HEADLINES

Tuluy-tuloy ang pagsala ng 1Sambayan sa magiging pambato nito sa 2022 presidential elections.

Ayon sa 1Sambayan, nasa huling araw na sila ng screening ng nominees para sa pagka pangulo sa susunod na eleksyon.

Gumulong na anila ang kanilang internal survey mula Setyembre 12 hanggang 25 kung saan ipapaliwanag ng kanilang mga miyembro kung bakit napili ang isang indibidwal para maging “the  anointed one”.

Muling ipinabatid ng 1Sambayan na iaanunsyo nila ang isasabong na presidentiable isang linggo bago ang pagsisimula ng paghahain ng certificate of candidacy sa Oktubre1.

May mga kailangan pang gawin sa mga paaralan bago tuluyang ibalik ang face to face classes sa mga lugar na mayroong mas mababang kaso ng COVID-19.

Ayon kay ACT Secretary General Raymond Basilio, dapat na magkaruon ng maayos na ventilation ang mga silid aralan, sapat na classrooms at handwashing stations gayundin ng tubig, clinic, healthcare workers, COVID-19 testing at health checks.

Bukod dito, sinabi ni Basilio na isinusulong nila ang transportation program para sa mga estudyante upang makaiwas sa exposure sa COVID-19 habang nagbabiyahe papasok.

Si Senador Grace Poe ang unang choice ng kampo ni Manila Mayor Isko Moreno para maging vice president nito.

Gayunman, sinabi ni Lito Banayo, Campaign Strategist ni Isko na hindi pumayag si Poe na maka partner ng alkalde dahil sa personal na relasyon ng pamilya nito kay Senate President Vicente Sotto, III.

Sinabi ni Banayo na ayaw naman nilang pumasok sa isang political marriage at paninindigan aniya ni Isko na si Dr. Willie Ong na ang vice presidentiable nito.

Si ong ay orihinal na kabilang sa senatorial slate ni Isko subalit sinabi ng alkalde na uubra itong maging vice president niya matapos makausap ang doktor.

Kinumpirma ni Manila Public Information Officer Julius Leonen, na tatakbo si Manila City Mayor Isko Moreno sa 2022 National Election.

Ayon kay Leonen, magiging running mate ni Moreno ang physician na si Dr. Willie Ong na mayroong 16-M followers sa Facebook.

Isasagawa ni Moreno ang kaniyang pormal na deklarasyon ngayong araw sa Benigno Aquino Elementary School sa Baseco Compound,  sa Tondo, Maynila.

Nilinaw naman ni Moreno na bukas ang kanilang pinto para sa isang United Opposition. —sa panulat ni Angelica Doctolero

Naniniwala si Interior Undersecretary for Barangay Affairs Martin Diño na hindi labag sa batas ang ‘yellow-tagging’ sa mga bahay ng mga COVID-19 positive sa Pateros.

Ito’y sa kabila ng pangambang malalabag ng nasabing ordinansa ang Section 9 ng Republic Act 11332 o ang Mandatory Reporting of Notifiable Diseases and Health Events of Public Health Concern Act.

Ayon kay Diño, boluntaryo lamang ang paglalagay ng dilaw na laso.

Una nang ipinag-utos ni Pateros Mayor Miguel “Ike” Ponce ang paglalagay ng mga dilaw na laso sa mga bahay ng mga covid patient upang matiyak na namo-monitor sila nang maayos.

Nilinaw din ni Ponce na maglalagay lamang ng yellow ribbon kung papayag ang pasyente. —sa panulat ni Drew Nacino

Nagbabala si Lifestyle Medicine Physician Dr. Dex Macalintal sa mga vloggers at viewers na mahilig mag mukbang.

Ayon kay Dr. Macalintal, trending ngayon ang mukbang challenge na kinahihiligan ng mga Pilipino.

Sinabi ni Macalintal na ang sobrang pagkain ng mga mamantika at matatabang pagkain na naglalaman ng calories at cholesterol ay posibleng magdulot ng health issues sa katawan ng isang tao.

Bukod pa dito maaari ding magkaroon ng hypertension at sakit sa puso ang mga taong abusado sa pagkain.—sa panulat ni Angelica Doctolero