HEADLINES

Ipagpapatuloy na ng Meralco ang putulan ng kuryente sa mga kabahayan sa Metro Manila na hindi pa nakakabayad, maliban na lang sa mga lugar nasa ilalim ng granular lockdown.

Ayon sa Meralco, simula sa susunod na linggo ay magpapadala na sila ng disconnection notice para sa mga may overdue na bill.

Simula September 16 ay isinailalim ang Metro Manila sa alert level 4 kaya’t pinayagan na ang operasyon ng ilan pang negosyo.

Samantala, suspendido pa rin ang disconnection activities sa Bulacan, Cavite, Laguna, Rizal at Lucena City, Quezon hanggang September 30 dahil pawang nasa ilalim ng Modified Enhanced Community Quarantine ang mga nasabing lugar. — sa panulat ni Drew Nacino. 

Nagkukulang na ng mga healthcare worker ang Pilipinas sa gitna ng COVID-19 pandemic.

Ito ang inamin ng Department of Health sa pagharap sa congressional inquiry hinggil sa annual deployment cap ng healthcare workers.

Ayon kay DOH Assistant Secretary Kenneth Ronquillo, kulang ng 92,000 doktor at 44,000 nurse ang bansa.

Bukod pa anya ito sa shortage ng medical technologist na aabot sa 19,000; pharmacists, 14,000; radiologic technicians at radiologic technologists, 17,000.

Ang mga nasabing bilang ay batay sa datos ng Department of Labor and Employment.

Nito lamang Hunyo ay itinaas ng gobyerno ang quota para sa bilang ng mga health worker na idedeploy sa ibayong dagat na 5,000 hanggang 6,000.  — sa panulat ni Drew Nacino. 

Patay ang 18-anyos na dalagita matapos tamaan ng bala ng “sumpak” sa naganap na riot ng dalawang grupo ng kabataan sa Tondo, Maynila.

Kinilala ang biktima na si Felyn Pelingon, grade 7 student.

Ayon sa ulat, nakikipaglamay ang biktima sa lugar na malapit sa pinangyarihan ng riot.

Apat na lalaki ang naaresto kung saan tatlo sa kanila ay menor de edad habang 18-anyos naman ang isa.

Nakuha rin sa mga ito ang isang sumpak.—sa panulat ni Hya Ludivico

Kinumpirma ni Silay City Mayor Mark Golez na nagpositibo siya sa COVID-19.

Ayon sa Alkalde, fully vaccinated na siya at nakararanas lamang ng mild symptoms.

Pinaalalahanan naman ni Golez ang mga residente na maging maingat at sundin ang health protocols na itinakda ng pamahalaan.

Si Golez ang ikatlong Alkalde na tinamaan ng virus sa lalawigan ng Negros Occidental.

Nitong Martes nang ihayag rin ni Talisay City Mayor  Neil Lizares III na nagpositibo siya sa virus at linggo naman ng i-anunsyo ni Kabankalan City Mayor Pedro Zayco Jr., na tinamaan siya ng COVID-19.—sa panulat ni Hya Ludivico

Naghahanda na ang Department Of Health, Commission on Higher Education at mga paaralan kaugnay sa planong patulungin sa pagbabakuna kontra COVID-19 ang mga graduating medicine at nursing student, at maging ang mga post-graduate medicine intern.

Nilinaw naman ng gobyerno na boluntaryo ito at kailangang may consent ng estudyante at magulang.

Sinabi ni CHED Executive Director Cinderella Jaro na mahalagang fully vaccinated na ang volunteer at magdeklara kung may comorbidity.

Aniya, kung ano ipinaiiral na safety measures ng LGU’s sa kanilang health workers ay gayundin ang ipatutupad sa mga estudyante.

Maaaring tumao sa registration, magsilbing vaccinator at health screener, o mag-monitor ng post-vaccination area na may supervision ng doktor o nurse, ang mga magboboluntaryong estudyante.

Hindi naman obligado ang LGUs na magbigay ng allowance ngunit hinimok ang mga ito na magbigay ng pagkain at tumulong sa transportasyon ng volunteers.—sa panulat ni Hya Ludivico

Nagsisilbing quarantine facility ang karamihan sa mga hotel sa Metro Manila.

Ayon kay Tourism Secretary Berna Romulo-Puyat, nasa 600 hotel sa NCR ang ginagamit bilang quarantine facilities ng mga umuuwing Overseas Filipino Workers o Ofw at ng iba pang kinakailangang sumailalim sa mandatory quarantine.

Sinabi naman ni DOT-NCR Regional Director Woodrow Maquiling Jr., na halos 600 hotels din sa rehiyon ang nagsisilbi namang isolation facilities ng gobyerno.

Inihayag naman ng DOT sa pagdinig sa kamara sa panukalang 2022 budget ng ahensya na may mga nagsara nang hotel sa bansa dahil hindi na kaya ang gastos sa kanilang operasyon.

Ayon kay Puyat, ang Marco Polo Hotel sa Davao City at Makati Shangri-La Hotel pa lamang ang naisapubliko na pansamantalang magsasara.—sa panulat ni Hya Ludivico

Aabot sa 208,649 ang bilang mga Pilipinong nakapag-apply sa National Digital Vaccine Certificate o Vaxcertph.

Ayon kay Presidential Spokesperson Secretary Harry Roque, sa nasabing bilang, 127,252 ang nakakuha ng certificate; 77,918 ang no-record found at 3,479 ang may incorrect record details.

Sa region 3, 4, Metro Cebu, at Metro Davao ay umabot na sa 57,828 ang nakapag-apply kung saan 34,699 ang generated; 20,956 ang no-record found at 1,001 ang incorrect record details.

Sa ngayon, hindi pa tiyak ang petsa kung kailan mailulunsad ang vaxcertph sa buong bansa.—sa panulat ni Hya Ludivico

Bahagyang nadagdagan ang bilang ng mga Pilipino na nade-deploy sa ibayong dagat upang magtrabaho.

Ayon sa Philippine Overseas Employment Administration, tinatayang 30,000 kada buwan ang deployment ng land-based overseas filipino worker habang 40,000 ang sea-based.

Kalahati o nasa 50% na itong karaniwang deployment bago sumiklab ang COVID-19 pandemic.

Magugunitang 70% ang ibinagsak ng mga oportunidad sa ibang bansa para sa mga OFW.

Kabilang sa in-demand na trabaho para sa mga Pinoy ang pagiging health care worker sa UK, Germany, Saudi, Qatar at Kuwait.

Samantala, tuloy pa rin ang deployment ng mga Pinoy seafarer sa mga cargo vessel habang nabuhay na ang demand sa cruise ship.—sa panulat ni Drew Nacino