HEADLINES

Isinulong ni Health Secretary Francisco Duque III sa pamahalaan na bigyan ng booster shots kontra COVID-19 ang mga healthcare workers.

Gayunman, nilinaw ni Duque na dapat pa ring unahin ang mga hindi pa nababakunahan batay sa rekomendasyon naman ng mga eksperto.

Ayon sa kalihim, dapat munang matiyak na malaking porsyento ng populasyon ang bakunado na kahit unang dose ng Covid-19 vaccine.

Sa ngayon ay nasa 23.8 million o 31.8% na ng target population ang fully vaccinated.

Una nang inihayag ni Health Undersecretary Maria Rosario Vergeire na walang pruwebang magpapatunay na nakapagbibigay ng kumpletong proteksyon ang booster shots laban sa COVID-19.—sa panulat ni Drew Nacino

Aabot sa P20 bilyon na pondo sa 2022 proposed P5 trilyon national budget ang ini-realign ng kamara para sa pagbili ng mga COVID-19 vaccines at boosters.

Magugunitang hindi gaanong malinaw ang budget para sa pagbili ng bakuna sa orihinal na proposed budget na inilatag ng executive department kung saan aabot sa P45 bilyon ang inilaan para sa booster shots sa unprogrammed funds.

Maaari lamang magamit ang unprogrammed funds kung mayroong surplus sa government revenues o kung may kinita mula sa foreign loans.

Ini-realign din ng house appropriations committee ang P5 bilyon para sa medical assistance sa mga indigent patient at P4.5 bilyon para naman sa special risk allowance ng mga healthcare worker.

Nagsingit din ng dagdag P10 bilyon sa Department Of Labor and Employment para sa emergency employment program nito;

P10 bilyon sa Department of Social Welfare and Development para sa assistance sa individuals in crisis situations at P1 bilyon para sa sustainable livelihood program.—sa panulat ni Drew Nacino

Mula sa dating 99^th spot ay lumagpak ang Pilipinas sa 102^nd rank sa 139 na bansa pagdating sa rule of law performance ng World Justice Project o WJP.

Inilabas ng WJP, na isang independent at multi-disciplinary organization, ang taunang rule of law index 2021, na assessment sa rule of law ng 139 na bansa base sa national surveys sa mahigit 138,000 families at 4,200 legal practitioners.

Batay sa report, umani ang Pilipinas ng score na 0.46, o kumpara sa 0.47 noong isang taon.

Ilan sa mga pinagbatayan ang open government, limitasyon ng kapangyarihan ng gobyerno, kawalan ng korapsyon, kaayusan at seguridad;

Fundamental rights, regulatory enforcement, civil justice at criminal justice.—sa panulat ni Drew Nacino

Suportado ng World Health Organization ang pagluluwag ng quarantine restrictions sa Metro Manila.

Pinapurihan din ni WHO Country Representative Rabindra Abeyasinghe ang mataas na vaccine coverage sa National Capital Region.

Gayunman, hinimok ni Abeyasinghe ang gobyerno na magdoble-ingat at ipagpatuloy ang pandemic containment strategies upang maiwasan ang isa pang COVID-19 surge.

Bagaman nagluwag na ang restrictions upang manumbalik ang ilan pang negosyo, mayroon pa rin anyang mga ospital na nag-o-operate nang halos full capacity.

Simula bukas ay ibababa na sa alert level 3 ang quarantine status sa Metro Manila mula sa kasalukuyang alert level 4 dahil sa pagbaba ng COVID-19 cases.—sa panulat ni Drew Nacino

Tiniyak ni Vaccine Czar, Secretary Carlito Galvez na sapat ang supply ng bakuna laban sa COVID-19 sa pagsisimula ng vaccination sa mga edad 12 hanggang 17.

Ayon kay Galvez, karamihan sa bulto ng deliveries ngayong fourth quarter ay mula sa Pfizer at Moderna na gagamitin sa mga menor de edad.

Batay sa datos ng gobyerno, mahigit 1.3 million doses ng Moderna ang dumating noong sabado kaya’t umabot na sa 85, 575,600 ang kabuuang bilang ng idineliber na bakuna.

Magugunitang iginawad ng Food and Drug Administration (FDA) ang emergency use authorization sa Pfizer at Moderna upang maiturok sa mga edad 12 hanggang 17. —sa panulat ni Drew Nacino

Mistulang namatayan ng mahal sa buhay ang mga maggugulay sa Benguet makaraang mawasak ng bagyong Maring ang ekta-ektarya nilang mga tanim.

Kabilang sa mga labis na naapektuhan ang mga gulayan sa bayan ng La Trinidad, na pangunahing pinagkukunan ng supply ng Metro Manila.

Karamihan sa mga taniman ay nalubog sa baha habang ang iba sanang aanihin ay dumapa at nasira kaya’t itinatapon na lamang ang mga ito.

Nagpapasaklolo naman sa national government partikular sa Department of Agriculture si La Trinidad Mayor Romeo Salda para sa kanilang mga magsasaka.

Sa tansa ng La Trinidad Agricultural Office, aabot sa halos 40 ektarya ang napinsala ng bagyong maring, kasama ang mga strawberry farm, na isa sa pangunahing kabuhayan ng naturang bayan.

Dahil dito, nagbabadya ring tumaas ang presyo sa bagsakan ng gulay o sa La Trinidad Trading Post na inaasahang maka-aapekto sa supply sa Metro Manila.—sa panulat ni Drew Nacino