook post ng PGH, hinihikayat nila ang voluntary, non-remunerated, non-predeposit at non-replacement donors.

Bukas ang tanggapan ng PGH blood donor center tuwing Lunes hanggang Linggo, mula alas otso ng umaga hanggang alas kwatro ng hapon.

Bukod dito, tumatanggap rin ang PGH ng walk-ins mula alas otso hanggang alas dos ng hapon.

Bahagyang bumagal ang pagtaas ng kaso ng COVID-19 sa bansa sa nakalipas na linggo.

Ayon ito kay Health Undersecretary Maria Rosario Vergeire  bagama’t nakikita nilang dahil ito sa hindi kaagad na interpret na data bunsod nang nabawasan ding test output mula sa mga laboratory.

Dahil dito, muling ipinabatid ni Vergeire na tinututukan nila ang pagbaba ng bilang ng COVID-19 tests na isinagawa ng mga laboratoryo sa bansa.

Isa aniya sa mga factor na iniimbestigahan nila ay ang paggamit ng antigen COVID-19 tests sa halip na RT-PCR tests.

Sinabi ni Vergeire na ilang ospital, doktor at maging mga bahay ay gumagamit ng antigen COVID-19 tests na ang resulta ay dapat inire-report aniya sa local government.

Isinailalim sa lockdown ngayong weekend hanggang sa Lunes ng alas-4 ng madaling araw, ang Naga City para maiwasan ang pagkalat pa ng COVID-19 sa lungsod.

Dahil dito, hinigpitan pa ang seguridad sa border control points sa lungsod kung saan mahigpit na sinusuri ng awtoridad ang laman ng kada sasakyan kung sumusunod sa health and safety protocols at kung APOR ang mga ito.

Ang Naga City ay nakapagtala ng 603 active COVID-19 cases.

Muling tatakbong kongresista ng ikalawang distrito ng Pampanga ang dating Pangulong Gloria Macapagal Arroyo.

Kinumpirma ito mismo ng anak ng dating pangulo at kasalukuyang second district congressman Juan Miguel Mikey Arroyo.

Ang dating pangulong Arroyo ay kauna-unahang babaeng Speaker of the House mula 2018 hanggang 2019, kapalit ng nuo’y speaker Pantaleon Alvarez.

Ang dating pangulo ay nakatapos din ng tatlong termino bilang kinatawan ng second district ng Pampanga.

Nakipagsanib-puwersa ang isang grupo ng hotels at resorts sa DOT, TRB at isentia para palakasin pa ang ligtas na pagbibiyahe ng mga Pilipino sa gitna ng pandemya.

Ayon kay Benjie Martinez, pangulo ng HSMA o Hotel Sales and Marketing Association, kumikilos na sila para magbigay rin  ng mga bagong karanasan sa mga biyahero upang mai-promote pa ang turismo kahit may pandemya.

Ang kanila aniyang mga hakbangin ay umiikot sa temang Go Safe, Go Tour:  Walk And Talk With Us na ikalawang season ng GPSTV na nasa official facebook at YouTube accounts.

Binigyang-diin ng HSMA na ang tourism industry na binubuo ng 12.8% ng national GDP ay excited na sa new travel normal.

Inalmahan ng St. Lukes Medical Center Global City Employees Union ang panukala ng DOH kaugnay sa singular allowance na ang halaga ay ibabase sa risk exposure ng health workers sa COVID-19 patients.

Sa halip, binigyang-diin ni Benjie Foscalbo, secretary ng unyon na sinusuportahan nila ang tatlong panukala sa senado na humihiling ng universal o iisang benepisyo para sa healthcare workers na nagsisilbi bilang COVID-19 pandemic frontliners.

Nakasaad sa mga nasabing senate bills ang mas maraming inclusive benefits system para sa public at private healthcare workers na direkta o hindi direktang na-expose sa mga pasyente ng COVID-19, pagbibigay sa kanila ng buwanang risk allowances, aktuwal na hazard duty pay para sa lahat ng health workers na nagsisilbing frontliners, accommodations, transportation at meal gayundin ng life insurance.

Ipinabatid ni Foscalbo na hindi makatuwiran ang nasabing panukala ng DOH na pag-kategorya sa healthcare workers bilang low risk, medium risk at high risk.

Pumapalo na sa 138,000 digital COVID-19 vaccine certificates ang naipamahagi na ng gobyerno.

Ang nasabing bilang, ayon kay DICT undersecretary Manny Caintic ay mahigit sa kalahati ng 225,000 request na kanilang natanggap sa buong bansa para sa vaccine certificates.

Ang VaxCertPh ay una nang inilunsad sa NCR at Baguio City kung saan itinayo ang mga booth para sa kaukulang document correction.

Ngayong linggong ito ay itinayo ang mga booth sa Central Luzon, Calabarzon, Metro Cebu at Davao Region para sa pilot roll out ng VaxCertPh.

Patay ang isang kadete ng PNPA matapos limang beses umanong pagsusuntukin sa tiyan ng kanyang upperclassman.

Kinilala ng Silang Police ang biktima na si Cadet Third Class George Carl Magsayo, 21 anyos at mula sa Pagadian City.

Ayon sa awtoridad, binalaan umano  ni cadet second class Steve Ceasar Maingat ang biktima at kasamahan nito nang magtungo sa kuwarto ng suspek, subalit makalipas ang ilang minuto ay pinagsusuntok na nito ang biktima sa tiyan.

Si Magsayo ay nawalan ng malay at isinugod sa ospital, subalit idineklarang dead on arrival alas-7 ng gabi ng Setyembre 23 kung kailan naganap ang panununtok.

Ang pagkamatay ni Magsayo ay kinumpirma mismo ng pamunuan ng PNPA na iginigiit ang No to Hazing Policy at pagpapahalaga sa buhay at karapatang pantao na itinuturo sa mga kadete at personnel.