HEADLINES

Patay ang isang barangay councilor matapos pagbabarilin ng hindi pa nakikilalang salarin sa Pasig City.

Kinilala ni Pasig Police Chief Col. Roman Arugay ang biktima na si Nicky Cruz, nasa hustong gulang, at residente ng Barangay Rosario.

Sa imbestigasyon, nakaupo lang sa bungad ng isang tindahan si Cruz nang lapitan ng salarin at walang awang pinagbabaril.

Inaalam pa ang motibo sa pamamaslang, gayundin ang pagkakakilanlan ng gunman na mabilis na tumakas sakay ng motorsiklo.

Muling magbibigay ang bansang Japan ng mahigit dalawang milyong dose ng bakunang Astrazeneca sa Pilipinas.

Ayon kay Japanese Foreign Minister Motegi Toshimitsi, ang karagdagang donasyon ng bakuna ay ide-deliver ng kada-batch ngayong buwan.

Samantala, una nang nagbigay ang Japan ng higit isang milyong dose ng naturang bakuna noong Hulyo, 8.

Posibleng magdulot ng masamang epekto sa kalusugan ang pagtatrabaho sa gabi.

Ayon sa mga eksperto, maari itong magdulot ng mga sakit tulad ng prostate at breast cancer, katabaan at sakit sa puso lalo sa mga call center agents, entertainers, securtiy guards at iba pa.

Ipinaliwanag ng mga eksperto na ang lebel ng melatonin, isang kemikal na nakatutulong sa ating pagtulog ay posibleng bumaba dahil ito ay nakadepende sa kapaligiran na tumataas kung madilim at natutulog ang isang tao, ngunit bumababa kung may liwanag o sikat ng araw.

Samantala, maaring malunasan ang ganitong mga sakit tulad ng pagbabawas ng liwanag ng komputer o gadyet, pag-gamit ng yellow light sa halip na white flourescent light sa kwarto.

Gayundin, ang pagbawi ng pito hanggang walong oras na pagtulog sa umaga, pag-eehersisyo at pagkonsumo ng mga masusustansyang pagkain.

Hinikayat ni Navotas City Mayor Toby Tiangco ang mga magulang na iparehistro ang kanilang mga anak na 12 hanggang 17 taon gulang na may comorbidity upang mabakunahan laban sa COVID-19.

Ayon kay Tiangco, magsisimula ang naturang pagbabakuna sa Oktubre 22, 2021 sa Ospital ng Navotas.

Aniya, nakatanggap ng text message ang lokal na pamahalaan para sa iskedyul ng pagbabakunang Pfizer at Moderna.

Samantala, hiniling ni Tiangco sa mga residente nito na magpabakuna upang magkaroon ng preoteksyon at mas lumiit ang tyansa na mahawaan at kumalat ang naturang virus.

Kailangang pang mag-apply ng Emergency Use Authorization (EUA) ang vaccine manufacturers para sa third dose ng COVID-19 vaccine o booster shot.

Ayon ito kay Health Undersecretary at National Vaccination Operations Center Myrna Cabotaje dahil ang EUA ng vaccine manufacturers ay para lamang sa dalawang doses ng COVID-19 vaccine at para matiyak na rin aniyang ligtas ang ituturok na booster shot.

Sakaling makakuha ng EUA ang vaccine makers para sa booster shot ipinabatid ni Cabotaje na ipa-prioritize ng gobyerno ang senior citizens, healthcare workers at immunocompromised individuals.

Muli binuksan sa publiko ang dolomite beach sa Manila bay ngayong araw na ito.

Dinagsa ng maraming tao ang dolomite beach kaninang umaga bitbit ang kanilang celfon para muling masilyaan ang man made attraction.

Samantala, bantay sarado naman ng mga otoridad ang area para tiyaking nasusunod ang health and safety protocols.

Nasa 300 hanggang 500 individuals lamang ang kada batch na pinapayagang bumisita sa dolomite beach.

Tuloy-tuloy ang pagpaparamdam ng bulkang taal na nananatiling nasa alert level 2.

Sa nakalipas na 24 oras ipinabatid ng PHIVOLCS na 12 volcanic tremor ang naitala mula sa bulkang taal.

Naglabas din ng hot volcanic fluids ang bunganga ng nasabing bulkan na patuloy sa pamamaga.

Sinabi ng PHIVOLCS na masyadong mataas ang inilabas na halos 24 thousand tonnes ng sulfur dioxide ng bulkang taal.