HEADLINES

Umabot na sa 49 na bayan at lungsod na sa Eastern Visayas ang nakararanas ng African Swine Fever outbreak.

Kabilang sa mga apektado ang mga bayan ng Abuyog, Javier, Mahaplag, Dulag, Macarthur, Tanauan at Ormoc City, Leyte; Calbayog City, Catbalogan City At Sta. Rita, Sa Samar;  Catarman at Mondragon, Northern Samar.

Nasa 15k baboy sa 230 bayan ang naapektuhan ng asf hanggang nitong kalagitnaan ng Setyembre.

Gayunman, nilinaw ng Department of Agriculture (DA) na ‘manageable’ pa ang sitwasyon at unti-unti nang na-ko-control ang outbreak.—sa panulat ni Drew Nacino

Bahagyang natapyasan pero nananatiling mataas ang satisfaction rating ni Pangulong Rodrigo Duterte batay sa Social Weather Stations o SWS survey noong Mayo at Hunyo.

Nakakuha si Pangulong Duterte ng 65% satisfaction rating noong Mayo at 62% noong Hunyo.

Kumpara ito sa 79% noong Nobyembre 2020 na kanyang pinakamataas na net satisfaction rating sa kabila ng COVID-19 pandemic.

Sa survey noong Mayo, 75% ang nagsabing kuntento sila sa pamamalakad ng Pangulo; 10% ang hindi kuntento habang 15% ang undecided.

Nito namang Hunyo, 75% din ang kuntento, 13% ang hindi kuntento habang 12% ang undecided.

Samantala, naniniwala si SWS fellow at Political Science Professor Jorge Tigno na ang mataas na satisfaction rating noong Nobyembre 2020 ay maaaring may kaugnayan sa pagbaba ng COVID-19 cases sa bansa sa panahong ito.—sa panulat ni Drew Nacino

Plano ng Japan na dagdagan pa ang donasyong COVID-19 vaccine nito sa ibang bansa.

Ayon kay Prime Minister Yoshihide Suga, posibleng mag-donate pa ang japan  ng 60 million doses ng COVID-19 vaccine, doble ito ng 30 million doses na una na nilang ipinamahagi.

Magugunitang ilan sa mga bansa na nakatanggap sa naunang donasyon ng bakuna ng Japan ay ang Taiwan, Vietnam at Indonesia.

Sa ngayon ay nasa 55% na populasyon ng Japan ang fully vaccinated na.

Inanunsyo ni dating Bayan Muna Party List Representative Neri Colmenares na tatakbo siya sa pagka-senador sa 2022 national elections.

Ayon kay Colmenares, inendorso ng makabayan coalition ang kaniyang kandidatura.

Si Colmenares ay isa sa kilalang kritiko ng administrasyong Duterte at kasalukuyang chairman ng National Union of People’s lawyers at taga-suporta ng opposition coalition na 1Sambayan.

Magugunitang tumakbo rin pagka-senador si Colmenares noong 2019 election, ngunit hindi ito pinalad na manalo.

Nagbabala ang Pan American Health Organization (PAHO) sa mga bansa sa rehiyon na posibleng patuloy na maranasan ng mga ito ang localized COVID-19 outbreaks hanggang 2022.

Ayon sa PAHO, bagama’t nagpapatuloy ang pagbabakuna kontra COVID-19, malaking problema ang hindi pagkakapantay-pantay sa pamamahagi ng bakuna partikular sa mga mahihirap na bansa sa latin America.

Ibig sabihin umano nito, kailangan ng gumawa ng mga hakbang para maiwasan ang lalo pang pagkalat ng virus.

Kabilang na rito ang maagang pag-detect sa mga kaso, agarang isolation ng mga kumpirmadong kaso at pagpapaigting tracing at quarantine contacts.

Pinayagan na sa Estados Unidos ang paggamit ng booster ng COVID-19 vaccine ng Pfizer sa mga edad 67 pataas, mga matatandang may comorbidity at mga may trabahong mataas ang exposure sa virus.

Ito ang inanunsyo ng US Food and Drug Administration kung saan nangangahulugan na nasa milyon-milyong Amerikano ang kwalipikadong makatanggap ng third shot ng bakuna, anim na buwan makalipas ng kanilang second dose.

Ayon kay Janet Woodcock, acting head ng US FDA, inaasahan na ang desisyon matapos pagkasunduan ng independent expert panel ang naturang hakbang.

Ilan sa mga kasali sa panel na nag-aprub ng booster para sa mga matanda, high-risk, ay mga vaccinologists, infectious disease researcher at epidemiologist.

Nakatakdang buksan muli sa Lunes ng ospital ng Imus ang outpatient services at scheduled operations nito.

Ayon kay Dr. Jennifer Roamar, ito ay kung hindi na madadagdagan pa ang COVID-19 cases dito.

Ani Roamar, nasa 38 COVID patients ngayon ang naka-admit sa ospital, habang okupado ang 80% ng Intensive Care Unit.

Bagama’t puno pa rin aniya ang emergency room at ward, napansin umano nilang wala na masyadong pasyente sa parking lot.

Dagdag pa ni Roamar, nakabalik na ang 75% ng 34 na health workers na nagpositibo sa COVID-19.

Tila huli na o atrasado na ang utos ng Pangulong Rodrigo  Duterte na repasuhin ang implementasyon ng giyera kontra droga ng administrasyon.

Ayon ito kay Senador Panfilo Lacson matapos ilabas ng Pangulo ang naturang direktiba sa harap nang nakaambang imbestigasyon ng  ICC sa kasong crime against humanity laban sa Pangulong Duterte.

Gayunman, sinabi ni Lacson na walang atrasado kapag ang intensyon ng pagpaparepaso ay para sa kapakanan ng buhay ng mahihirap  na  pinaghihinalaang sangkot sa pagbebenta ng illegal  drugs at kung ito ay may kaugnayan sa patuloy na pagkakalusot sa mga regular na pantalan ng malalaking volume ng illegal drugs.

Tiyak naman aniyang susuportahan ng publiko ang direktiba ng Pangulo kung ang mga nabanggit ang dahilan nang pagpaparepaso sa anti-drug war campaign ng Duterte administration.—mula sa ulat ni Cely Bueno (Patrol 19)

Isinusulong ni Senador Lito Lapid ang panukalang naglalayong magkaloob ng 28 day paid quarantine leave benefits kada taon sa mga manggagawa sa public at private sector.

Ito ayon kay Lapid ay para matulungan ang mga manggagawang nakararanas ng adverse effect ng kasalukuyang pandemya at posibleng maapektuhan ng kahalintulad  na krisis sa mga susunod na panahon.

Sa ilalim ng Senate Bill number 2404, pagkakalooban ng paid quarantine leave ang mga manggagawa na aatasang mag-quarantine matapos ma-expose o ma-infect sa nakahahawang sakit o delikadong kemikal sa paggampan ng kanilang tungkulin.

Binigyang-diin ni Lapid na kahit mahirap at delikado ang panahon ngayon, marami pa rin sa mga Pilipino ang sumasabak sa panganib para lamang makapagtrabaho, subalit masaklap ay kapag  tinamaan ng sakit tulad ng COVID-19 na hindi lamang nakapagpapatigil sa kanila sa pagtatrabaho o nauubos ang leave dahil sa pagsailailim sa quarantine.

Nakasaad din sa panukala na ang mga employer na tatangging magkaloob ng paid quarantine leave ay pagmumultahin ng hindi bababa sa P30,000 at hindi hihigit sa P200,000. —mula sa ulat ni Cely Bueno (Patrol 19)

Inilabas ng PNP ang CCTV footage nina Bree Jonson at Julian Ongpin sa labas ng kanilang kuwarto sa isang resort sa La Union, ilang oras bago natagpuan ang labi ni Jonson.

Sinabi ni PNP chief Guillermo Eleazar na batay sa nakasulat sa footage, lumabas si Ongpin ng kuwartong inupahan nila ni Jonson at umupo sa malapit na hagdan habang umiinom ng red wine.

Nakitang sumunod na lumabas si Jonson at sinundan at kinausap si Ongpin, bago bumalik sa loob ng kuwarto habang umiinom din ng red wine at tila may pagtatalong naganap sa pagitan ng mga ito.

Una nang inihayag ng PNP region 1 na Asphyxia o kakapusan ng hangin ang ikinasawi ni Jonson batay sa isinagawang autopsy sa labi nito.

Ayon kay police region 1 director brigadier general Emmanuel Peralta na lumalabas sa physical examination na walang indikasyong nanlaban si Jonson na patunay na walang nangyaring komprontasyon sa umano’y kasintahang si Ongpin.