Patuloy ang pagbaba ng reproduction number sa National Capital Region (NCR) ayon sa OCTA Research Group.
Sinabi ni OCTA Fellow Dr. Guido David, nasa 1.03 na lang ang reproduction number sa NCR, simula nuong Setyembre 15 hanggang 21.
Ang reproduction number ay tumutukoy sa indibidwal na maaaring hawaan ng bawat isang kaso.
Inihirit ng Amnesty International sa COVID-19 vaccine manufacturers na bigyan ng 2-B doses ng COVID vaccine ang mga mahihirap na bansa bago matapos ang taon.
Sinabi ni Amnesty Chief Agnes Callamard na dapat unahin muna ang buhay ng mga tao bago unahin ang kita.
Giit ni Callamard, nabakunahan na malaking populasyon sa mga mayayamang bansa ngunit sa ilang bahagi ng Latin America, Africa at Asya ay nagkakamatayan na lang.
Ipinabatid ni Callamard na nangako si US President Joe Biden sa talumpati nito sa UN General Assembly na mapu-fully vaccinate ang pitumpung porsyento ng populasyon ng mundo sa mga darating na buwan.
Nanawagan si Pangulong Rodrigo Duterte sa United Nations na buwagin na ang “Kafala System”.
Ang Kafala System ay sistema sa Middle East kung saan pinapayagan ang mga employer na kontrolin ang employment at migration status ng kanilang mga dayuhang empleyado na kadalasan ay humahantong sa pang-aabuso.
Sa United Nations General Assembly, sinabi ng Pangulo na maraming filipino na nagtatrabaho sa ibayong dagat ang nakararanas ng hindi makataong pagtrato.
Isa aniya rito ay sa ilalim ng Kafala System na tila isang malaking kadena na kumokontrol sa mga mahihina.
Hinimok ni Pangulong Rodrigo Duterte ang iba’t ibang lider ng bansa na suportahan ang COVAX Facility.
Sa kaniyang talumpati sa 76th session ng High Level General Debate ng United Nations General Assembly, sinabi ng pangulo na sa pamamagitan ng COVAX Facility ay mas maraming buhay ang maililigtas.
Kasabay nito hinikayat din ng Pangulo ang mga kapwa niya lider na kondenahin ang usapin kaugnay sa vaccine booster shots ng mayayamang bansa.
Inilarawan ito ng Pangulo na nakakagulat at makasarili dahil habang maraming mahihirap na bansa ang kapos pa sa bakuna ang iba naman ay naghahangad na ng dagdag pang bakuna para sa kanilang booster shot.
Mahigit P500-M halaga ng hinihinalang shabu ang nasabat sa Bacolod City.
Sa ikinisang buy bust operation ng PNP Drug Enforcement Group nasakote ang dalawang drug suspek sa Barangay 31, Libertad kung saan nagbenta ang grupo ng isang libong pisong halaga ng shabu.
Nakatakas naman ang isa pang suspek matapos makaramdam na pulis ang katransaksyon ng mga ito.
20 pakete ng hinihinalang shabu ang nakuha sa kanila na aabot sa 680,000 ang halaga.
Maliban dito nakuha rin ang isang Calibre 22 Revolver na walang lisensya.
Haharap sa magkapatong na kasong Illegal Possesion of Firearm at paglabag sa Comprehensive Dangerous Drugs Act ang dalawang inaresto.
Isinusulong ni House Deputy Speaker Rufus Rodriguez ang pagbuwag sa Philippine International Trading Corporation (PITC) na nasa ilalim ng DTI.
Sa kanyang inihaing panukala, sinabi ni Rodriguez na samu’t saring mga kontrobersya ang kinahaharap ng PITC kabilang ang paglilipat dito ng P11-B mula 2014 hanggang 2020 ng iba’t ibang ahensya ng gobyerno.
Binigyang-diin ni Rodriguez na ang mga nasabing fund transfer ay nagpataas pa sa budget utilization rate ng government agencies dahil maituturing nang obligated at disbursed kapag inilipat ang pondo sa PITC.
Mayroon din aniyang mga report na ginagamit ng mga ahensya ng gobyerno ang interest mula sa kita sa bilyong piso na inilipat nila sa PITC para sa bonus at ibang bayarin sa mga benepisyo ng mga government employee.
Naselyuhan na ang kasunduan kaugnay sa pagtatayo ng Parex o Pasig River Expressway.
Ang supplemental toll operations agreement ay nilagdaan ng DOTR at San Miguel Corporation para sa kauna-unahang green hybrid highway at future urban transport.
Pinangunahan ng mga opisyal ng DOTR, TRB, iba pang ahensya ng gobyerno at SMC ang paglagda sa naturang kasunduan.
Ang Parex na magdudugtong sa road 10 sa Maynila, Edsa, C5 at C6 ay nagkakahalaga ng P95-B na kayang i-accommodate ang bus rapid transit system, bisikleta, pedestrians at water ferries.
“The more the merrier!”
Ito ang inihayag ni Senate President Tito Sotto III makaraang madagdag sa mga sasakbak sa mga tatakbong Pangulo sa susunod na taon si Manila Mayor Isko Moreno.
Ayon kay Sotto, iisa lamang ang ibig sabihin nito, dahil aniya mas maraming tatakbo sa posisyon ay mas maraming pagpipilian ang publiko.
Magugunitang nauna na nang nag-anunsyo si Senador Lacson na tatakbo sa pagka-Pangulo, sinundan ng kapwa senador Manny Pacquiao gayundin ang kakaanunsyo lamang na kakandidato na si Manila Mayor Isko Moreno.
Kasunod nito, nang tanungin si Sotto kung hindi ba ito magreresulta sa pagkakaroon ng minority president dahil sa hati-hating boto, iginiit niyang ganito ang nangyari mula noong tumakbo sa dating Pangulong Fidel Ramos.
Maliban na lamang noong kumandidato na si dating Pangulong Erap Estrada na nakakuha ng boto ng mayorya.—mula sa ulat ni Cely Bueno (Patrol 19)
Inamin ni Presidential Spokesperson Harry Roque na malaking porsyento pa rin ng mga Pilipino ang nagdadalawang isip na magpaturok ng COVID-19 vaccine.
Ayon kay Roque, ang pangunahing dahilan na kanilang nakikita rito ay ang kanilang pagdududa sa safety at efficacy ng mga bakuna.
Dagdag ng opisyal na ito’y sa kabila ng pagtitiyak ng World Health Organization (WHO) sa kaligtasan nito.
Sa huli, umaasa si Roque na darating din ang araw na aabot na sa 80% ang mga Pilipinong mababakunahan ng COVID-19 vaccine para tuluyan nang mabuksan ang mga negosyo at makaahong muli ang ekonomiya ng bansa.—mula sa ulat ni Jopel Pelenio (Patrol 17)
Sinusuportahan ng United Nations, UNICEF at WHO ang isinusulong na face to face classes sa mga lugar na mayruong mababang kaso ng COVID-19.
Ayon ito sa Department of Education (DepEd) matapos bigyang diin ng mga nasabing institusyon ang karapatan ng bawat bata sa edukasyon na huhubog sa kanilang pagkatao.
Sinabi pa ng DepEd na iginigiit ng UN, UNICEF at WHO ang patuloy na pagsusuot ng face mask, physical distancing, paghuhugas ng kamay at tamang ventilation ng mga silid aralan.