HEADLINES

Desperadong hakbang ang paglipat ng Department of Health (DOH) sa 42 billion pesos budget sa Department of Budget and Management – Procurement Service upang ipambili ng medical supplies.

Ito ang inamin ni Health Secretary Francisco Duque III sa senate hearing sa 2022 proposed budget ng DOH.

Ayon kay Duque, mababa ang supply ng face masks at personal protective equipment nang mamahagi ang kagawaran sa mga komunidad na naapektuhan nang sumabog ang taal volcano noong Enero 2020.

Marami rin anyang mga tauhan ng ahensya ang na-isolate, na-quarantine o na-ospital habang may ilang namatay at may mga pondo para sa TB, HIV, family planning na hanggang ngayon ay ginagawa pa rin.

Ito umano ang dahilan kaya’t nang tinambakan ang DOH ng panibagong procurement demands ay nahirapan sila.

Nilinaw naman ng kalihim na hindi nakialam ang DOH sa procurement dahil hindi nila ito mandato.—sa panulat ni Drew Nacino

Hiniling ni Labor Secretary Silvestre Bello III kay Pangulong Duterte na ipatupad ang deployment ban para sa Overseas Filipino Workers o OFW sa Saudi Arabia hinggil sa 4.6 bilyon na hindi pa nababayarang sahod.

Ayon kay Bello, taon 2016 pa nang maiulat na nasa 11,000 OFW sa Saudi Arabia ang hindi pa nasasahuran dahilan para utusan niyang pauwiin ang mga ito.

Samantala, inatasan na rin ni Bello sina Owwa Chief Hans Leo Cacdac at POEA Head Bernard Olalia na pag-aralan ang deployment ban sa naturang bansa.—sa panulat ni Airiam Sancho

Naglabas ang National Telecommunication Commission o NTC ng show cause order at cease and desist order laban sa Facebook, Lazada at Shopee.

Ito’y kaugnay sa pagbebenta ng text blast machine at iba pang kaparehong kagamitan na makikita sa mga nasabing online shopping platform.

Ayon sa ntc, maituturing na paglabag sa Republic Act 3846 o radio control law, kung saan nakasaad sa kautusan na walang otorisasyon na mag-import, gumawa at magbenta ng naturang kagamitan.

Samantala, inatasan ni NTC Commissioner Gamaliel Cordoba ang mga kinatawan ng Facebook, Lazada at Shopee na itigil ang pagbebenta ng text blast machine, gayundin ang magsumite ng paliwanag at humarap sa komisyon sa Oktubre 27.—sa panulat ni Airiam Sancho

Lumobo ang bilang ng kaso ng COVID-19 at  hospitalization rate sa Zamboanga peninsula.

Ayon kay Regional Director of Department Of Health Dr. Joshua Brillantes, naitala ang 46,000 kaso ng COVID-19 mula nang mag-umpisa ang pandemya.

Kasalukuyang nasa 2,927 ang aktibong kaso habang 841 ang namatay sa sakit.

Sinabi rin ni Brillantes na 74.4% ang bed occupancy rate o 799 ang okupado mula sa 1,074 na kabuuang bilang nito.

Samantala, 968, 000 doses na ang naipangasiwang bakuna ng Zamboanga sa mga residente nito kung saan 488,000 ang nakatanggap ng unang dose habang 479, 000 ang kumpleto na ng dalawang dose.—sa panulat ni Airiam Sancho

Tumaas lalo ang posibilidad na ideklarang Santo si Pope John Paul I matapos kilalanin ng Vatican ang himalang iniugnay sa kaniya.

Ang nasabing himala ay nangyari matapos ang biglaang paggaling ng isang 11 taon gulang na babae sa Buenos Aires noong 2011 na ipinagdasal ng pari kay John Paul I.

Kamakailan lang nang initorisahan ni Pope Francis ang congregation for the causes of saints na kilalanin ang mirakulong nagawa ni John Paul I.

Samantala, ang naturang hakbang ay apat na dekada ang lumipas nang pumanaw noong 1978 si John Paul I at pinakahuling Italian Pope na kinilala bilang “smiling Pope”—sa panulat ni Airiam Sancho

Arestado ang isang sundalo at isang babae matapos ang ikinasang buy-bust operation ng otoridad sa Taguig City.

Ayon sa report ng PDEA-NCR, nasamsam sa Barangay new lower Bicutan sa C-6 road ang 15 kilo o higit isang milyong halaga umano ng marijuana mula sa isang babae at naturang sundalo na active personnel ng Philippine Army.

Samantala, kasong paglabag sa Republic Act 9165 o Comprehensive Dangerous Drugs Act of 2002 ang isasampa sa dalawang suspek habang patuloy na iniimbestigahan kung sino-sino ang mamimili at kung saan galing ang suplay ng nasabing droga.—sa panulat ni Airiam Sancho

Aabot na sa 545 million pesos ang halaga ng mga nasabat na smuggled agricultural products ng Bureau of Customs (BOC) mula Enero hanggang Setyembre ngayong taon.

Ayon sa BOC, nangunguna sa mga produkto na kanilang naharang ang puslit na bigas na tinatayang 206.80 million pesos; sibuyas, 190.48 million pesos at bawang, 55 million pesos.

Sa datos ng action Team Against Smugglers ng legal service ng aduwana, 41 indibidwal at customs brokers na ang kinasuhan sa Department of Justice (DOJ).

Sampung administrative cases naman ang inihain sa Professional Regulation Commission (PRC) laban sa mga customs broker na sangkot sa smuggling.—sa panulat ni Drew Nacino

Itinanggi ni DILG Secretary Eduardo Año na nagsumite na siya ng shortlist sa Pangulong Rodrigo Duterte kaugnay sa susunod na PNP Chief.

Kasunod ito ng pahayag ni Presidential Spokesman Harry Roque na hawak na ng Pangulo ang shortlists at inaasahang i-aanunsyo kung sino ang bagong hepe ng PNP.

Sinabi ni Año na sa huling linggo pa ng Oktubre siya magsusumite ng shortlist  sa Pangulo kung saan pagbabatayan ang seniority, merit at service reputation ng kandidato.

Subalit ayon sa source ng DWIZ patrol, ilan sa mga matutunog sina Deputy Chief For Administration Lt/Gen. Joselito Vera Cruz, Deputy Chief For Operations Lt/Gen. Ephraim Dickson, Chief Of The Directorial Staff Lt/Gen. Dionardo Carlos at NCRPO Director Police Major Gen. Vicente Danao Jr.—mula sa ulat ni Jaymark Dagala (Patrol 9)