HEADLINES

Asahan na bukas ang panibagong oil price increase dahil pa rin sa manipis na supply sa world market.

Ayon sa mga taga-oil industry, maglalaro sa P1.30 hanggang P1.30 ang dagdag sa kada litro ng gasolina.

P1.30 hanggang P1.50 naman sa kada litro ng diesel at kerosene.

Ito na ang magiging ika-7 sunod na linggong maglalarga ng dagdag-presyo sa mga produktong petrolyo.

Samantala, pag-uusapan naman ng Department Of Energy at mga oil companies ang posible nilang maging tulong sa mga apektadong motorista lalo na sa mga public utility driver.—sa panulat ni Drew Nacino

Karagdagang pag-aaral pa ang panawagan ng Department Of Health at mga medical experts sa COVID-19 medical treatment drug na Ronapreve.

Ito’y kahit nabigyan na ng Food and Drug Administration ng Emergency Use Authorization noong Otkubre 1 ang naturang gamot na kauna-unahan ding COVID drug na naaprubahan sa local level.

Ayon kay DOH Undersecretary Maria Rosario Vergeire, bago bumili ang pamahalaan ng mga gamot na para gamitin ay dapat muna itong busisiin nang mabuti.

Ang Ronapreve ay kilala sa Estados Unidos bilang Regen-Cov na nilikha ng Pharmaceutical Company na Roche.

Makakapag-order lamang anya ang mga ospital sa oras na ma-aprubahan na rin ito ng DOH at mga medical experts kahit pa nauna na itong nagkaroon ng EUA.—sa panulat ni Drew Nacino

Planong magpakawala ng tubig ang National Irrigation Administration (NIA) mula sa Magat Dam para mapaghandaan ang inaasahang malalakas na pag-ulan bunsod ng bagyong Maring.

Layunin nito na hindi umapaw ang tubig sa mga dam dahil delikado lalo na sa mga residenteng nakatira malapit dito.

Base sa pinakahuling rekord ng pag-asa, nasa 188.32 metro na ang water level o 5 metro na lamang mula sa 193 metro na spilling level sa Magat Dam.

Sa ngayon, patuloy na minomonitor ng PAGASA ang iba pang mga dam na posibleng maapektuhan ng pinagsanib pwersa na bagyo.—sa panulat ni Hya Ludivico

Tiniyak naman ng Department Of Health na hindi tumitigil ang pagsasaayos sa kanilang data-collating server na CovidKaya.

Ito’y kahit halos dalawang linggo na ang isyu sa naturang data system na ginagamit upang mangalap ng datos sa mga nagpopositibo sa COVID-19, nasasawi at gumagaling.

Setyembre 24 nang magsimula ang backlog kung saan walang inilabas na bilang ng mga nasawi ang d.o.h. sa kanilang bulletin at inamin na dahil ito sa ilang isyu sa nasabing sistema.

Ayon kay Health Undersecretary Maria Rosario Vergeire, nakipag-ugnayan naman na sila sa Department of Information and Communications Technology upang ayusin ang technical issue.

Ilan sa kanilang solusyon ay ang pansamantalang pagtigil sa CovidKaya.na nagsimula noong Oktubre 9 at nagtapos kahaponng umaga.

Nagkasundo rin anya ang mga eksperto sa DOH na magdagdag ng server at backup system upang maiwasang maulit ang technical issue sa hinaharap.—sa panulat ni Drew Nacino

Napanatili ng bagyong Maring ang lakas nito habang papalapit sa dulong hilagang Luzon.

Huling namataan ng PAGASA ang bagyo sa layong 350 kilometers, silangan ng Aparri, Cagayan taglay ang lakas ng hanging aabot sa 85 km/h at pagbugso na hanggang 105 km/h.

Kumikilos ito pa-kanluran hilagang-kanluran sa bilis na 25 km/h.

Nakataas na ang public storm signal 2 sa Batanes, Cagayan, kabilang ang Babuyan Islands, northern portion ng Isabela, Apayao, Kalinga, Mountain Province, Abra, Ilocos Norte at Sur.

Signal 1 naman sa nalalabing bahagi ng Isabela, Nueva Vizcaya, Quirino, Ifugao, Benguet, La Union, Pangasinan, Aurora, Nueva Ecija, Tarlac, Zambales, Pampanga, Bulacan, northern portions ng Bataan at Quezon kabilang ang Polillo at Calaguas Islands.

Asahan na ang katamtaman hanggang sa malakas na pag-ulan sa Batanes, Cagayan kabilang ang Babuyan Islands, Cordillera at Ilocos Regions, habang mahina hanggang sa katamtamang pag-ulan at minsang malakas sa Central Luzon at nalalabing bahagi ng Cagayan Valley.

Dahil dito, pinag-iingat ng PAGASA ang mga residente sa mga nasabing lugar sa posibleng flash floods at landslides. —sa panulat ni Hya Ludivico

Sumampa sa 12,159 ang karagdagang COVID-19 cases na naitala sa bansa, kahapon kaya’t lumobo pa sa 2,666,562 ang kabuuang kaso.

Sa datos ng Deparment Of Health, bumaba na sa 90,927 ang active cases habang umabot sa 27,727 ang gumaling dahilan upang sumirit sa 2,536,011 ang total recoveries.

Karagdagang 119 naman ang namatay kaya’t umakyat na sa 39,624 ang death toll.

Gayunman, nilinaw ng DOH dalawang laborotaryo ang hindi nakapagsumite ng kanilang datos sa COVID-19 repository system.—sa panulat ni Drew Nacino

Inaresto ng mga otoridad ang nasa 20 suspek matapos ikasa ang buy-bust operation sa anim na bayan kabilang na ang Meycauayan, San Rafael, San Jose Del Monte, Norzagaray, Sta. Maria, at Pandi, Bulacan.

Ayon sa Station Drug Enforcement Unit o SDEU, nakatanggap sila ng report mula sa isang netizen kaugnay sa iligal na aktibidad ng mga suspek.

Nakuha sa mga suspek ang 17 pakete ng shabu at buy-bust money matapos ang week-long surveillance operation.

Paglabag sa kasong Republic Act 9165 o Comprehensive Dangerous Drugs Act of 2002 ang kasong kakaharapin ng mga nahuling suspek.— sa panulat ni Angelica Doctolero

Patay ang isang lalaki matapos umanong makuryente sa loob ng kanilang bahay sa Brgy. Olaes, Gen. Mariano Alvarez, Cavite.

Sa imbestigasyon ng GMA Police station, naabutan nalang ng step-father ng biktima na si Leo Obrebega ang kaniyang anak na si Rowel Ganadem, 40-anyos na nakahandusay sa sahig at wala nang buhay.

Sinabi din ni Obrebega na nakita niyang hawak ng biktima ang kuryente at ilaw na posibleng dahilan ng kaniyang pagkasawi.

Plano ngayong isailalim sa autopsiyang biktima upang malaman ang sanhi o dahilan ng pagkamatay nito.— sa panulat ni Angelica Doctolero

Nagsorry ang Sumitomo Corporation sa mga naapektuhan ng pagliyab ng bagon ng tren sa MRT-3 malapit sa EDSA-Guadalupe station.

Ayon sa naturang kumpaniya, pinaiimbestigahan na nila ang dahilan ng pagliyab ng tren at kung sino ang responsable sa insidente makaraang masugatan ang walong indibidwal kabilang na ang dalawang babaeng buntis.

Bukod pa dito, magsasagawa rin ng counter measures ang sumitomo para sa seguridad ng mga pasaherong bumibiyahe at sumasakay ng MRT-3.

Sa ngayon, balik-operasyon na ang tren ng MRT-3 mula North Avenue station hanggang Taft Avenue Station at pabalik.— sa panulat ni Angelica Doctolero

Umabot na sa 112 ang bilang ng mga Barangay na COVID-19 free na sa lungsod ng Pasay.

Ayon sa pamahalaang lokal ng Pasay, wala nang naitatatlang aktibong kaso sa kanilang lungsod at bumaba na ang bilang ng mga nasawi bunsod ng COVID-19.

Sa datos ng Pasay Public Information Office, nasa 292 nalang ang bilang ng COVID-19 active cases habang nasa 531 ang bilang ng mga nasawi.

Pumalo naman sa mahigit 20K ang bilang ng mga nakarekober sa lungsod.— sa panulat ni Angelica Doctolero