HEADLINES

Hinikayat ng Philippine Drug Enforcement Agency (PDEA) ang mga botante na huwag iboto ang mga drug-tainted candidates na kumakandidato sa halalan 2022.

Ginawa ni PDEA Director General Wilkins Villanueva ang pahayag kasunod ng pagka-aresto noong Oktubre 13 kay Sonny Kalaw, isang dating police officer at kumakandidato sa pagka-alkalde ng Sabangan, Mountain Province.

Nakumpiska kay Kalaw at sa apat pa niyang mga kasama ang 19 bricks ng dried marijuana leaves na may street value na ₱2.28-M at isang itim na Toyota Hi-Ace Grandia.

Babala ni Villanueva, posibleng magpapatakbo ng kanilang kandidato ang mga nasa likod ng sindikato ng droga sa halalan sa mayo 2022.

Asahan aniya na babaha ang drug money para bilhin ang boto ng publiko.

Ani Villanueva, hindi malayo na may ilang re-electionist o mga bagitong kandidato ang popondohan ng drug syndicate ang kanilang kampanya kapalit ng protection sakaling mahalal ang mga minamanok nila sa puwesto.—sa panulat ni Angelica Doctolero

Arestado ng mga tauhan ng Philippine National Police Anti-Kidnapping Group (PNP-AKG) ang dalawang dayuhang Chinese matapos kidnapin ang kapwa nila Chinese sa Almaza Uno, Las Piñas City.

Sa imbestigasyon ng mga otoridad, dinukot ng dalawang puganteng tsino ang tatlong Chinese na mga empleyado ng Philippine Offshore Gaming Operators (POGO) sa bansa.

Kinilala ang mga biktima na sina, Su Pengyin, Zhiwei Xu at Cao Qi Su habang ang mga inaresto naman ay kinilalang sina Gao Yuan-Yuan at Qin Yue Hang na nakatira sa Huan, China.

Ayon sa mga otoridad, nakatanggap sila ng impormasyon mula sa Chinese Embassy nito lamang Oktubre 12 kaugnay sa umano’y illegal detention na ginawa sa tatlong Chinese victim.

Dito na ikinasa ng mga otoridad ang rescue operation sa Building D, Xunchuang Network Technology Inc., sa kahabaan ng Alabang-Zapote Road sa Almaza Uno, Las Piñas City at na-rescue ang mga biktima.

Nahaharap ngayon sa patung-patong na kaso ang mga naarestong suspek.—sa panulat ni Angelica Doctolero

Pinamamadali na ng kamara sa senado ang pagpasa sa pagpapatibay sa Department of Disaster Resilience (DDR Bill) na may layuning matugunan ang naging pinsala dulot ng bagyong Maring.

Matatandaang umabot sa mahigit 1.2 bilyong halaga ang nasira sa agrikultura dahil sa pananalasa ng bagyong Maring.

Bukod pa sa baha ay nasira din ang ilang mga daan at tulay habang nakaranas naman ng landslide sa ilang mga rehiyon.

Nasawi din ang nasa 30 indibidwal habang pinaghahanap pa ang ibang nawawala makaraang agusin ng agos ng baha.

Ayon kay ACT-CIS Partylist Rep. Eric Yap, dapat na mayroong ahensya na magbubuo at mangunguna upang maging maayos at malinaw ang sistema sa bansa.

Sinabi pa ni Yap na ito din ang gagabay sa pamahalaan at maghahanda sa taumbayan sa panahon ng kalamidad.—sa panulat ni Angelica Doctolero

Siniguro ng embahada ng Pilipinas sa Lebanon na walang Pinoy na nadamay, nasawi o nasaktan sa nangyaring street violence na naganap sa Beirut.

Matatandaang, nasawi ang anim na indibidwal matapos ang pag-atake ng mahigit 100 kalalakihan sa naturang lugar sa gitna ng lockdown.

Dahil dito, nagpaalala ang Philippine Embassy sa mga Pilipino community na nasa Lebanon na manatiling alerto, mag-ingat at iwasang magpunta sa matataong lugar.—sa panulat ni Angelica Doctolero

Tinayak ng mababang kapulungan ang pagsasabatas sa 5 point trillion 2022 national budget.

Ayon kay House Speaker Lord Allan Velasco, inihahanda na ng kamara ang pagta-transmit sa senado ng printed copy ng naturang batas upang mabigyan ng sapat na panahon ang mga senador na aralin ang spending plan ng gobyerno sa susunod na taon.

Kumpiyansa naman si Velasco na makakatulong sa pagbangon ng ekonomiya ng bansa ang 2022 national budget upang matugunan ang pangangailanan ng mga pilipinong naapektuhan bunsod ng COVID-19 pandemic.

Dahil dito, mas palalakasin pa nito ang covid-19 response ng pamahalaan, upgrade sa assets ng Philippine Air Force (PAF) at pagpopondo sa mga state Universities and Colleges (SUCS) sa Bangsamoro Autonomous Region in Muslim Mindanao (BARMM).—sa panulat ni Angelica Doctolero

Marami ngayon ang madalas na nakararanas ng pagkahilo o vertigo dahil sa inner ear problem ng isang tao kung saan, nag-uumpis ito sa  problema sa sipon o trangkaso at matagal itong gumaling na umaabot ng dalawang linggo.

Upang maiwasan ang ganitong sintomas, narito ang ilang mga tips para makontrol ang pagkahilo:

Umupo sa isang tabi at huwag munang gumalaw nang ilang segundo hanggang isang minuto.

Kung hindi naman grabe ang nararamdamang pagkahilo ay maari naman ituloy ang mga normal na gawain at isama ang palagiang paglalakad at pag-ehersisyo.

Dahan-dahan lang sa pagtayo kung ikaw ay nakahiga lalo na kung bagong gising at siguraduhin na ang inyong mga kamay at paa ay nasa maayos na kundisyon na bago tumayo.

Galaw-galawin ang iyong paa at hita upang umayos ang sirkulasyon ng dugo sa ating katawan.

Magsuot ng flat shoes at iwasang magsuot ng may takong dahil  mas mahihirapan kang magbalanse.

Mas mainam padin ang pagsuot ng rubber shoes para maging matatag ang iyong paglalakad.

Bawasan din ang pag-inom ng alak at sigarilyo at alisin ang asin sa ating pagkain dahil posibleng dumami ang tubig sa ating katawan na nagdudulot ng pagkahilo.

Uminom ng salabat o gamot kagaya ng bonamine at uminom ng walo hanggang labing dalawang oras.

Matulog ng maaga, magbawas ng stress at magrelax.—sa panulat ni Angelica Doctolero

Posibleng magkaroon na ng suplay ang Pilipinas ng bagong Covid-19 oral drug na Molnupiravir bago matapos ang taon.

Ayon kay Infectious Disease Expert  Rontgene Solante, nakikita na malaking benepisyo ang pinag-aaralang gamot na Molnupiravir para sa mga senior citizen o 60 pataas, may mga comorbidities tulad ng may sakit sa puso at obese.

Paliwanag ni Solante, ibibigay ang nasabing gamot sa mga mild hanggang moderate cases at hindi sa mga may severe symptoms.

Samantala, ipinabatid ng FDA na ilang ospital na rin sa bansa ang kasama sa clinical trials para sa gamot na Molnupiravir.

Bukod dito, nasa proseso na rin aniya ang pag-aaply ng Compassionate Special Permit o CSP pa sa nasabing gamot.

Pinag-aaralan ngayon ng mga expert group ng Department of Health ang pagbibigay ng booster shot kontra Covid-19 sa mga highly vulnerable population.

Ito’y makaraang irekomenda ng World Health Organization na mabigyan ng pangatlong bakuna  ang mga indibidwal na hindi nakapagdevelop ng immunity mula sa virus kahit fully vaccinated na ang mga ito.

Ipinabatid ni FDA Director General Eric Dominggo, kabilang sa mga maaaring makatanggap ng booster shot ay ang mga health care workers at senior citizen.

Samantala, maaari lamang ibigay ang booster shot kapag naabot na ang target population at may sapat na supply na ng bakuna ang bansa.