HEADLINES

Planong magpakawala ng tubig ang National Irrigation Administration o NIA mula sa Magat dam para mapaghandaan ang inaasahang malalakas na pag-ulan bunsod ng bagyong Maring.

Layunin nito na hindi umapaw ang tubig sa mga dam dahil delikado lalo na sa mga residenteng nakatira malapit dito.

Base sa pinakahuling rekord ng PAG-ASA, nasa 188.32 meters na ang water level o limang metro na lamang mula sa 193 meters na spilling level sa magat dam.

Sa ngayon, patuloy na minomonitor ng PAGASA ang iba pang mga dam na posibleng maapektuhan ng pinagsanib pwersa na bagyo.— sa panulat ni Angelica Doctolero

Pinuri ni United States President Joe Biden si Rappler CEO Maria Ressa matapos manalo sa 2021 Nobel Peace Prize.

Ito ay dahil sa dedikasyon na ipinakita ni Ressa sa larangan ng journalism at sa kaniyang pangako na ipaglalaban ang press freedom.

Ayon kay Biden, si Ressa ay matapang at walang kinatatakutan sa pagpapakita ng katotohanan sa pang aabuso ng kapangyarihan, korapsiyon at pagiging pantay ng isang bansa.

Kabilang rin sa nagpaabot ng pagkilala kay Ressa ay si Canadian Prime Minister Justin Trudeau.

Matatandaan ginawaran si Ressa kasama ang Russian Journalist na si Dmitry Muratov para sa kanilang pagsisikap na ingatan ang kalayaan sa pagpapahayag para sa demokrasya at pangmatagalang kapayapaan ng bansa.— sa panulat ni Angelica Doctolero

Inihayag ng OCTA Research Group na posible nang isailalim sa ‘low risk’ classification ng COVID-19 ang buong Metro Manila sa katapusan ng buwan.

Ito ay dahil pababa na ng pababa ang mga naitatalang COVID-19 cases sa bansa.

Ayon kay Octa Reasearch Fellow Professor, Dr. Guido David, patunay lamang na bumababa na ang trend ng COVID-19 dahil wala nang nakikitang variant of concern sa Pilipinas kung ikukumpara sa ibang mga bansa.

Dahil dito, posibleng maging masaya ang selebrasyon ng pasko kung patuloy na susunod ang publiko sa ipinatutupad ng pamahalaan.— sa panulat ni Angelica Doctolero

Nababahala na ang mga pasahero dahil sa maling sitwasyon na nangyayari sa ilang pampublikong sasakyan kung saan, hindi na nasusunod ang physical distancing na ipinatutupad ng pamahalaan.

Ayon sa ilang mga pasahero, parang bumalik na sa normal ang sitwasyon ng biyahe dahil nagiging siksikan na ang mga pasahero sa loob ng mga pampublikong sasakyan.

Bukod pa dito, karamihan pa sa mga sasakyan kagaya ng bus at jeep ay pinapayagan ang mga pasahero na nakatayo at magkatabi sa upuan.

Ayon sa pamunuan ng mga bus terminal, ang kapasidad ng kanilang bus ay nakadepende sa quarantine classification na ilalabas ng pamahalaan.

Nilinaw naman ni LTFRB Chairman Martin Delgra na anuman ang quarantine level ng isang lugar ay dapat na nasa 50% parin ang kapasidad na ipatutupad sa loob ng pampublikong sasakyan.— sa panulat ni Angelica Doctolero

Prayoridad ni Presidential aspirant Ferdinand ‘Bongbong’ Marcos ang pagbangon mula sa pandemya, sa oras na magtagumpay sa 2022 elections.

Kabilang sa nilalaman ng kanyang tawid-COVID, beyond COVID program ang pagtaas ng sahod ng nurses at healthcare workers.

Sa ilalim nito, patatatagin ang buong healthcare system ng bansa sa pamamagitan ng paglalaan ng mas malaking pondo para sa sweldo at benepisyo ng mga healthcare worker, pagdaragdag ng mga public hospital at pagpapalakas ng medical research capability ng bansa.

Magiging katuwang ni Marcos sa pagbuo ng programang ito ang ilang kinatawan mula sa medical at scientific research sectors, na tututok sa paglikha ng Philippine-made Medicines at vaccines, partikular sa COVID-19 at iba pang karamdaman.

Naniniwala ang dating Gobernador ng Ilocos Norte na dapat gawing prayoridad ang pagsasaayos sa sitwasyon ng mga frontline medical worker, kabilang na ang mga nurse, upang matiyak ang matatag na health care system sa gitna ng pandemya.

Ang mababang pasahod anya ang isa sa mga dahilan kaya’t maraming nurses ang nangingibang-bansa upang kumita ng mas malaki o lumipat ng panibagong career.—sa panulat ni Drew Nacino

Inihihirit ng mga magsasaka sa Department of Agriculture na magkaroon ng libreng abono sa presyo ng mga palay at mais.

Ito ay dahil sa patuloy na paglobo o pagtaas ng presyo ng langis o produktong petrolyo.

Ayon sa grupong SINAG, posible pang pumalo sa P2,300 ang kada sako ng mga palay at mais dahil sa pagbaba sa suplay ng abono.

Ayon sa ilang mga magsasaka, mula sa mahigit P15 kada kilo ng palay ay pumalo na ito sa mahigit 18k kada kilo.

Bukod pa dito, binabarat din ng mga traders ang mga magsasaka kabilang na ang mga lalawigan ng Rosales, Pangasinan; Nueva Ecija; at La Union kaya nagiging bagsak presyo ang farm gate price ng palay kahit na tumataas ang production cost nito.

Dahil dito, nasa P4 hanggang P6  ang nalulugi sa mga magsasaka sa kada kilo ng palay pero patuloy paring tumataas ang presyo ng bigas sa merkado.— sa panulat ni Angelica Doctolero

Nagsuspinde na ng klase ngayong araw ang pre-school hanggang Senior High School sa lalawigan ng Cagayan bunsod ng bagyong Maring.

Ito ay para paghandaan ang posibleng pananalasa ng bagyong Maring dahil sa mga pag-ulan at malalakas na hanging dala nito.

Sa ngayon, patuloy paring pinag-iingat ng PAGASA ang publiko sa posibleng pagbaha at pagguho ng lupa dahil sa bagyong Maring.— sa panulat ni Angelica Doctolero