HEADLINES

Tutol ang Department Of Health (DOH) na ibaba sa level 3 ang alert level sa National Capital Region sa kabila ng pagbaba ng COVID-19 cases.

Ayon sa DOH, noon lamang isang linggo sinimulan ang pilot implementation ng bagong alert level system at masyado pang premature kung ibababa ito sa level 3 mula sa kasalukuyang level 4.

Tumataas pa rin anila ang cases sa NCR pero bumagal lamang ang hawaan base sa positive growth rates at average daily attack rates na iniulat sa mga nakalipas na linggo.

Iginiit ng kagawaran na hindi pa dapat magpaka-kampante ang publiko dahil kahit marami na ang nabakunahan aynananatiling banta ang COVID-19.—sa panulat ni Drew Nacino

Isa na namang centenarian ang pumanaw nang hindi pa natatanggap ang P100,000 cash gift mula sa gobyerno alinsunod sa Centenarians Act of 2016.

Kinilala ang Centanarian na si Ignacio Ramos,101 residente ng Rosario, Batangas na pumanaw noong Setyembre 15.

Ayon kay Anacleto, kumpleto naman ang mga requirements ng kanyang Tatay pero nabigo ang Department of Social Welfare and Development na ibigay kay Lolo Ignacio ang cash gift.

Marami anyang requirement at napakahaba ng proseso ang pinagdaanan bago niya nakumpleto ang requirement noong marso.

Samantala, inamin ni DSWD spokesperson, Assistant Secretary Glenda Relova na hindi napabilang ang nakatatandang Ramos sa listahan ng nakatanggap ng cash gift noong isang taon at kailangan pa ng dagdag pondo.

Nangako naman si Relova na kanilang ipagkakaloob sa pamilya ni ramos ang P100,000 cash gift sa elderly Filipino week sa Oktubre.—sa panulat ni Drew Nacino

Kinondena ng Bangsamoro parliament ang serye ng karahasan sa Marawi City, Lanao Del Sur at bayan ng Datu Piang, Maguindanao, kung saan ilang buhay ang nawala.

Nanawagan na ang parliyamento sa Office of the Chief Minister maging sa mga constituent local government na bumuo na ng plano upang maprotektahan ang karapatan ng mga biktima.

Hinimok din ang Ministries of Education, local government, public order at safety, at Bangsamoro Human Rights Commission na saklolohan ang mga biktima at bigyang katarungan ang mga ito.

Setyembre 14 nang pagbabarilin ng riding-in-tandem ang mga estudyante ng Mindanao State University-Marawi Campus na sina Hamza Rauf at Omar Zinal habang patungo sa kanilang boarding house.

Noon namang Setyembre 18, isang bomba ang sumabog sa covered court sa Datu Piang na ikinamatay ng isang LGBT member at ikinasugat ng pitong iba pa na sinundan ng isa pang insidente ng pagpatay sa isa ring miyembro ng LGBT.—sa panulat ni Drew Nacino

Isang alyansa ang binuo sa pagitan ng PDP-Laban faction na pinangungunahan ni Energy Secretary Alfonso Cusi at Pederalismo ng Dugong Dakilang Samahan o PDDS.

Ang PDDS na itinatag noong 2019, ay pinangungunahan ni Presidential Anti-Corruption Commission Chairman Greco Belgica.

Ayon kay Cusi, magkatulad ang prinsipyo at ideyolohiya nila ng PDDS na isulong ang pagpapaunlad ng bansa.

Inihayag naman ni Belgica na inorganisa ang PDDS upang ipagpatuloy ang mga layunin ni Pangulong Rodrigo Duterte sa sandaling matapos ang termino nito.

Binuo ang nabanggit na alyansa sa gitna ng hidwaan ng PDP-Laban Cusi wing sa paksyon nina Senators Manny Pacquiao at Koko Pimentel.—sa panulat ni Drew Nacino

Ipinagpaliban ng kamara ang deliberasyon ng 2022 proposed budget ng Presidential Communications Operations Office o PCOO.

Ito’y makaraang maghayag ng pangamba si Gabriela Partylist Rep. Arlene Brosas na maaaring gamitin sa pagpapakalat ng fake news at red-tagging laban sa ilang indibiduwal ang pondo.

Kinuwestyon din ni Brosas ang PCOO hinggil sa mahigit 300 contract of service personnel na ini-hire noong isang taon.

Aminado naman ang PCOO kinulang sila sa manpower kaya’t nag-hire ng mga contract service personnel.

Aabot sa P2 bilyon ang panukalang budget ng PCOO sa susunod na taon.—sa panulat ni Drew Nacino

Ibinunyag ng ilang Alternative Media Outlets na natunton mula sa Philippine Army ang mga cyber attack na naranasan ng kanilang websites noong Mayo hanggang Hunyo.

Ayon sa bulatlat, karapatan at altermidya, kinumpirma ito sa kanila ng Computer Emergency Response Team ng Department of Information and Communications Technology.

Nagmula anila ang cyberattacks sa isang IP address na naka-assign sa army.

Gayunman, itinanggi nito ng Armed Forces of the Philippines sa halip ay iginiit ang pagkakaroon nila ng press freedom.

Samantala, aminado naman ang mga nabanggit na alternative media outlet na inilabas nila ang naturang impormasyon bilang babala sa publiko.—sa panulat ni Drew Nacino

Hawak na ng Commission on Elections ang final software na gagamitin sa 2022 national and local elections.

Kinumpirma ni COMELEC Commissioner Marlon Casquejo na noon pang Setyembre 16 sa kanila itinurn-over ng smartmatic ang software.

Sa kanyang pagharap sa Joint Congressional Oversight Committee on the Automated Election System, inihayag ni casquejo na sisimulan nila sa Oktubre ang local source code review.

Noong Mayo lamang ay inanunsyo ng COMELEC na ini-award nito sa smartmaticat local partner na SMMT-TMI 2016 ang P402.7 milyon na kontrata para sa gagamiting election software sa susunod na taon.—sa panulat ni Drew Nacino