HEADLINES

Patay ang dalawang taong gulang na bata matapos matuklaw ng ahas sa bayan ng Nabunturan, Davao de Oro.

Ayon sa ina ng biktima, galing sa trabaho at pauwi na ito sa bahay ng sinalubong ito ng kanyang panganay na anak na nagsabi na may napatay silang kobra.

Hindi napansin ng pamilya na nakagat pala ng ahas ang batang si Rianna.

Huli na nang maisugod ang bata sa ospital dahil pumanaw na ito at nakumpirmang natuklaw ito sa daliri.

Hindi niya umano pinalabas ng bahay ang mga anak dahil sa pangamba dulot ng pandemya pero nasawi naman ito dahil sa nangyaring insidente.

Mahigit isang milyong doses ng Pfizer Biontech COVID-19 vaccine ang dumating sa bansa kagabi.

Lumapag ito sa Ninoy Aquino International Airport sa Pasay City dakong alas nuebe ng gabi.

Mananatili ang 762,290 sa Metro Manila habang ang 141,570 doses ay ipapadala sa Cebu at 64,350 naman ang ide-deliver sa Davao.

Ang nasabing bakuna ay karagdagan sa 2,290,860 Pfizer Biontech vaccine na binili ng pamahalaan sa tulong ng Asian Development Bank.

Samantala, inaasahan namang darating ngayong araw ang bakunang gawa ng US manufacturer.

Matatandaan, ang bakunang Pfizer ay isa sa COVID-19 vaccine na binigyan ng FDA ng Emergency Use Authorization (EUA) para sa pagbabakuna sa mga menor de edad sa bansa.

Inihayag naman ni Senate Vicente Sotto III ang kanyang listahan na napupusuan ng kanilang tandem ni Sentator Panfilo Lacson para sa senatorial slate.

Kabilang sa listahan sina Sen. Sherwin Gatchalian, Sen. Joel Villanueva, Sen. Migz Zubiri, Sen. Richard Gordon, Antique Congresswoman Loren Legarda, Ex-Vice President Jojo Binay, Dict. Sec. Gringo Honasan, Dating Senador JV Ejercito, Sorsogon, Gov. Chiz Escudero, Dating Mayor Herbert Bautista, dating Agriculture Sec. Manny Piñol, Dr. Minguita Padilla, dating Makati Congressman Monsour Del Rosario, Paolo Capino, PWD Advocate

Sa kabilang dako naman,  pormal na ring inanunsyo ni  Sen. Manny Pacquiao ang kanyang initial senatorial slate para sa 2022 national elections.

Kabilang dito sina Sen. Joel Villanueva, Sen. Migz Zubiri, Sen. Dick Gordon, Sorsogon, Gov. Chiz Escudero, dating Vice President Jojo Binay, Rep. Loren Legarda, Atty. Neri Colmenares, dating Gov. Lutgardo Barbo, Broadcaster Raffy Tulfo, Labor Leader Elmer Labog.

Isinapubliko na ni Vice President Leni Robredo ang 11 miyembro ng kanyang senatorial slate para sa eleksyon 2022.

Kabilang dito sina Senator Richard Gordon, Senator Joel Villanueva, Senator Miguel Zubiri, Senator Risa Hontiveros, Senator Leila De Lima, Dating Vice President Jejomar Binay, Dating Representative Teddy Baguilat, Sorsogon Governor Chiz Escudero, Dating Senator Antonio Trillanes IV, Atty. Chel Diokno, Alex Lacson ng Kapatiran.

Sa ngayon, pumipili pa ang grupo ni Robredo para 12 slot sa senatorial slate.

Posibleng maraming magpabakuna kontra COVID-19 dahil sa pagluluwag ng restriksyon sa Metro Manila.

Ayon kay DOH Health Undersecretary Maria Rosario Vergeire, naniniwala ang kagawaran na mahihikayat pa ang publiko na magpaturok ng bakuna dahil batid nila na fully vaccinated lamang ang pinapayagan sa mga establisyimento.

Dagdag ni Vergeire, sa mga negosyong nagbukas, lalo na sa mga enclosed na lugar, pinapayagan lamang na makapasok rito ay mga naka kumpleto na ng bakuna.

Umaasa ang DOH na susundin pa rin ng publiko ang ipinatutupad na safety protocols ng mga establisyimento kahit na fully vaccinated na ang mga ito.

Nagbukas ng ilang gates ang tatlong dam sa Luzon para sa inaasahang spilling operations ngayong araw na ito.

Ayon sa PAGASA, ala-6 ng umaga nagbukas ng dalawang gates sa tig isang metro ang Ambuklao Dam sa Benguet.

Ang water level ng Ambuklao Dam ay nasa 751 meters o isang metro na lamang sa spilling level nito.

Samantala, ang Binga Dam ay nagbukas ng tatlong gate sa 1.5 meters kada isa dahil malapit na sa 575 meter normal high water level ang reservoir ng water level ng Binga Dam.

Mahigit isang metro na lamang na malapit sa 193 meter spilling level ang water level ng Magat Dam kaya’t nagbukas ito ng isang gate.

Una nang nagpalabas ng tubig ang mga naturang dam dahil sa bagyong Maring.

Nakatulong ang pilot implementation ng alert level system sa Metro Manila na makontrol ang kaso ng COVID-19 sa rehiyon.

Ito ang inihayag ng one Hospital Command Center  (OHCC).

Ayon kay Dr. Marylaine Padlan ng OHCC,  nagpapakita ng pagbaba ng arawang daily cases ang pagpapatupad ng alert system sa NCR.

Bukod dito, kumonti na rin  aniya ang nagre-require ng isolation facilities o ng hospitalization kumpara sa mga nakaraang buwan na kasagsagan ng surge ng virus.

Samantala, sinabi pa ni Padlan na bumaba ang average nang natatanggap nilang tawag sa OHCC.

Nakipagsanib puwersa na ang COMELEC sa iba’t ibang social media sites para mabantayan ang mga post ng mga kandidato sa 2022 National Elections.

Ipinabatid ni COMELEC Spokesperson James Jimenez na binigyan sila ng access at tools ng Facebook, Instagram, YouTube at Tiktok para ma regulate ang political advertisements at ilang aktibidad ng mga tatakbong kandidato.

Sinabi ni Jimenez na magsisimula silang maghigpit ng political campaign sa February 2022 na simula na ng official campaign period para sa mga national candidates.

Mayruon aniya silang itinalagang mga tao sa ibat ibang social media sites para mabantayan ang mga pulitiko.

Tumaas ang cash remittances na ipinadaan ng mga Pilipino sa bangko sa buwan ng Agosto.
Ipinabatid ng Bangko Sentral ng Pilipinas (BSP) na nasa 5.1% o katumbas ng halos $2.7-B ng cash remittance mula sa mga Pinoy na nasa ibang bansa.
Malaking kontribusyon sa pagtaas ng remittance ay mula sa mga land at sea based workers partikular sa Amerika, Malaysia at South Korea.