HEADLINES

Inilunsad ng Department of Environment and Natural Resources (DENR) ang Nationwide Solid Waste Management Advocacy Campaign para sa pangangalaga sa kapaligiran at tamang pangangasiwa at pagtatapon ng basura

Kabilang sa naturang advocacy campaign ay upang magbigay mulat sa pangangalaga ng kapaligiran.

Ipinabatid ni Undersecretary Benny Antiporda,  kasama sa DENR solid waste management campaign ay ang basura buster, isang free, web-based game application para sa mga batang may edad na 5  hanggang 8 taon gulang.

Ang naturang kampanya ay ginawa upang mapabilis ang pagkakaroon ng malusog, luntian at malinis na Pilipinas sa gitna ng mga banta sa kalikasan sa bansa at sa buong mundo.

Samantala, umaasa ang DENR na susuportahan ang nasabing kumpanya para sa  tamang pangangasiwa at pagtatapon ng basura sa pang-araw-araw na pamumuhay.

Dumating na sa bansa ang 207,090 doses ng Pfizer na binili ng Pilipinas kontra COVID-19 kagabi.

Dumating na sa bansa ang karagdagang mahigit dalawan daang libong doses ng Pfizer Biontech COVID-19 vaccine kagabi.

Nasa 207, 090 na doses COVID-19 vaccine na binili ng gobyerno  mula sa manufacturer ng Pfizer at German Biontech.

Ang naturang bakuna ay  lumapag sa Ninoy Aquino International Airport (NAIA) Terminal 3 bandang alas nuebe kagabi.

Ayon kay National Task Force Against COVID-19 Special Adviser Dr. Ted Herbosa, ang mga dumating na bakuna ay ilalaan para sa pagbabakuna sa edad 12 hanggang 17 taong gulang.

Ang mga nasabing bakuna ay nakatakdang ipamahagi sa lalawigan Cebu at Davao City.

Hinimok ni Senator Nancy Binay ang Inter Agency Task Force (IATF) na makipag-ugnayan sa mga Local Government Units (LGU’s)  sa pagpapatupad ng mga panuntunan sa ilalim ng Alert level 3 system sa Metro Manila.

Sinabi ni Binay na mahalagang natse-tsek ng mabuti ng IATF kung ano ang ginagawang paghahanda  ng mga establisyimento para maiwasan ang hawaan ng virus sa bansa.

Bukod dito, dapat rin aniya may malinaw at hindi magkakasalungat ang ipatutupad na patakaran sa NCR sa lahat ng age groups para hindi magulo.

Hindi rin malinaw kay Binay kung may inilatag ang IATF na guidelines para maging ligtas sa virus ang mga sinehan at arcades.

Mababalewala aniya ang lahat ng ipinatutupad na health protocols kung mayroong infected o asymptomatic na movie-goer ang makalusot at makapanghawa sa mga binuksang establishment.

Nilinaw ng Health Department na ang nakuhang dagdag pondo ng DOH hospitals at iba pang implementing units ay ginamit sa  serbisyong medikal sa taumbayan.

Giit ni Health Undersecretary Leopoldo Vega, kabilang sa pinagkagastusan ay ang pagpapatayo ng mga pasilidad at pagbili ng mga mahahalagang gamit para sa implementing units.

Bukod dito, sinagot naman ng PhilHealth ang ibang gastusing medikal.

Sinabi rin ng kagawaran na naitama na nila ang maling ulat ng Department of Budget and Management (DBM) hinggil sa projected retained income para sa taong 2021 sa 98 implementing units.

Posibleng tumaas ang presyo ng gulay dahil sa epekto na iniwan ng bagyong Maring sa bansa.

Sinabi ni Agriculture Assistant Secretary Kristine Evangelista  na sadyang tataas ang presyo matapos sirain ng bagyong Maring ang mga lupang pansakahan sa Northern Luzon.

Batay sa huling tala, nasa halos P 2-B na halaga ang danyos na iniwan ng bagyong Maring at nasa 56K naman ang naapektuhang magsasaka at mangingisda at 68 hektaryang lupain ang nasira.

Ipinabatid naman ni Evangelista na naghahanap ang Agriculture Department ng alternatibong source ng mga gulay upang masigurong hindi masyadong gagalaw ang presyo ng gulay para sa mga konsyumer.

Suspendido pa rin ang color coding o number coding scheme sa Metro Manila  sa ilalim ng alert level 3.

Ito ay dahil hindi pa rin bumabalik sa normal ang public transportation sa National Capital Region (NCR).

Sinabi pa ni MMDA Chair Benhur Abalos na magagarantiya nito na mas ligtas sa kanilang mga sasakyan kumpara kung makikipagsiksikan pa ito sa mga pampublikong sasakyan tulad ng Mrt at bus.

Samantala, tiniyak naman ng MMDA na araw-araw pa rin nilang mino-monitor ang trapiko sa NCR.

Sa kasalukuyan, batay sa kanilang pag-aaral, kaya pa naman aniyang kontrolin ang mga sasakyan kahit suspendido ang color coding.

Binigyang diin ni Metro Manila Development Authority (MMDA) Chair Benhur Abalos na nagkaisa ang mga Metro Manila Mayors sa major policies kaugnay sa implementasyon ng alert level 3 na nagsimula na kahapon.

Ito ang tugon ni Abalos kasunod ng ulat na sinabi umano ni Marikina Mayor Marcy Teodoro na hindi kinonsulta ang mga alkalde  at hindi inilatag ng maayos ang guidelines hinggil sa pagsasailalim sa Alert Level 3 ng Metro Manila.

Ayon kay Abalos, desisyon ng Department of Health (DOH) ang pagbaba ng alert level sa NCR.

Dagdag pa ni Abalos, isang ahensiya lamang ang magde-determine  hindi ang mga alkalde o sinuman maging ang DTI dahil nakasailalim sa kondisyon ng pilot ay DOH lamang ang maaaring magsagawa ng pagbaba ng alert level sa bansa.

Aniya, ang DOH ang epidemiologist, sila ang eksperto pagdating sa kalusugan ng bawat isa.

Nakatakdang talakayin ng Metro Manila Mayors kung papayagan ang mga menor de edad at senior citizen na lumabas sa gitna ng pagpapatupad ng alert level 3 sa Metro Manila.

Batay sa pinakahuling na datos na inilabas, pinagbabawalan pa rin lumabas ang mga kabataan at senior citizen sa  lungsod ng Valenzuela, Quezon City, Pateros, San Juan at Paranaque.

Sa lungsod ng San Juan,  pinapayagan lamang lumabas ang mga kabataan pero para lamang sa essential activities.

Ayon kay San Juan Mayor Francis Zamora, lilinawin niya sa kanilang isasagawang pagpupulong kung papayagan ang mga bata na kumain sa mga restaurant at sa ilang public areas.

Sa kabilang dako, sinabi ni Navotas City Mayor Toby Tiangco na  sisikapin ng Metro Manila Mayors na magkaroon ng  uniform policy para sa NCR kaugnay pa rin sa naturang isyu.

Aniya, mahirap kung dedepende sa bawat LGU dahil magbibigay ito ng kalituhan sa mga mamamayang pilipino.

Nakapagtala ang Pilipinas ng mahigit 7-K bagong  kaso ng COVID-19 sa bansa.

Batay sa inilabas na datos ng Department of Health (DOH), nasa 85,048 ang aktibong kaso ng virus sa Pilipinas matapos madagdagan ng 7,772.

Nasa 2,713,509 ang kabuuang bilang ng COVID-19 case sa bansa.

Habang nasa 2,587,881 na ang kabuuang bilang ng mga gumaling sa COVID-19 matapos na madagdagan ng 1,634 .

40,580 naman na ang bilang ng mga nasawi sa COVID-19 matapos na maitala ang 156 na panibagong mga nasawi sa virus.

Naging epektibo ang unang araw ng implementasyon ng alert level 3 system sa kalakhang Maynila.

Sa Laging Handa briefing, sinabi ni Metropolitan Manila Development Authority (MMDA) Chair Benhur Abalos , ino-obserbahan nila ngayon ang pagsisimula ng alert level sa Metro Manila para maiwasan ang pagtaas ng kaso ng COVID-19 sa bansa.

Aniya, patuloy nilang pinaaalalahanan ang publiko na sundin pa rin ang mga ipinatutupad na safety protocols para mapigil ang hawaan ng virus.

Paliwanag pa ni Abalos, napagkasunduan ng mga Metro Manila Mayors na magkaroon ng unified guidelines sa lahat ng bayan ng Metro Manila.

Mas makakabuti aniya na iisang alert level lamang ang ipapatupad  kung saan unified din ang ini-implement na ordinansa  sa curfew, undas at major policies sa NCR.