HEADLINES

Posibleng magkaroon na ng suplay ang Pilipinas ng bagong COVID-19 oral drug na Molnupiravir bago matapos ang taon.

Ayon kay Infectious Disease Expert Rontgene Solante, nakikita na malaking benepisyo ang pinag-aaralang gamot na Molnupiravir para sa mga senior citizen o 60 pataas, may mga comorbidities tulad ng may sakit sa puso at obese.

Paliwanag ni Solante, ibibigay ang nasabing gamot sa mga mild hanggang moderate cases at hindi sa mga may severe symptoms.

Samantala, ipinabatid ng FDA na ilang ospital na rin sa bansa ang kasama sa clinical trials para sa gamot na Molnupiravir.

Bukod dito, nasa proseso na rin aniya ang pag-a-apply ng Compassionate Special Permit (CSP) pa sa nasabing gamot.

Magsasagawa ng paghahanda ang pamunuan ng mga sinehan sa mga ipatutupad na panuntunan bago ganap na buksan sa mga fully vaccinated individuals ang kanilang serbisyo.

Ito ay kasunod ng pagpayag ng IATF na makabalik na sa operasyon ang mga sinehan sa ilalim ng alert level 3 sa Metro Manila, simula ngayong araw.

Sa Laging Handa briefing, sinabi ni DTI Usec. Ireneo Vizmonte, ito ang dahilan kung bakit hindi agad-agad  na makakapagbukas ng mga sinehan sa bansa.

Aniya, kailangan munang tiyakin ng mga ito na magkakaroon ng maayos na bentilasyon sa mga establisyimento, masiguro na masusunod ang social distancing ng mga manunuod lalo na’t 30% lamang ang pinapayagang venue capacity.

Bukod dito, kabilang sa guidelines na kanilang ipinatupad ay hindi maaaring alisin ng kanilang kustomer ang suot na facemask, hindi pagkain sa loob ng sinehan at kailangan rin mayroong safety officers na magbabantay sa loob ng venue.

Target ng health department na mabakunahan kontra COVID-19 ang nasa 1.2 milyong kabataan na may comorbidity.

Ito ay kasabay ng pagsisimula ng pediatric vaccination sa bansa.

Sinabi ni Health Undersecretary Maria Rosario Vergeire, base umano ito sa sampung porsiyento ng kabuuang 12.7 milyong kabataan na may edad na 12 hanggang 17 anyos.

Dagdag ni Vergeire, kasama sa pediatroc vaccination ay kailangaan ring may pahintulot mula sa kanilang magulang at dapat pumapayag ito na mabakunahan.

Bukod dito, sasailalim ang bawat kabataan na nabakunahan sa 15 minutong monitoring at 30 minuto ang ilalaan sa mga mayroong asthma, allergies at anaphylaxis.

Samantala, binigyang linaw ni Vergeire na kailangan na nakarehistro ang kabataan na kasama sa pediatric vaccination dahil mahigpit na ipinagbabawal ang walk-ins sa mga ito.

Pumalo na sa kabuuang 41,149 ang kabuuang bilang ng mga dinapuan ng COVID-19 sa hanay ng Philippine National Police (PNP).

Ito’y matapos na maitala ng PNP Health Service ang 63 na bagong kaso ng virus.

1, 023 ang bilang ng mga aktibong kaso sa COVID-19.

40,004 na ang bilang ng mga nakarekober sa COVID-19.

Samantala, 122 na ang kabuuang bilang ng mga nasawi sa COVID-19 sa PNP.

Pinag-aaralan ngayon ng mga expert group ng Department of Health (DOH) ang pagbibigay ng booster shot kontra COVID-19 sa mga highly vulnerable population.

Ito ay makaraang irekomenda ng World Health Organization (WHO) na mabigyan ng pangatlong bakuna ang mga indibidwal na hindi nakapag-develop ng immunity mula sa virus kahit fully vaccinated na ang mga ito.

Ipinabatid ni FDA Director General Eric Dominggo, kabilang sa mga maaaring makatanggap ng booster shot ay ang mga healthcare workers at senior citizen.

Samantala, maaari lamang ibigay ang booster shot kapag naabot na ang target population at may sapat na supply na ng bakuna ang bansa.

Naghayag ng pagkaduda ang Hong Kong Union of Employment Agencies sa kapasidad ng ilang COVID-19 testing institutions sa Pilipinas.

Ito ay kaugnay sa halos araw-araw na pagkakaroon ng OFW na nagpopositibo sa COVID-19 pagdating sa Hong Kong.

Ayon sa samahan, posibleng hindi sensitibo ang ginagamit na RT-PCR test  sa mga testing institutions sa Pilipinas.

Dahil dito, inirerekomenda nila sa Philippine government na tutukan ang sistema sa mga testing centers at kastiguhin ang mahuhuling hindi naglalabas ng tamang resulta.

Dumating na sa bansa ang karagdagang mahigit 800K doses ng Astrazeneca COVID-19 vaccine kahapon.

Nasa 844, 800 na doses ng Astrazeneca na mula sa Covax Facility at donasyon ng gobyerno ng Germany.

Ang naturang bakuna ay lulan ng Emirates Airlines flight EK 332 na lumapag sa Ninoy Aquino International Airport (NAIA) terminal 3 bandang alas kwatro ng hapon, kahapon.

Samantala, nagpahayag naman ng pasasalamat si Vaccine Czar Carlito Galvez Jr. Sa pamahalaan ng germany.

Aniya, mahigit 400 Filipino ang magbebenepisyo ng mga dumating na bakuna.

Umabot sa mahigit 1,000 menor de edad na may comorbidity ang naturukan ng bakuna kontra COVID-19.

Sa isinagawang pilot implementation ng pediatric group kahapon, karamihan sa mga nabakunahan ay mula sa Philippine Heart Center, Makati Medical Center,  St. Lukes Medical Center-Global City at Pasig City Children’s Hospital.

Batay sa datos ng health department nasa halos 1.2 milyon ang menor de edad na may comorbidities mula  12 hanggang 17 taong gulang sa bansa.

Samantala, hinihikayat naman ni Health Secretary Francisco Duque III ang mga magulang at kabataan na makilahok sa isinasagawang pagbabakuna ng pamahalaan upang masiguro ang kaligtasan ng bawat isa.