HEADLINES

Pumapalo na sa 53 ang mga lugar sa Quezon City na nasa ilalim ng granular lockdown dahil sa pagtaas ng kaso ng COVID-19.

Ayon kay Quezon City Mayor Joy Belmonte, nakatatanggap ng food packs at essential kits ang mga pamilyang apektado ng special concern lockdown areas sa lungsod habang naka-quarantine ng 14 days bago isailalim muli sa swab testing.

Samantala, 100% nang okupado ang Quezon City General Hospital, Rosario Maclang Bautista General Hospital at Novaliches District Hospital.

Kasabay nito, umapela ang QC government sa kanilang mga residente na kaagad makipag-ugnayan sa barangay at Epidemiology and Disease Surveillance Unit sakaling kailanganing magpa-admit sa hope facilities.

Lumakas pa ang bagyong may international name na Mindulle habang nasa Silangang bahagi ng Pilipinas.

Ayon sa Pagasa, inaasahang papasok sa bansa ang nasabing bagyo na papangalanang Lannie ngayong darating na araw ng linggo.

Ang  sentro ng nasabing bagyo ay pinakahuling namataan sa layong halos dalawang libong kilometro silangan ng Southern Luzon.

Taglay ng naturang bagyo ang pinakamalakas na hanging umaabot sa 75 kilometers kada oras malapit sa gitna at may pagbugso na umaabot sa 90 kilometro kada oras.

Walang makapapasok na imported na bigas sa bansa ngayong buwan.

Ito ayon kay Agriculture Undersecretary Ariel Cayanan ay dahil harvest season ngayon.

Una nang sinisi ng mga magsasaka ang pagdagsa ng imported rice sa bagsak presyo anilang bentahan ng palay sa ilang lalawigan.

Batay sa monitoring ng Sinag o Samahang Industriya ng Agrikultura, nasa 45 hanggang 50 pesos ang kada kilo ng imported na bigas habang nasa 38 hanggang 40 pesos naman sa lokal na bigas.

Pumalo na sa 38,916 o halos 39,000 na ang bilang ng mga tinamaan ng COVID-19 sa hanay ng Philippine National Police o PNP.

Ayon sa PNP Health Service, ito’y matapos madagdagan ng 144 bagong kaso sa nakalipas na araw kung saan ay aabot sa 2,266 ang aktibonbg kaso.

Gayunman, nakapagtala ang PNP ng 168 na bagong gumaling sa sakit kaya’t pumalo na sa 36, 535 ang total recoveries nito.

Subalit, nadagdagan na naman ng 1 ang bilang ng mga nasawi dahil sa COVID-19 sa hanay ng PNP kaya’t umabot na ito sa 115.

Nasawi ang isang tanod makaraang rumesponde sa magkapatid na nag-aaway sa Sta. Barbara, Pangasinan.

Ayon sa ulat, nagtamo ng saksak sa dibdib ang biktima na kinilalang si Manny Dela Peña, 50-anyos, at residente ng Barangay Matic-Matic.

Batay sa imbestigasyon, pauwi na sa sana si Dela Penia nang awatin niya ang lasing na suspek na si Jeffrey Gloria at kapatid nito.

Sa ngayon ay nakakulong na ang suspek. — sa panulat ni Hya Ludivico. 

Walo ang nadagdag sa bilang ng mga nasawi sa COVID-19 sa lalawigan ng bohol dahilan para umabot na sa 422 ang kabuuang bilang nito.

Batay sa datos mula sa emergency operations center ng Bohol Inter-Agency Task Force o BIATF, mula September 16 hanggang 23 ay may 50 naitalang nasawi dahil sa nasabing sakit.

Mayroon namang 2,116 active cases kung saan nananatiling pataas ang trend ng COVID-19 cases sa lalawigan.

Bukod dito, mataas rin ang occupancy rate ng ospital sa probinsya kung saan nasa moderate hanggang critical risk na ito.

Kaugnay nito, hinihikayat naman ng health authorities ang publiko na patuloy na sundin ang Covid-related health protocols. — sa panulat ni Hya Ludivico. 

Dumating sa Pilipinas ang karagdagang 806,103 doses ng Pfizer COVID-19 vaccine nitong Huwebes ng gabi.

Lumapag sa Ninoy Aquino International Airport Terminal 3, ang Air Hong Kong flight LD 456, na may dala ng mahigit 800,000 doses ng bakuna.

Matapos ang seremonyas ay dinala ang mga ito sa isang pribadong cold storage facility bago ipamahagi ng DOH sa NCR at mga karatig-probinsya. — sa panulat ni Hya Ludivico. 

Inihayag ng Bangko Sentral ng Pilipinas (BSP) na nakabawi ang OFW remittances ngayong taon kahit may pandemya.

Ayon sa BSP, ang OFW remittances sa unang apat na buwan ng 2021 ay pumalo sa 11 billion dollars o 5.1% na mas mataas kumpara sa 10.49 billion dollars noong unang apat na buwan ng nakalipas na taon.

Nanatiling matatag rin ang global remittances sa kabila ng lockdowns partikular sa Gitnang Silangan, Estados Unidos, Europa at iba pang mga bansa. Bumaba lamang ng 2.4% ang OFW remittances noong isang taon kung saan mula 719 billion dollars noong 2019 ay bumaba ito sa 702 billion dollars.

Sa pagtaya ng BSP, posible ang 4% growth sa remittance mula sa OFWs ngayong taon. — sa panulat ni Hya Ludivico.

Muling pinaalalahanan ng pamunuan ng Philippine National Police o PNP ang mga tauhan nito na tiyaking nasusunod pa rin ang health protocols sa mga voters registration site.

Ito’y ayon kay PNP Chief P/Gen. Guillermo Eleazar, isang linggo bago ang deadline para sa voters registration na itinakda ng Commission on Elections o COMELEC sa Setyembre a-30.

Nakarating sa PNP Chief ang mga reklamo hinggil sa dagsa ng mga nagnanais magparehistro kung saan ay hindi na nasusunod ang physical distancing na posibleng maging dahilan ng super spreader event.

Asahan na aniya ito lalo’t papalapit na ang deadline at tiyak maraming hahabol kaya’t mahigpit niyang binilinan ang mga pulis na magpakalat ng sapat na tauhan para siguruhing magiging maayos at mapayapa ang registration hanggang sa huli.

Binigyang diin ni Eleazar na mahalaga ang pagpaparehistro ngayong nalalapit na ang Eleksyon 2022 subalit mas mahalaga pa rin aniya ang buhay na maaaring masayang kung pababayaan ang sarili mula sa COVID-19.