HEADLINES

Isang panibagong COVID-19 variant na nadiskubre sa Japan ang kumakalat na sa tatlong states sa US.

Ayon sa US Centers for Disease Control, nasa 10,000 katao na ang tinamaan ng R.1 variant partikular sa Kentucky State.

Taglay ng bagong variant ang mutations mula sa ibang variants of concern o interest na Alpha, Beta, Gamma, Delta, Lambda at Mu.

Napag-alaman din ng CDC na karamihan sa mga tinamaan ay fully vaccinated, indikasyon na hindi tinatablanng COVID-19 vaccine ang R.1 variant.

Nilinaw naman ng ahensya na kailangan pa ng malalim na pag-aaral upang mabatid kung nakahahawa o mabilis makahawa ang bagong uri ng COVID-19. — sa panulat ni Drew Nacino. 

Handa si Pangulong Rodrigo Duterte na kasuhan si Senator Richard Gordon dahil sa iregularidad sa paggamit ng public funds noong chairman ito ng Subic Bay Metropolitan Authority.

Sa kanyang talk to the people kagabi, ibinunyag ni Pangulong Duterte na hindi pa ibinabalik ni Gordon ang perang nasilip ng Commission on Audit.

Ayon sa Pangulo, ibinulsa ni Gordon ang bahagi ng kanyang priority development assistance fund at inilipat sa Philippine Red Cross.

So I would like to inquire from the ombudsman if there is a case filed against you because lahat na na-disallow and the money was not returned. And the money was not used in the right way. So, bakit hindi mo pa nabayaran ito? Question ka nang question dito. Ibig sabihin ginastos mo, binulsa mo.

Samantala, sinita rin ni pangulong duterte ang pagiging chairman ni gordon ng red cross habang nagsisilbing senador na isa anyang conflict of interest.

Double agent ka. You are not supposed, to me under the law you must give either Red Cross. Kung gusto mong maging senador pa, o senador ka pero hindi ka Red Cross.

Tinig ni Pangulong Rodrigo Duterte. — sa panulat ni Drew Nacino. 

Mahigit 30 na ang patay makaraang maparalisa ang healthcare system ng bansang guinea-bissau(gi-ni bi-saw)sa gitna ng COVID-19 pandemic.

Kinumpirma ng Health Ministry ng nasabing West African nation na karamihan ng doktor at nurses na nag-strike ay lumayas sa kalagitnaan ng trabaho dahilan upang mapabayaan ang kanilang mga pasyente.

Kabilang sa inirereklamo ng mga healthcare worker ang napakababang sweldo at kakulangan ng medical equipments.

Tiniyak naman ng gobyerno na mananagot ang mga responsable sa pagkamatay ng mga biktima. — sa panulat ni Drew Nacino. 

Niyanig ng magnitude 6.5 na lindol ang West Coast ng Nicaragua.

Ayon sa US Geological survey, naitala ang lindol sa layong 78 kilometers ng southwest ng Jiguilillo.

Naramdaman ang pagyanig sa Western Chinandega Department, Esteli at Matagalpa.

Wala namang inilabas na tsunami warning ang pacific tsunami warning center.

At ayon sa Nicaraguan government ay walang naiulat na napinsala o nasugatan sa naganap na lindol. — sa panulat ni Hya Ludivico. 

Handa si Kingdom of Jesus Christ Founder at Pastor Apollo Quiboloy na tumakbo sa pagka-Pangulo sa 2022 national elections.

Ito ang banta ni Quiboloy kung patuloy na tatanggi sa kanyang hamon na public debate si Senador Manny Pacquiao, na una ng nagdeklara ng kandidatura.

Magugunitang sinampahan ng P100 milyon libel case ni Pacquiao si Quiboloy.

Kung wala anyang malakas na kandidatong papalit kay Pangulong Rodrigo Duterte ay mapipilitan siyang sumabak din sa halalan sa pagka-Pangulo.

Nagbabala rin ang televangelist na kanyang pupuntiryahin ang lahat ng supporter ng CPP-NPA sa oras na magpasyang kumandidato.

Kampante naman ang Pastor sa kanyang pagpasok sa pulitika kahit walang political party dahil ka-partido niya ang Diyos. —sa panulat ni Drew Nacino

Nakapagtala ng record-breaking level ng carbon dioxide o Co2 emission dahil sa kaliwa’t kanang wildfires sa Siberia, Russia; North America at ilang bahagi ng Mediterranean.

Ayon sa earth monitoring service ng European Union, nagresulta sa mahigit 2.5 bilyon tonnes ng Co2, na katumbas ng annual emission ng India, ang malawakang sunog noon lamang Hulyo at Agosto.

Mahigit kalahati ng ibinugang Co2 ay nagmula sa wildfire sa North America at Sibera noong Hulyo.

Dahil dito, posibleng lumala ang global warming at lalong matunaw ang yelo sa arctic at antarctic circle na sanhi ng pag-apaw ng karagatan.—sa panulat ni Drew Nacino

Aprubado na sa ikalawang pagbasa ng senado ang panukalang batas na magpapalawig sa voter’s registration.

Ito’y matapos i-adopt ang concurrent resolution ng senado at kamara na humihimok sa Commission On Elections na palawigin ng isang buwan.

Bukod kay Senate Majority Leader Juan Miguel Zubiri, 22 Senador din ang co-author ng  Senate bill 2408 o act extending the registration of voters for the 2022 national and local elections.

Mula sa kasalukuyang deadline na Setyembre 30 ay layunin ng panukala na itakda sa Oktubre 31 ang huling araw ng registration upang maiwasan ang voter disenfranchisement.

Una nang inihayag ng mga Senador na kinikilala ng korte suprema ang kapangyarihan ng COMELEC na magtakda ng deadline sa voter registration hangga’t hindi lalagpas sa 120 days bago ang aktwal na halalan.—sa panulat ni Drew Nacino mula sa ulat ni Cely Ortega-Bueno