HEADLINES

Tiniyak ni Transportation Acting Secretary Giovanni Lopez na hindi maaapektuhan ang operasyon ng EDSA Busway sa kabila ng nakatakdang rehabilitasyon sa EDSA na magsisimula sa susunod na linggo.

Ayon kay Secretary Lopez, sapat ang bilang ng mga pampublikong bus na magbibiyahe habang isinasagawa ang rehabilitasyon.

Sa kasalukuyan, sinabi ng kalihim na nasa 260 bus units ang tumatakbo sa EDSA Busway at may karagdagang 60 bus na maaaring i-deploy kung kinakailangan.

Mula December 24, 2025 hanggang January 5, 2026, unang aayusin ang inner lane na ginagamit ng mga bus.

Pagkatapos ng pagsasaayos sa naturang linya, ililipat ang mga concrete barrier upang buksan ang second innermost lane habang nagpapatuloy ang rehabilitasyon.

Samantala, sinabi ni Sec. Lopez na hindi na maipagpapaliban o mapapalawig pa ang oras ng operasyon ng MRT-3 sa sandaling magsimula ang EDSA rehabilitation.

Gayunman, tiniyak ng kalihim na tuloy-tuloy ang byahe ng MRT-3 at palaging may sapat na bagon para sa mga pasahero sa pagsisimula ng deployment ng mga bagong Dahlia trains sa Pasko.

Walang personal na kaalaman si Pangulong Ferdinand Marcos Jr. sa mga paratang ng sinasabing bagman ni Vice President Sara Duterte na si Ramil Madriaga.

Ito ang paglilinaw ng Malacañang kasunod ng pagsusumite ni Madriaga ng kanyang sinumpaang salaysay sa Office of the Ombudsman na nagsasabing mula sa POGO at drug money ang campaign funds ng pangalawang pangulo noong 2022 elections.

Ayon kay Palace Press Officer Usec. Claire Castro, walang masasabi ang pangulo tungkol sa isyu dahil wala siyang direktang nalalaman sa anumang posibleng transaksyon ng bise presidente sa mga POGO operators at mga sinasabing drug lords.

Ito’y sa kabila ng pagiging running mate nila noong 2022 national elections.

Bumaba ng 2.16% ang visitor arrivals sa bansa sa unang labing-isang buwan ng taon.

Ayon sa Department of Tourism, ito’y sa gitna ng pagbaba ng bilang ng mga dumarating na turista mula sa South Korea at China.

Sa datos ng DOT, lumitaw na bumaba sa 5.235 million ang international tourist arrivals sa January-to-November period mula 5.35 million sa kaparehong panahon noong 2024.

Kabuuang 4.918 million sa tourist arrivals ay mga dayuhan, habang ang nalalabi ay overseas Filipinos.

Nananatiling pinakamalaking pinagmulan ng mga turista ang South Korea, na sinundan ng Estados Unidos, Japan, at Australia.

Isang rare Philippine pied fantail na may kakaibang kulay ang namataan sa Great Sta. Cruz Island sa Zamboanga City.

Ayon sa DENR–Zamboanga Peninsula, nadokumento ang ibon ng isang environmental management specialist habang nagpapatrol ang mga kawani ng Protected Area Management Office sa Great at Little Sta. Cruz Islands.

Ang ibon ay may leucism, isang kondisyon sa genes na nagpapaputi o nagpapaliwanag ng balahibo ng ibon ngunit hindi naaapektuhan ang kulay ng mata at paningin.

Ipinaliwanag ng DENR na iba ang leucism sa albino. Ang mga albino ay karaniwang purong puti at may pulang mata, samantalang ang mga leucistic na ibon ay may normal na paningin.

Ang Philippine pied fantail ay matatagpuan lamang sa Pilipinas.

Nagbabala ang International Labour Organization na maaaring mapag-iwanan ang Pilipinas sa paglikha ng de-kalidad na trabaho sa global green transition dahil nananatiling nakatuon ang nickel industry sa pag-export ng raw ore.

Ayon sa ILO, limitado ang papel ng bansa sa supply chain ng manual at extraction-oriented na trabaho, kaya mababa ang tsansa ng pag-angat ng sahod at kasanayan ng mga manggagawa.

Batay sa datos ng organisasyon, may siyamnapu’t tatlong libong formal workers ang mining sector, ngunit mas marami pa ito kung isasama ang mga informal at subcontracted employment.

Iniulat din ng ILO ang seryosong isyu sa sahod at kaligtasan, kabilang ang delayed at withheld wages, irregular contracts, predatory lending, hindi naihuhulog na social security, at exposure sa nickel dust, kulang na protective equipment, at mahinang regulasyon.

Ikinumpara ng ILO ang Pilipinas sa Indonesia at Mongolia, na may mas malakas na downstream processing na nagbunga ng mas pormal, mas mataas ang sahod, at mas protektadong trabaho, patunay na mahalaga ang industrial policy sa kalidad ng trabaho sa critical minerals.