HEADLINES

Sumampa na sa siyam na madre ang namatay dahil sa COVID-19 sa Religious of the Virgin Mary Convent, sa Quezon City.

Pawang nasa edad 79 hanggang 98 na may comorbidities ang mga madreng binawian ng buhay sa nabanggit na kombento.

Kabilang ang mga ito sa 62 nagpositibo habang dalawa na ang nakarekober at 51 pa ang nagpapagaling.

Patuloy na nakikipag-ugnayan ang kongregasyon sa Quezon City Epidemiology and Surveillance Unit upang matutukan ang sitwasyon ng mga nagpositibo.—sa panulat ni Drew Nacino

Mas mabilis nang kumalat at humalo sa hangin ang COVID-19 virus dahil sa ibang variant nito, batay sa pinakabagong pag-aaral sa US.

Napag-alaman ng mga researcher sa University of Maryland School of Public Health na nakapag-a-ambag ng 43 hanggang 100 beses na virus sa hangin ang mga pasyenteng may Alpha variant.

Kumpara ito mga taong mayroong orihinal na variant ng naturang virus.

Isa sa mga mabisang paraan ang mas maayos na ventilation at pagsusuot ng mas masikip na face masks bukod pa sa bakuna.—sa panulat ni Drew Nacino

Rekomendasyon pa lamang ang planong pagbabakuna sa mga kabataan sa kalagitnaan ng Oktubre.

Ito ang nilinaw ni Presidential Spokesperson Harry Roque matapos tanungin kung aprubado na ni Pangulong Rodrigo Duterte ang pagbabakuna sa mga 12-17 anyos.

Aniya, tatalakayin pa Inter-Agency Task Force o IATF ang nasabing rekomendasyon.

Naniniwala si Roque na sakaling maaprubahan ang plano, ay kakayanin ng gobyerno na maisakatuparan ito.

Aniya, patuloy ang pagdating ng mga bakuna sa bansa, dahil sa pagbili ng pamahalaan ng COVID-19 vaccines sa iba’t ibang vaccine manufacturers.—sa panulat ni Hyacinth Ludivico

Umabot na sa 34, 053 ang kabuuang bilang ng mga kaso ng COVID-19 sa Bicol matapos itong madagdagan ng 534 mga bagong kaso.

Pinakamaraming naitalang bagong kaso sa Camarines Sur na may 193;  138 sa Masbate; 95 sa Albay; 43 sa Camarines Norte; 33 sa Sorsogon; at 32 sa Catanduanes.

Nakapagtala naman ng 210 na mga bagong gumaling sa nasabing sakit kung kaya’t sumampa na sa 23,059 ang total recoveries.

Sumampa naman sa 1,055 ang death toll matapos itong madagdagan ng tatlong panibagong nasawi kung saan dalaw dito ay mula sa Sorsogon habang ang isa naman ay mula sa Camarines Norte.—sa panulat ni Hyacinth Ludivico

Aabot sa 103 bangkay sa Southern Philippines Medical Center sa Davao City ang hindi pa nakukuha kung saan karamihan sa mga ito ay COVID-19 patients.

Dahil dito, nanawagan na ang pamunuan ng ospital sa mga kaanak ng mga nasawing pasyente na kunin na ngang mga ito sa kanilang morgue o di kaya’y magpadala ng kahit mga kinatawan lamang upang mailibing na ang mga bangkay.

Kaugnay nito, sinabi ni Davao City Mayor Sara Duterte na mayroong nag-donate ng 40 foot refrigerated container van na maaaring paglagyan ng mga bangkay.—sa panulat ni Hyacinth Ludivico

Nasabat ng pinagsanib na pwersa ng Philippine National Police at Philippine Drug Enforcement Agency ang P13.6 milyon halaga ng shabu sa ikinasang buy bust operation sa Barangay Buanza, Indanan, Sulu.

Nadakip ng mga otoridad ang umanoy drug dealer na si Yahiya kadjuri na nahaharap sa kasong paglabag sa Republic Act 9165 o Dangerous Drugs Act of 2002.

Ngunit nakatakas naman ang dalawang sinasabing kasabwat ni Kadjuri na kinilalang sina Nurdalyn Sang at Tua Putol.

Agad namang ipinag-utos ni PNP Chief Police General Guillermo Eleazar ang pagtugis sa dalawa.—sa panulat ni Hya Ludivico

Ilalagay sa General Community Quarantine o GCQ with heightened restrictions ang Abra, Baguio City, at Bohol simula ngayong araw, Setyembre 24 hanggang 30, habang ang Ilocos Norte naman ay isasailalim sa GCQ.

Ayon kay Presidential Spokesperson Harry Roque, habang nasa GCQ with Heightened Restrictions ang nabanggit na mga lugar, ang indoor dine-in services ay maaaring mag-operate ng hanggang 20% venue o seating capacity, habang ang al-fresco o outdoor dine-in services naman ay papayagang makapag-operate ng hanggang 50% ng venue o seating capacity.

Ang mga beauty salons, beauty parlors, barbershops, nail spas at outdoor tourist attractions ay papayagan rin sa 30% venue capacity at dapat na nasusunod ang minimum public health standards.

Sinabi pa ni Roque na ang business establishments na mayroong safety seal certifications ay papayagang magdagdag ng 10% capacity.

Hindi naman papayagan ang mga meetings, incentives, conventions, at exhibitions events, maging ang social events sa mga venue establishments.

Bawal rin ang indoor sports courts at venues, maging ang indoor tourist attractions habang ang religious gatherings naman ay papayagan hanggang 10% ng venue capacity.—sa panulat ni Hya Ludivico

Kumpiyansa si Presidential Spokesman Harry Roque na makakamit ang “better Christmas” ngayong taon sa sandaling bakunahan kontra COVID-19 ang mas maraming tao.

Isang linggo simula nang ilarga ang pilot implementation ng bagong alert level systems sa NCR, naniniwala si Roque na hindi imposibleng ibaba na ang level 3 sa Metro Manila.

Ito, anya, ay naka-depende sa magiging desisyon ng Department Of Health (DOH).

Aabot na sa kabuuang 6,760,863 individuals na sa NCR ang fully vaccinated habang may 19,376,832 sa buong bansa.

Samantala, pinaalalahanan ni Roque ang publiko na huwag maging kampante dahil may banta pa rin ng virus.—sa panulat ni Drew Nacino

Hinihintay na mula sa Inter-Agency Task Force for the Management of Emerging Infectious Diseases (IATF-EID) ang ilalabas na mas malinaw na guidelines sa limitadong paggamit ng face shield.

Ito’y makaraang aprubahan ni Pangulong Rodrigo Roa Duterte ang rekomendasyon ng Technical Advisory Group na limitahan ang pagsusuot ng face shield maliban sa mga lugar na may “high-risk” activities.

Ayon kay Presidential Spokesperson Harry Roque, anumang araw ay maaaring ilabas ang nirepasong panuntunan.

Una nang inihayag ni Pangulo na hindi na kailangang magsuot ang publiko ng face shield, maliban na lamang sa “3cs,” o “closed and crowded” places, at sa mga lugar kung saan ang mga aktibidad ay close contact.—sa panulat ni Drew Nacino

Nilinaw ni Food and Drug Administration Director-General Eric Domingo na lahat ng ginamit na COVID-19 test kit noong 2020 ay mayroong anim na buwang shelf-life.

Ito’y bilang tugon sa kuwestyon ng Senate Blue Ribbon Committee sa pagbili ng Department Of Health (DOH) ng test kits na ma-e-expire sa loob ng anim na buwan.

Mababa ito kumpara sa kinakailangang 24 hanggang 36 months mula sa araw ng delivery.

Gayunman, inihayag ni Domingo na ang unang test kit na ginawa at available sa bansa ay dumating lamang noong Marso 2020.

Nangangahulugan anya ito na ang test kit para sa RT-PCR sa COVID-19 ay may bagong teknolohiya na isa ring dahilan kaya’t ang test kits noong isang taon ay malapit nang mag-expire.

Pinaliwanag din ng FDA official na hindi lamang sa DOH ito nangyari kundi sa lahat ng pribadong laboratories at RT-PCR laboratories.—sa panulat ni Drew Nacino