HEADLINES

Umabot na sa 6,162,122 ang mga nagparehistro para sa 2022 elections.

Batay ito sa talaan ng COMELEC na inilabas ni Commissioner Rowena Guanzon mula 2019 hanggang nitong Setyembre.

Naitala ang pinakamalaking bilang mula Enero hanggang Setyembre ngayong taon na 3, 832,989.

Sa loob ng dalawang buwan mula Agosto 1 hanggang Setyembre 30, 2019, naitala ang pinakamabilis na registration na umabot sa 1,591,481 registered voters.

Noong nakalipas na taon ay sumampa naman sa 986,906 na botante ang nagparehistro.—sa panulat ni Drew Nacino

Nainsulto umano si Senator Panfilo Lacson sa  ikalawang unification meeting nila ni Senate President Tito Sotto III  kina Vice President Leni Robredo at Senator Franklin Drilon.

Ito, ayon kay Senator Lacson, ay dahil naramdaman  niyang hindi naman talaga unification ang intensyon ng pag-uusap.

Wala naman anyang malinaw na napag – usapan kung kanino nasa ilalim ang unification.

Partikular umanong nainsulto si Lacson sa sinasabing hand motion o pagsenyas ni Drilon kung saan itinuro si Sotto at Robredo na tila ang ibig sabihin ay silang dalawa ang magtambal at magwithdraw na lang siya.

Iginiit ni Lacson na mabuti na lamang ay hindi niya  napansin ang pagsenyas na ito ni Drilon pero pagkatapos ng pulong ay na-ikuwento sa kanya ni Sotto at doon na umano siya nainsulto.—sa panulat ni Drew Nacino mula sa ulat ni Cely Ortega-Bueno (Patrol 19)

Dapat ay masusing makipag-tulungan ang Inter – Agency Task Force sa mga Local Government Units sa National Capital Region.

Ito, ayon kay Senator Nancy Binay, ay dahil bukas ay isasailalim na sa alert level 3 ang Metro Manila kung saan marami ng negosyo ang magbubukas at luluwagan na ang pinatutupad na restrictions.

Mahalaga anyang i-check ng IATF kung handa na ang mga health at safety measures na ipatutupad sa mga magbubukas na establisyimento.

Dapat ding malinaw at hindi magkasalungat ang ipatutupad na patakaran sa NCR sa lahat ng age groups upang hindi maging magulo.

Iginiit ng senadorna kahit nakalatag lahat ng protocols, mababalewala umano ito kapag may isang infected o asymptomatic na makalusot at makapanghawa.—sa panulat ni Drew Nacino mula sa ulat ni Cely Ortega-Bueno (Patrol 19)

Balot pa rin ng pangamba ang mga health care worker sa kabila ng pagbaba ng mga kaso ng COVID-19 sa Metro Manila.

Ito ang inamin ni Metro Manila Council Chairman at Parañaque City Mayor Edwin Olivarez at isa sa dahilan ang healthcare utilization rate.

Ayon kay Olivarez, ang pagbaba ng healthcare utilization sa NCR ang ikinunsidera ng gobyerno upang pababain sa alert level 3 mula sa alert level 4 ang alert system simula bukas.

Kailangan pa rin anyang balansehin ang ekonomiya at kalusugan, lalo’t hindi pa maikokonsiderang stable na ang health care utilization rate sa Metro Manila.

Bukod sa utilization rate, tinukoy ng Alkalde na naging batayan sa desisyon ang pagbaba ng reproduction number ng COVID-19 cases.—sa panulat ni Drew Nacino

Desperadong hakbang ang paglipat ng Department Of Health (DOH) sa P42 bilyon budget sa Department of Budget and Management – procurement service upang ipambili ng medical supplies.

Ito ang inamin ni Health Secretary Francisco Duque III sa Senate hearing sa 2022 proposed budget ng DOH.

Ayon kay Duque, mababa ang supply ng face masks at personal protective equipment nang mamahagi ang kagawaran sa mga komunidad na naapektuhan nang sumabog ang Taal volcano noong Enero 2020.

Marami rin anyang mga tauhan ng ahensya ang na-isolate, na-quarantine o na-ospital habang may ilang namatay at may mga pondo para sa TB, HIV, family planning na hanggang ngayon ay ginagawa pa rin.

Ito umano ang dahilan kaya’t nang tinambakan ang DOH ng panibagong procurement demands ay nahirapan sila.

Nilinaw naman ng kalihim na hindi nakialam ang DOH sa procurement dahil hindi nila ito mandato.—sa panulat ni Drew Nacino

Nanininwala si Tourism Secretary Bernadette Romulo – Puyat na makatutulong ang pagpapababa ng alert level sa Metro Manila sa sektor ng turismo at negosyo lalo’t nalalapit na ang holiday season.

Sa ilalim ng alert level 3, papayagan na ang dine-in services, venues sa meetings, conferences, exhibitions, weddings, parties maging ang tourist attractions, kabilang na ang museums at parks.

Ayon kay Puyat, ikinalugod nila ang pag-downgrade ng alert level dahil nangangahulugan itong magbabalik-operasyon na ang mga tourism-related activities sa ilang piling lugar.

Makababalik na rin anya sa trabaho ang mga naapektuhang tourism worker na isang magandang pamasko para sa kanila.

Gayunman, mag-o-operate lamang ang mga business establishment nang hanggang 30% a indoor capacity para sa fully vaccinated individuals, batay sa DOT.—sa panulat ni Drew Nacino

Aabot na sa P545 milyon ang halaga ng mga nasabat na smuggled agricultural products ng Bureau Of Customs  (BOC) mula Enero hanggang Setyembre ngayong taon.

Ayon sa BOC, nangunguna sa mga produkto na kanilang naharang ang puslit na bigas na tinatayang P206.80 milyon; sibuyas, P190.48 milyon at bawang, P55 milyon.

Sa datos ng action team against smugglers ng legal service ng Aduwana, 41 indibidwal at customs brokers na ang kinasuhan sa Department Of Justice.

Sampung administrative cases naman ang inihain sa professional regulation commission laban sa mga customs broker na sangkot sa smuggling.—sa panulat ni Drew Nacino

Umabot na sa mahigit P1-B ang pinsalang dulot ng bagyong Maring sa sektor ng agrikultura.

Ayon sa Department of Agriculture, pinaka-matinding napinsala ang Cordillera, Cagayan Valley, Ilocos, Central Luzon, Bicol, Western at Central Visayas Regions.

Mahigit 35K magsasaka at mangingisda naman ang naapektuhanat aabot sa 59,514 metric tons at 52,132 hectares ng agricultural areas ang nasira o napinsala.

Kabilang sa mga apektado ang ekta-ektaryang maisan, palayan, high value crops, livestock at fisheries.

Magugunitang naglaan na ang DA ng P822 milyon bilang paunang tulong sa mga magsasaka at mangingisdang naapektuhan ng bagyo.—sa panulat ni Drew Nacino

Isinulong ni Health Secretary Francisco Duque III sa pamahalaan na bigyan ng booster shots kontra COVID-19 ang mga healthcare worker.

Gayunman, nilinaw ni Duque na dapat pa ring unahin ang mga hindi pa nababakunahan batay sa rekomendasyon naman ng mga eksperto.

Ayon sa kalihim, dapat munang matiyak na malaking porsyento ng populasyon ang bakunado na kahit unang dose ng COVID-19 vaccine.

Sa ngayon ay nasa 23.8 milyon o 31.8 % na ng target population ang fully vaccinated.

Una nang inihayag ni Health Undersecretary Maria Rosario Vergeire na walang pruwebang magpapatunay na nakapagbibigay ng kumpletong proteksyon ang booster shots laban sa COVID-19.—sa panulat ni Drew Nacino

Tiniyak ni Vaccine Czar, Secretary Carlito Galvez Jr. na sapat ang supply ng bakuna laban sa COVID-19 sa pagsisimula ng vaccination sa mga edad 12 hanggang 17.

Ayon kay Galvez, karamihan sa bulto ng deliveries ngayong 4th quarter ay mula sa Pfizer at moderna na gagamitin sa mga menor de edad.

Batay sa datos ng gobyerno, mahigit 1.3 milyon doses ng Moderna ang dumating noong Sabado kaya’t umabot na sa 85 milyon 575, 600 ang kabuuang bilang ng idineliver na bakuna.

Magugunitang iginawad ng Food and Drug Administration ang Emergency Use Authorization sa Pfizer at Moderna upang maiturok sa mga edad 12 hanggang 17.—sa panulat ni Drew Nacino