HEADLINES

Hinimok ni Interior Secretary Eduardo Año ang mga nakararanas ng sintomas ng COVID-19 na magpasuri upang maprotektahan ang kanilang pamilya at kasamahan sa trabaho.

Ayon kay Año, mas mapanganib kung hindi sasailalim sa swab test kung sila ay positibo dahil maaari silang makahawa ng kanilang pamilya at mga katrabaho.

Hindi anya makokontrol ang pandemya kung iiwas sa swab testing.

Nagbabala pa ang kalihim na ang pag-iwas sa swab test ay may kaakibat na parusa sa ilalim ng Republic Act 11332 o mandatory reporting of notifiable diseases and health events of public health concern act.

Pagmumultahin naman ng P20,000 hanggang P50,000 o pagkakakulong ng anim na buwan ang sinumang lalabag.—sa panulat ni Drew Nacino

Aabot na sa 42.1 milyon doses ng COVID-19 vaccines ang naiturok.

Nasa 23,107,813 na ang nakatanggap ng first dose habang 19 023,958 na ang fully vaccinated.

Una nang inihayag ng National Task Force against COVID-19 Chief at Vaccine Czar, Secretary Carlito Galvez, 61.91% ng total delivered jabs ang binili ng gobyerno;

24.74 % ang donasyon ng ilang bansa sa pamamagitan ng covax facility, 7.74 % ang binili ng pribadong sektor at local government units habang 5.60 % ay mula sa bilateral partners.

Tiniyak naman ni Galvez na patuloy na dinaragdagan ng pamahalaan ang vaccine inventory upang makamit ang target na bakunahan ang hanggang 77 milyong Pilipino sa katapusan ng taon.—sa panulat ni Drew Nacino

Asahan na ang paghina ng Southwest Monsoon o habagat sa susunod na linggo.

Ito, ayon sa PAGASA, ay dahil sa inaaasahang pag-iral naman ng Northeast monsoon o hanging amihan.

Simula sa unang linggo ng Oktubre ay posibleng magsimula ang transition period o paglalaho ng habagat patungong amihan season.

Magugunita noong 2020 ay Nobyembre 6 na idineklara ng pagasa ang pag-iral ng amihan.—sa panulat ni Drew Nacino

Sumampa na sa 37,228 ang bilang ng nasawi sa COVID-19 sa Pilipinas makaraang makapagtala ang Department Of Health ng karagdagang 154 na namatay kahapon.

Sumadsad naman sa 162,580 ang active cases matapos bumulusok sa 15,592 ang additional cases kaya’t lumundag sa 2 million 417 thousand 419 ang kabuuang kaso.

Ito na ang ikatlong sunod na araw na nakapagtala ng mababang daily COVID-19 cases.

Samantala, umabot sa 24,059 ang gumaling kaya’t umakyat sa 2,217,611 ang total recoveries.—sa panulat ni Drew Nacino

Bumaba na ang case fatality rate o namamatay sa COVID-19 sa bansa ngayong taon ayon sa DOH.

Ito’y sa kabila ng mataas na kaso ng COVID-19 sa bansa.

Batay sa datos ng DOH, pinapakita na ang CFR ng bansa ngayong 2021 ay nasa 1.47% kumpara sa 2.47% noong 2020.

Kung titingnan naman ang bilang ng kaso, nakapagtala ang DOH ng mahigit 400K kaso sa katapusan ng 2020 kumpara sa mahigit 1.9M mula Enero hanggang Setyembre 21, 2021.

Lumalabas na nasa 309% ang pagtaas sa mga kaso nitong 2021 kumpara noong 2020.

Nananatiling tikom ang bibig ng kampo ni vice president Leni Robredo kaugnay sa plano sa 2022 National Elections.

Kasunod na rin nang pagdedeklara ng kanilang presidential bids nina Manila Mayor Isko Moreno at Senador Manny Pacquiao na kapwa una nang nakausap ni Robredo.

Ayon kay Atty. Barry Gutierrez, spokesperson ni Robredo, mag-aanunsyo sa tamang panahon ang bise presidente kaya’t dapat munang kumalma ang lahat.

Una nang inihayag ni Robredo na tatakbo siya sa pagka-pangulo ng bansa kapag napili ng koalisyon ng grupo ng mga  oposisyon.

Pasok sa immigration look out bulletin order si Julian Ongpin na itinuturing na person of interest sa pagkamatay ni musician artist Bree Jonson.

Dahil dito, mahigpit na ipinag-utos ni immigration commissioner Jaime Morente ang pag-monitor sa galaw, flight, biyahe o kinaroroonan ni Ongpin sakali mang lumabas ito ng bansa.

Si Ongpin ay nahaharap sa kasong Possession of Dangerous Drugs matapos makakuha ng cocaine ang awtoridad sa resort room sa San Juan, La Union kung saan natagpuan patay si Jonson.

Nagbabala sa publiko ang Food and Drug Administration (FDA) na wala pang nasal spray ang napatunayang epektibo para maiwasan ang pagkakaroon ng COVID-19.

Ayon kay FDA Chief Eric Domingo, hinihintay pa sa ngayon ng bansa ang resulta ng clinical trials na magpapatunay na malaking tulong nga ang paggamit ng nasal spray laban sa COVID-19.

Ani Domingo, ang available lamang ngayon na nasal spray ay para sa panlinis ng ilong, pambigay ng kaunting proteksyon ng panandaliang panahon lamang.

Ngunit hindi pa aniya ito maaaring gamitin o pamalit bilang gamot o bakuna kontra COVID-19.

Una rito, sinabi ng World Health Organization ang pagsasailalim sa clinical trial ng walong spray vaccines kung saan direktang gagamitin ito sa ilong na parte ng ating katawan na karaniwang pinapasukan ng virus.

Patay ang limang hinihinalang rebelde sa dalawang oras na engkwentro ng kanilang grupo at tropa militar sa Sta. Teresita, Cagayan.

Ayon sa 5th Infantry Division ng Philippine Army, nakasagupa nila ang halos 40 komunistang rebelde na pinaniniwalang miyembro ng Komiteng Probinsya Cagayan, Komiteng Rehiyon – Cagayan Valley (KR-CV).

Agad namang nagpadala ng suporta sa tropa sa pakikipagbakbakan sa mga rebelde.

Nagawa namang makatakas ng ibang rebelde patungo sa iba’t ibang direksyon.

Narekober sa pinangyarihan ng engkwentro ang limang bangkay ng mga rebelde, tatlong mataaas na kalibre ng armas, limang anti-personnel mines, limang handheld radios, apat na cellphones, iba’t ibang medical supplies at kagamitan, at mga subersibong dokumento.

Pormal nang inanunsyo ni Manila Mayor Isko Moreno ang kaniyang pagtakbo bilang pagka-pangulo sa 2022 National Elections.

Ginawa ng Alkalde ang kaniyang anunsyo sa harap ng kaniyang mga taga suporta sa Baseco Compound sa Maynila.

Sa kaniyang talumpati, ipinangako ni Moreno ang pagiging transparent ng kaniyang administrasyon at hindi sasandig sa mga gawa-gawang opinyon at pekeng papuri.

Dagdag pa ni Moreno, hindi niya pagtatakpan ang katotohanan dahil naniniwala siyang ang katotohanan at hindi “trolls” ang magpapalaya sa atin.

Sa naturang event, ipinakilala rin ni Moreno ang kaniyang running mate na si Dr. Willie Ong na dating senatorial candidate.