HEADLINES

Lumagda na ang gobyerno at SM group ng Memorandum Of Agreement (MOA) para sa pagtatayo ng Integrated Pasay Monorail.

Ang nasabing proyekto ay ipinanukala ng SM group upang maibsan ang traffic congestion sa Metro Manila, bukod pa sa itatayo nilang EDSA-Tramo flyover extension project.

Ayon kay Transportation Secretary Arthur Tugade, magiging “interoperable” ang proyekto sa light rail transit line 1, Metro Rail Transit line 3, EDSA busway at EDSA greenways project.

Saklaw anya ang monorail ng regulatory supervision at oversight ng DOTr habang ang flyover ay isang hiwalay na kasunduan sa Department of Public Works and Highways (DPWH).

Ililipat naman ng Pasay City Local Government ang ownership ng proyekto sa national government matapos ang 50taon.

Dahil unsolicited project, walang gagastusin ang gobyerno sa pagpapatayo ng monorail. —sa panulat ni Drew Nacino

Iginiit ni Pangulong Rodrigo Duterte na alinsunod sa Bayanihan to heal as One Act o Bayanihan 1 ang procurement ng gobyerno ng medical supplies mula sa Pharmally Pharmaceutical Corporation.

Nilinaw ng Pangulo na epektibo na ang bayanihan 1 nang bumili ang procurement service ng Department of Budget and Management ng face masks sa presyong P27 kada piraso mula sa Pharmally.

Niresbakan naman ng Pangulo si Senador Pangilinan na nagsabing hindi pa umano epektibo ang nasabing batas nang gumulong ang procurement.

Hindi na anya dapat pang kuwestyunin ni Pangilinan ang procurement gayong dumaan naman sa kanilang mga mambabatas ang Bayanihan 1.

Ipinunto pa ni Pangulong Duterte na buhay ang nakasalalay sa procurement kaya’t hindi nag-aksaya ng oras ang pamahalaan sa pakikipag-usap sa pharmally.—sa panulat ni Drew Nacino

Tuluyan nang ipinahinto ni Pangulong Rodrigo Duterte ang paggamit ng faceshield kapag lalabas ng bahay.

Ito ang inanusyo ni Pangulong Duterte sa kanyang Talk to the People makaraang aprubahan ang rekomendasyon ng Technical Advisory Group ng DOH.

Gayunman, nilinaw ng Pangulo na dapat pa ring magsuot ng face shield sa mga closed at crowded area.

Ipinag-utos na rin ng punong ehekutibo ang agarang paglabas ng implementing guidelines.

I will order that we accept the recommendations itong executive department and just remember yung bawal yung 3cs— crowded, closed and close-contact…iyang tatlo na ‘yan face shield is a must pa rin,″ pahayag ni Pangulong Duterte.—sa panulat ni Drew Nacino

Binalaan ng Food and Drug Administration ang publiko laban sa black markets na nagbebenta ng Tocilizumab.

Ayon kay FDA Director General Eric Domingo, hindi dapat bumili ang publiko ng nabanggit na gamot sa black market.

Hindi anya nakatitiyak kung saan ito nanggaling o kung peke at substandard at maaaring makapag-palala sa kondisyon ng pasyente.

Hulyo nang irekomenda ng World Health Organization ang Tocilizumab bilang posibleng lunas kontra COVID-19.—sa panulat ni Drew Nacino

Tinukoy ng OCTA Research Group ang Isabela, Cagayan, Benguet, Laguna at Bataan bilang “Provinces of Major Concern” dahil sa “critical” levels ng COVID-19 incidence rate, ICU utilization at positivity rate.

Sa pagtutok ng OCTA mula Setyembre 15 hanggang 21, ang lalawigan ng Isabela ang may pinakamataas na one-week growth rate na 158%.

Naitala naman ng Benguet ang pinakamataas na Average Daily Attack Rate o ADAR na 53 kaso sa bawat 100,000 population na sinundan ng Cagayan, 37.79; isabela, 36.43; Bataan, 30.25 at Laguna, 25.69.

Samantala, kritikal ang ICU beds ng COVID-19 case kung saan 94% sa Isabela; 87% sa Cagayan; 90% sa Benguet; 87% sa Laguna habang 92%  sa Bataan.—sa panulat ni Drew Nacino

Isinusulong na rin sa kamara ang panukalang magpapalawig sa voters registration para sa 2022 national at local elections.

Inihain ang House Bill 10261 o “extension of registration of voters” nina House Speaker Lord Allan Velasco, Majority Leader Martin Romualdez at Minority Leader Joseph Stephen Paduano.

Layunin ng panukala na palawigin hanggang Oktubre 31 ang pagpaparehistro ng mga botante mula sa orihinal na deadline na Setyembre 30.

Ipinunto ng mga mambabatas na mahalagang magkaroon ng extension dahil marami ang naghahabol sa pagpaparehistro dulot ng pandemya at upang maiwasan ang posibilidad ng “massive voter disenfranchisement”.

Ito, anila, ay upang magkaroon din ng panahon na makahabol ang mga Pilipino na na-delay ang registration dahil sa pandemya.

Samantala, ini-refer na ang bill sa House Committee on Suffrage and electoral reforms.—sa panulat ni Drew Nacino

Dapat suspendihin na ang anumang transaksyon sa pagitan gobyerno at Pharmally pharmaceuticals.

Ito ang panawagan ni Senator Risa Hontiveros matapos lumitaw na patuloy ang pagbili sa pharmally ng PS-DBM sa kabila ng mga nadidiskubreng iregularidad sa pagdining ng Senate Blue Ribbon Committee.

Ayon kay Hontiveros, may mga alam sila na ongoing deliveries na walang notice of award subalit sa hindi maipaliwanag na dahilan ay hindi nila ito ma-access sa website ng Philgebs.

Noon anyang nadiskubre nila na may mga puganteng sangkot sa pharmally ay agad siyang nanawagan na huwag tumanggap ang DBM ng proposals mula sa naturang kumpanya.

Gayunman, napag-alaman sa imbestigasyon ng senado na nagdedeliver pa rin ang pharmally ng kanilang mga produkto nang wala sa tamang proseso at kulang-kulang na dokumentasyon.

Iginiit ni Hontiveros na hindi karapat-dapat ang Pharmally na mabigyan ng perang mula sa kaban ng bayan o gamitin ng gobyerno ang pinaghihirapang buwis ng mga mamamayan.—sa panulat ni Drew Nacino mula sa ulat ni Cely Ortega-Bueno (Patrol 19)

Inatasan ni Pangulong Rodrigo Duterte ang Armed Forces of the Philippines (AFP)  at Philippine National Police (PNP) na mag-deploy ng mga miyembro ng medical corps bunsod ng pagtaas ng kaso ng COVID-19 sa hanay ng health workers.

Sa talk to the nation ng Pangulo kagabi, sinabi nito na maraming health workers ang tinatamaan ng nasabing sakit, habang patuloy namang napupuno ng mga pasyente ang mga ospital.

We have of a … of supply of human resource kaya I am appealing to, one is I am  ordering the medical corps of the Armed Forces of the Philippines and the Philippine National Police… Please place your human resources on ready, on deck because talagang alam mo, ‘yan talaga ang madali kong maasahan,”pahayag ni Pangulong Duterte.

Kaugnay nito, sinabi naman ni Defense Secretary Delfin Lorenzana na ipinag-utos niya na ang pagpapadala ng ilang mga nars sa St. Luke’s Medical Center.—sa panulat ni Hya Ludivico

Nais ng Restaurant Owners of the Philippines na taasan ang dine-in capacity sa mga kainan o establisyimento upang mas marami pang empleyado ang makabalik sa trabaho.

Gayunman, batid rin aniya ng restaurant owners na kailangan itong gawin ng dahan-dahan para mabawasan ang risk ng COVID-19 transmission, kaya kontento na muna sila ngayon sa itinakdang kapasidad, kaysa sa wala.

Handa naman aniya sila na maghintay para sa lalo pang pagluluwag ng restrictions.

Sa ngayon, nasa ilalim ng alert level 4 ang Metro Manila kung saan pinapayagan na ang alfresco dining sa mga kainan sa 30% venue capacity.

Ang indoor dining naman ay pinapayagan sa 10% capacity para sa fully vaccinated individuals.—sa panulat ni Hya Ludivico

Pinapayagan na mag-dine-in ang mga customer na non-Authorized Persons Outside of Residence sa mga restaurant sa Tagaytay ngunit dapat ay fully vaccinated na laban sa COVID-19.

Sa ilalim ng Executive Order no. 38 na nilagdaan ni Mayor Agnes Tolentino, pinapahintulutan ang indoor dine-in services sa 10% capacity ng lugar at al fresco o outdoor dining para sa 30% kapasidad ng establisimyento.

Kailangan din na fully vaccinated na ang lahat ng empleyado ng establisyimento o restaurant at dapat na may divider o acrylic glasses ang kainan, natitiyak ang physical distancing, at regular ang disinfection.

Noong agosto nang buksan ang mga kainan sa Tagaytay ngunit eksklusibo lamang ito para sa mga APOR.—sa panulat ni Hya Ludivico