Pumalo na sa kabuuang 41, 149 ang kabuuang bilang ng mga dinapuan ng Covid-19 sa hanay ng Philippine National Police.
Ito’y matapos na maitala ng PNP health service ang 63 na bagong kaso ng virus.
1, 023 ang bilang ng mga aktibong kaso sa Covid-19.
40,004 na ang bilang ng mga nakarekober sa Covid-19.
Samantala, 122 na ang kabuuang bilang ng mga nasawi sa Covid-19 sa PNP.
Target ng DOH na mabakunahan kontra COVID-19 ang 1.2-M batang may Comorbidities.
Sinabi ni Health Undersecretary Maria Rosario Vergeire, batay sa datos ng Philippine Statistics Authority mayroong kabuuang 12.7-M na batang edad 12 hanggang 17 sa bansa.
Lumalabas na 10% sa nabanggit na bilang ang mga batang may Comorbidities na prayoridad bakunahan ng gobyerno.
Ngayong araw, umarangkada sa walong ospital sa Metro Manila ang pilot pediatric inoculation na layong palawigin ang vaccination program sa bansa.
Tiniyak ng DOH na accurate o tama ang COVID-19 statistics kahit hindi kasama ang resulta mula sa antigen testing.
Ayon kay Health Undersecretary Maria Rosario Vergeire, apat o limang LGU lamang sa Metro Manila ang gumagamit ng antigen tests.
Ipinabatid ni Vergeire na batay sa kanilang analysis sa buong bansa walang 5% ang nagpa positive sa antigen test at nababawasan pa ito aniya kapag naba validate nila.
Natukoy na ng DILG ang Local Government Units sa labas ng NCR na maaaring isailalim sa alert level system.
Ayon ito kay DILG Undersecretary Epimaco Densing, III matapos ilunsad ang alert level systems sa Metro Manila nuong Setyembre 16.
Gayunman hindi naman binanggit ni Densing ang mga nasabing lugar.
Pinaiimbestigahan ng PNP ang mga nasa likod nang paggawa ng mga pampasabog.
Kasunod na rin ito nang pagkaka aresto sa umano’y mastermind at mga kasabwat nito na supplier ng mga sangkap sa paggawa ng pampasabog sa magkahiwalay na operasyon sa General Trias, Cavite at Lucena City sa Quezon.
Ayon kay PNP Chief Police General Guillermo Eleazar, unang naaresto si Charlito Tenorio na supplier ng controlled explosive substances sa Cavite sa ikinasang buy-bust operation at sumunod na naaresto sa ikinasang follow-up operations ng CIDG sa Lucena City ang itinuturong mastermind ni Tenorio na si Jr Suson .
Nakumpiska sa naturang operasyon ang nasa 750 kilos ng ammonium nitrate na nakasilid sa 30 sako at 1,000 piraso ng improvised blasting cap na naka karga sa isang container van na nagkakahalaga ng P200,000. —sa ulat ni Jaymark Dagala (Patrol 9)
Palalakasin pa ng PNP ang ugnayan nito sa AFP kaugnay sa kampanya nila kontra loose firearms.
Kasunod na rin ito nang pagkakaaresto sa lima katao kabilang ang isang pulis at dalawang sundalo na sangkot sa gun running o iligal na pagbebenta ng mga armas sa datu odin sinsuat, maguindanao.
Kabilang sa mga naaresto sina Patrolman Eliver Jay Anggot Soverano na nakatalaga sa Police Regional Office-Bangsamoro Autonomous Regional Crime Laboratory, Army Staff Sgt Glenn Sangyao at Staff Sergeant Reynaldo Dichosa,II at mga sibilyang sina Datu Morjan Kunakon Tumindig at Adams Tumindig
Tiniyak ni PNP Chief Police General Guillermo Eleazar ang kasong kriminal at administratibo na isasampa sa mga pulis sa pagkakasangkot sa gun running activities na posibleng gamitin ng mga nais maghasik ng gulo at karahasan sa 2022 National Elections. —sa ulat ni Jaymark Dagala (Patrol 9)
Opisyal nang nagsimula ng La Niña sa bansa ayon sa PAGASA.
Ibig sabihin nito ay mararanasan ang mas malalakas na pag-ulan o higit pa sa normal na buhos ng ulan.
Sinabi ng PAGASA na posibleng tumagal ito hanggang unang bahagi ng 2022.
Samantala, ipinabatid din ng pagasa ang pagtatapos ng habagat at pagpasok naman ng amihan o tag-lamig.
Inilabas ng gobyerno ang updated na listahan ng “Red, Yellow At Green” Countries/Jurisdictions.
Ayon kay Presidential Spokesperson Harry Roque, ang Romania ay tanging bansa na kasama sa red list.
Ibig sabihin, mula Oktubre 16 hanggang 31 ay hindi muna maaaring makapasok ng bansa ang mga byaherong magmumula sa Romania dahil sa pagiging high risk ng bansa sa COVID-19.
Sa ngayon naman ay nasa 49 na ang nasa listahan ng green countries kung saan ang mga fully vaccinated na byaherong manggaling sa mga bansang kabilang dito ay maaari nang hindi sumailalim sa facility-based quarantine.
Ang mga bansa at teritoryo na kabilang sa green countries ay itinuturing na low risk sa COVID-19.
Samantala ang mga byaherong magmumula sa yellow countries ay kailangan pang sumailalim sa facility based quarantine hanggang sa lumabas ang negatibong resulta ng RT-PCR test nito sa na isinagawa sa ikalimang araw.
Ipinanawagan ng Makabayan Bloc sa Kamara ang agarang pagpapalabas ng pondo para sa ayuda sa mga nasalanta ng bagyong Maring.
Sa inihaing House Resolution 2296, nais ng grupo na agarang ma-irelease ang P10,000 emergency cash aid sa ilalim ng Assistance to Individuals in Crisis Situation (AICS) ng Department of Social Welfare and Development.
Binigyang diin sa resolusyon na dapat matugunan ang mga pangangailangan ng mga biktima ng bagyo partikular na ang mga nasa Northern Luzon at mga magsasaka lalo na ngayon na nasa gitna ng pandemya ang bansa.
Una nang sinabi ng Department of Agriculute na aabot sa P1-B ang halaga ng pinsala sa agrikulutura ng pananalasa ng bagyong Maring sa bansa.
Inihayag ni Vice President Leni Robredo na sakaling manalo siya sa pagka Pangulo ay hindi papasok ang Pilipinas sa kahit anomang kasunduan sa China na may kaugnayan sa West Philippine Sea.
Ito’y hangga’t hindi aniya kinikilala ng China ang 2016 Arbitral Ruling.
Sa kabilang banda, nilinaw ni Robredo na bukas siyang maka trabaho ang China sa mga bagay na hindi magiging kumplikado sa bansa.
Dagdag ni Robredo, naniniwala rin umano siyang mas magiging kapaki-pakinabang sa Pilipinas ang pagkakaroon ng “Inclusive At Independent” Foreign Policy.