HEADLINES

Binalaan ng Philippine Overseas Employment Administration o POEA ang publiko hinggil sa mga nag-aalok ng trabaho sa ibang bansa sa pamamagitan ng dating applications.

Ayon kay POEA Administrator Bernardo Olalia, maraming OFW’s ang nabibiktima ng naturang scam kung saan kalimitan aniyang nire-refer ang isang indibidwal sa Visa consultancy firm at pagbabayarin ito para maiproseso umano sa isang trabaho sa ibang bansa.

Kaugnay nito, pinayuhan ni Olalia ang publiko na maghanap na lamang ng lehitimong trabaho sa website ng POEA.—sa panulat ni Hya Ludivico

Tinitingnan ng Department of the Interior and Local Government (DILG) ang posibilidad na ipatupad rin ang alert level system sa ibang rehiyon pagdating ng Oktubre.

Ayon kay DILG Undersecretary Epimaco Densing, kung magiging matagumpay ang implementasyon ng alert level system ay maaari rin itong ipatupad sa ibang lugar sa labas ng Metro Manila.

Nakatakda namang talakayin ng DILG, mga gobernador at mga Alkalde ang mga panuntunan para sa implementasyon ng granular lockdowns.

Sinabi naman ni Metropolitan Manila Development Authority Chairman Benhur Abalos, na nakikita na nila ang epekto ng granular lockdowns ngayong bumababa na ang mga kaso ng COVID-19.

Gayunman, nasa kamay pa rin aniya ng medical experts ang desisyon kung ibaba na ang alert level sa rehiyon.—sa panulat ni Hya Ludivico

Maliban sa NCR, nananatiling mataas ang naitatatalang bagong kaso ng COVID-19 sa ibang mga rehiyon.

Ayon sa OCTA research group, kabilang sa area of concern ang Isabela, Cagayan, At Benguet.

Batay pa sa ulat ng OCTA, umabot sa 158% ang growth rate mula Setyembre 15 hanggang 21 sa Isabela habang 29% naman sa Benguet.

Kahit na sa -1%  ang growth rate sa mga nabanggit na lugar, nasa critical level na rin ang kanilang hospital bed at ICU utilization rates, at maging ang bilang ng mga nagpopositibo sa sakit.

Ayon kay Batanes General Hospital Medical Chief Dr. Jeffrey Canceran, maituturing anila na community transmission ang nangyaring hawahan sa Batanes.

Sa ngayon ay may 13 Covid patients na naka-admit sa nasabing ospital, at nakikita nilang dahilan dito ay ang pananalasa ng bagyong kiko kamakailan.—sa panulat ni Hya Ludivico

Ilang mga bahay sa Purok 5, Barangay Dayapan sa Bayan ng Lemery, Batangas ang naka-lockdown matapos tamaan ng COVID-19 ang mga magkakamag-anak sa nasabing lugar.

Nananatili lamang sa loob ng kanilang mga tahanan ang mga residente kung saan mayroong nakabantay na mga tanod.

Sa bahay na rin lamang nananatili ang mga nahawaan ng covid-19 sa lugar dahil puno na ang mga isolation facility.

Mula noong nakalipas buwan, 54 na ang tinamaan ng COVID-19 sa nasabing Barangay, kung saan may 18 ang active cases sa Purok 5.

Walo naman ang nasawi sa naturang sakit kabilang ang isang anim na buwang gulang na sanggol.

Sa ngayon, umabot na sa 246 ang active cases sa Lemery, Batangas.—sa panulat ni Hya Ludivico

Kinuwestyon sa pagdinig sa proposed 2022 budget ng Office of the President ang mga proyekto na nagkakahalaga ng P100 bilyon na hindi maipatupad dahil wala pang approval ng Office of the President.

Ipinaliwanag ni Deputy Executive Secretary Michael Ong na dahil nasa ilalim ng tinatawag na “for later release” o FLR ang nasabing mga proyekto, kailangang fully evaluated muna ito ng DBM bago i-release ang pondo.

Ayon kay Ong, wala rin ang mga proyektong ito sa national expenditure program.

Gayunman, iginiit ni Senator Nancy Binay na siyam na buwan na ang nakalipas at mayroon na lamang tatlong buwan bago matapos ang taon at kung hindi pa nailalabas ang pondo ay ibabalik na ito sa National Treasury.

Bahagyang bumaba ang budget ng OP sa P8.186 bilyon ngayong taon kumpara sa P8.182 bilyon sa panukalang 2022 budget.—sa panulat ni Drew Nacino

Hinikayat ni DILG Undersecretary Martin Diño ang publiko na isuot ang kanilang COVID vaccination cards sa lanyards o ikuwintas kung lalabas ng bahay.

Ayon kay Diño, hihilingin niya sa Inter-Agency Task Force na ipatupad ang nasabing polisiya at ipag-utos sa mga Barangay.

Ito, anya, ay upang hindi na maabala maaabala ng pulis, barangay o maiwasan na ang mahabang tanungan.

Sa ngayon ay nasa 3K pamilya ang nasa ilalim ng granular lockdown sa Metro Manila.—sa panulat ni Drew Nacino

Tatanggalin na ng PAGASA ang pangalang “Jolina” sa listahan ng mga bagyo.

Ito’y makaraang mag-iwan ang nabanggit na bagyo ng malawak na pinsala sa imprastraktura at agrikultura.

Karaniwang tinatanggal ang pangalan ng bagyo sa sandaling umabot ang pinsala nito sa mahigit isang bilyong piso at tatlundaang buhay na nasawi.

Sa datos ng NDRRMC, umabot na sa P1.5 bilyon ang pinsala ng bagyong Jolina buhat nitong Setyembre 22.

Binubuo ang listahan ng pagasa para sa pangalan ng bagyo ng apat na set ng 25 pangalan at may 10 auxillary o “reserved” names.—sa panulat ni Drew Nacino

Naging matagumpay ang pilot implementation ng alert level system upang maiwasan ang pagkalat ng COVID-19 sa National Capital Region.

Ito ang inihayag ni MMDA Chairman Benhur Abalos eksakto isang linggo simula nang ilarga ang alert level system.

Isa anya sa dahilan ng tagumpay nito ang disiplina ng mga tao sa kabila ng economic activity habang patuloy na bumababa ang kaso ng COVID-19.

Setyembre 16 nang ipatupad ang alert level 4 sa Metro Manila na nakatakdang magtapos sa Setyembre 30.

Una nang inihayag ni Abalos na i-a-assess ang alert level ng NCR isang linggo matapos ang pagpapatupad nito.—sa panulat ni Drew Nacino

Tinatayang 5k informal sector workers sa National Capital Region ang nakatanggap ng tulong na aabot sa P59.1 milyon.

Kabilang sa ibinigay na tulong ay mga bisikleta, kabuhayan at cash-for-work mula sa Department Of Labor and Employment (DOLE).

Sa ilalim ng DOLE bikecination project, ang mga benepisyaryo ay nakatanggap ng bisikleta at cellphone na may load cards para sa pagsisimula ng kanilang food delivery.

Mahigit 3,500 informal sector workers naman sa Marikina, Pateros, Mandaluyong, San Juan, Pasig at Maynila ang nabigyan ng temporary employment sa ilalim ng tulong panghanapbuhay sa ating disadvantaged/displaced workers o TUPAD program.—sa panulat ni Drew Nacino

Nagbabala ang Food and Drug Administration o FDA na aarestuhin nila ang mga nagbebenta ng overpriced Tocilizumab na ginagamit na lunas sa COVID-19.

Ito’y matapos pumalo ang presyo mula P80,000 hanggang P100,000 bawat vial.

Ayon kay FDA Director General Eric Domingo, nakikipag-ugnayan sila sa PNP. at NBI at sa katunayan ay mayroon ng mga naaresto sa buy-bust operations.

Noon lamang nakaraang linggo ay nasakote ng mga otoridad ang isang suspek sa Cavite na nagbebenta ng sobrang mahal na Tocilizumab.—sa panulat ni Drew Nacino