Biglang nagmura ang presyo ng face shields sa Divisoria sa Maynila.
Ito ay matapos ianunsyo ng Pangulong Rodrigo Duterte kagabi na hindi na kailangan ang face shields sa open area.
Ayon sa mga vendor, anim na piso na lamang mula sa dating sampung piso ang bentahan ngayon ng kada isang face shield.
Nangangamba ang mga vendor na masayang ang stocks nila ng face shield kung wala nang bibili nito.
Sinisisi ng mga magsasaka ang pagdagsa ng murang imported na bigas sa anila’y bagsak presyong bentahan ng palay sa ilang probinsya.
Ayon sa SINAG o Samahang Industriya ng Agrikultura, nasa P14 kada kilo ang bagong aning palay sa region 1, P13.50 naman ang kada kilo sa region 2 at sampung piso kada kilo sa Mindoro.
Sinabi ni SINAG Chairman Rosendo So na ang mga nasabing presyo ay pawang mababa kumpara sa production cost o ginagastos ng mga magsasaka sa pagtatanim hanggang sa pag-ani ng palay na P15.50 ang kada kilo.
Hindi aniya dapat bumaba sa P17 ang kada kilo ng bagong aning palay at hindi bababa sa P20 sa kada kilo ng tuyong palay.
Binigyang-diin ni Raul Montemayor, National Manager ng Federation of Free Farmers na hindi nakatulong ang rice tariffication law na una nang nangako ng mas malaking kita para sa mga magsasaka at mas murang bigas para sa consumers.
Balik na ang disconnection notice ng Meralco sa Metro Manila.
Ito ay matapos isailalim sa alert level 4 ang NCR simula Setyembre 16.
Ayon sa Meralco, sa susunod na linggo na muling ide-deliver ang disconnection notice para sa mga hindi pa nakapagbayad ng kanilang bill sa kuryente o ‘yung mayroong overdue bills.
Kasabay nito, ipinabatid ng Meralco na suspendido pa hanggang Setyembre 30 ang service disconnection activities sa Bulacan, Cavite, Laguna, Rizal at Lucena City sa Quezon na pawang nasa ilalim ng MECQ hanggang katapusan ng buwang ito.
Pormal nang tinanggap ng Pangulong Rodrigo Duterte ang nominasyon ng Cusi faction ng PDP-Laban para tumakbo siya sa pagka-bise presidente sa 2022 elections.
Ipinakita mismo ni Energy Secretary Alfonso Cusi ang litrato nang paglagda ng Pangulong Duterte sa Certificate of Nomination Acceptance (CONA) para kumpirmahin ang pagtanggap niya sa VP nomination.
Una nang verbal na tinanggap ng Pangulo ang nominasyon ng ruling party sa idinaos na national assembly ng partido na una nang ini-nominate si Senador Bong Go bilang presidentiable ng PDP-Laban.
Humirit ang Employers Confederation of the Philippines, Philippine Chamber of Commerce and Industry at Philippine Exporters Confederation na tanggalin na ang penalty na 3% kada buwan sa mga employers na hindi nakabayad ng kontribusyon sa home development mutual fund o pag-ibig ng kanilang manggagawa.
Kaugnay nito, sinabi ni Pag-Ibig CEO Acmad Moti na irerekomenda niya sa board na aprubahan ang condonation ng penalty sa kontribusyong hindi naihulog mula September 2019 hanggang ngayon.
Ito ay dahil kapag hindi naihulog ng employer ang nasabing kontribusyon ay maapektuhan ang maaaring utangin ng manggagawa sa pag-ibig fund at kung uutay-utayin naman ang pagkompleto ng kontribusyon ay liliit din ang maaaring utangin ng miyembro.
Maliban dito, umapela rin ang mga negosyante sa Social Security System (SSS) na ibalik sa dating mas mababang rate ang kontribusyon ng mga manggagawa. — sa panulat ni Hya Ludivico.
Nagbabala sa publiko ang Food and Drug Administration (FDA) na wala pang nasal spray ang napatunayang epektibo para maiwasan ang pagkakaroon ng COVID-19.
Ayon kay FDA Chief Eric Domingo, hinihintay pa sa ngayon ng bansa ang resulta ng clinical trials na magpapatunay na malaking tulong nga ang paggamit ng nasal spray laban sa COVID-19.
Ani Domingo, ang available lamang ngayon na nasal spray ay para sa panlinis ng ilong, pambigay ng kaunting proteksyon ng panandaliang panahon lamang.
Ngunit hindi pa aniya ito maaaring gamitin o pamalit bilang gamot o bakuna kontra COVID-19.
Una rito, sinabi ng World Health Organization ang pagsasailalim sa clinical trial ng walong spray vaccines kung saan direktang gagamitin ito sa ilong na parte ng ating katawan na karaniwang pinapasukan ng virus. — sa panulat ni Hya Ludivico.
Nasawi ang dalawang miyembro ng gun for hire matapos manlaban sa mga otoridad sa lalawigan ng Cotabato.
Nakilala ang mga suspek na sina Bots Midsayak Ganawan, at Imbran Midsapak, na pawang mga residente ng purok central Barangay Magatos Kabacan Cotabato.
Ayon sa Matalam PNP, nakatanggap sila ng impormasyon hinggil sa kahina-hinalang kinikilos ng mga suspek.
Agad na sinita ng mga pulis ang dalawa ngunit mabilis itong tumakas sakay ng kanilang motorsiklo at nagpaputok.
Napilitan naman ang mga pulis na paputukan rin sina Ganawan at Midsapak na nagresulta sa kanilang pagkasawi.
Narekober ng mga otoridad sa mga suspek ang isang kalibre 45 na pistol, dalawang magasin, mga bala, isang motorsiklo, isang pakete ng shabu at ibang personal na kagamitan.
Iminungkahi ni Vaccine Czar Carlito Galvez Jr., na simulan na ang pagbabakuna kontra COVID-19 sa mga edad 12 hanggang 17-anyos sa kalagitnaan ng Oktubre.
Sa talk to the people kagabi, sinabi ni Galvez na mayroong 23.75 milyong suplay ng bakuna ang gobyerno at may inaasahan pang karagdagang 20 million doses ng bakuna na darating sa unang linggo ng Oktubre.
So, we are proposing Mr. President to open up the vaccination of children by the mid of October. Kasi by the mid of October, may additional pa tayong 20 million na darating plus yung 23 million, kayang kaya na po nating i-vaccinate yung 12 million na bata na 12-17 (years old). Pero ang reccomendation po natin mauna muna po yung mga may commorbidities tsaka po yung mga anak ng healthcare workers.
Ayon pa kay Galvez, nakararanas ngayon ang bansa ng “saturation point’ partikular sa National Capital Region at iba pang mga syudad.
So kung paano maubos po natin yung 23.5 million e dapat 800,000 tayo per day. So ngayon po ang daily average lang po natin is only 400,000 a day. And we are experiencing saturation point in NCR and other cities. Meaning parang nagmi-meet na po yung demand tsaka supply. Meaning, kailangan na po natin mag open ng other sectors.
Ang tinig ni Vaccine Czar Carlito Galvez Jr. — sa panulat ni Hya Ludivico.
Karagdagang 940,680 doses ng Pfizer COVID-19 vaccines na binili ng gobyerno ang dumating sa Pilipinas.
Lumapag sa Ninoy Aquino International Airport ang nasabing bakuna nitong Miyerkules dakong 9:30 ng gabi.
811,980 doses ng nasabing bakuna ay ilalagay sa Pharmaserv cold storage facility sa Marikina City.
Habang una nang dumating sa Cebu ang 128,700 doses ng naturang bakuna. — sa panulat ni Hya Ludivico.
Pormal nang inanunsyo ni Manila Mayor Isko Moreno ang kaniyang pagtakbo bilang pagka-Pangulo sa 2022 national elections.
Ginawa ng alkalde ang kaniyang anunsyo sa harap ng kaniyang mga taga suporta sa Baseco compound sa Maynila.
Sa kaniyang talumpati, ipinangako ni Moreno ang pagiging transparent ng kaniyang administrasyon at hindi sasandig sa mga gawa-gawang opinyon at pekeng papuri.
Dagdag pa ni Moreno, hindi niya pagtatakpan ang katotohanan dahil naniniwala siyang ang katotohanan at hindi “trolls” ang magpapalaya sa atin.
Sa naturang event, ipinakilala rin ni Moreno ang kaniyang running mate na si Dr. Willie Ong na dating senatorial candidate. — sa panulat ni Hya Ludivico.