HEADLINES

Pinag-aaralan na ng pamahalaan ang pagkakaloob ng amnestiya sa mga colorum driver at operator na mag-aaplay ng prangkisa simula sa susunod na taon.

Ayon kay Land Transportation Franchising and Regulatory Board Chairman Vigor Mendoza II, ang naturang hakbang ay alinsunod sa direktiba ni Transportation Acting Secretary Giovani Lopez.

Aniya, layunin nilang maayos ang hanapbuhay ng mga driver at operator na lumilihis sa landas at para hindi sila malagay sa peligro, makasuhan, o ma-impound ang kanilang sasakyan.

Samantala, nilinaw naman ni Acting Sec. Lopez na hindi kabilang sa amnestiya ang mga driver o operator na gumagamit ng hindi ligtas o roadworthy na sasakyan.

Hinimok ng DOTr ang mga colorum na magbago na at sulitin ang ibibigay na oportunidad para maging legal ang kanilang operasyon.

Puspusan na ang paghahanda ng Parañaque Integrated Terminal Exchange sa pagdagsa ng mga biyahero ngayong Christmas season.

Matatandaang sinabi ng PITX na inaasahan nilang aabot sa tatlong milyong pasahero ang daragsa sa nasabing terminal mula Disyembre a-disi-nuwebe hanggang Enero a-singko, 2026.

Ayon kay PITX Corporate Affairs and Government Relations Head Jason Salvador, pangunahing prayoridad ng terminal ay safety, security, at supply; o ang kaligtasan ng mga pasahero, seguridad sa gitna ng pagdagsa ng mga biyahero, at sapat na bilang ng pampublikong sasakyan.

Dagdag pa ni Salvador, naging madali na rin ang pagpunta sa PITX, hindi lang dahil sa maraming uri ng pampublikong transportasyon, kundi pati na rin sa pagbubukas ng LRT-1 Cavite Extension, kung saan isa ang PITX sa mga istasyon nito.

Bagama’t walang namo-monitor na pangunahing banta sa seguridad ngayong December holiday season, tiniyak sa publiko ng Philippine National Police na mananatili silang naka-heightened alert para maiwasan ang anumang masamang insidente at pangalagahan ang kaligtasan ng bawat Pilipino.

Ayon kay Acting PNP Chief, Lieutenant General Jose Melencio Nartatez Jr., kanya nang inatasan ang mga unit ng pulisya sa buong bansa na paigtingin ang kanilang presensya sa mga pampublikong lugar, pangunahing lansangan, at mahahalagang lugar na inaasahang daragsain ng mga tao ngayong kapaskuhan.

Dagdag pa ni Lt. Gen. Nartatez, kasunod na ito ng nangyaring walang-habas na pamamaril sa Bondi (Bon-dai) Beach sa Sydney, Australia, na ikinasawi ng hindi bababa sa labing-anim katao.

Layon anya nito na tiyakin ang seguridad ng mga komunidad sa panahon ng kapaskuhan at mapanatili ang kapayapaan at kaayusan, lalo na sa mga lugar na dinaragsa ng tao para sa mga pagdiriwang.

Una nang sinabi ng Department of Migrant Workers na wala silang natanggap na ulat na may Pilipinong naapektuhan sa naganap na pamamaril sa ibayong dagat.

Tiniyak naman ng hepe ng pambansang pulisya na handa itong agarang tumugon sa anumang sakuna.

Kinumpirma na ng Department of Education ang labing-anim na araw na Christmas break ng mga estudyante mula December 20 hanggang January 4, 2026.

Ito’y alinsunod sa inilabas na DepEd Order ni Secretary Sonny Angara noong Abril a-kinse, na susundin ng mga public elementary at secondary schools at community learning centers o CLCs.

Inilabas ang naturang circular order para mabigyan ng sapat na oras ang mga paaralan at CLCs na epektibong mapagplanuhan at maipatupad ang kani-kanilang school activities at ma-maximize pa ang oras para makapagturo.

Naniniwala si mamamayang Liberal Representative Leila De Lima na positibong hakbang ang pagha-hain ng panibagong reklamo hinggil sa maling paggamit ng confidential funds ng Office of the Vice President sa kabila ng kawalan pa rin ng malinaw na aksyon sa impeachment case nito.

Ayon sa mambabatas, bagama’t kahalintulad ng mga alegasyon sa naunang impeachment complaint sa Kamara, ang 58 pages na bagong reklamo ay mas detalyado, mas nakatuon, at may mas tiyak na pagtukoy sa mga paglabag, na sinasabing may kalakip na mas maraming ebidensya.

Nilinaw rin na maaari ding dinggin ang kaso ng Office of the Ombudsman bilang plunder at graft, na posibleng ihain sa Sandiganbayan, lalo’t lumalampas umano sa 50 million threshold ang halagang sangkot.

Dagdag pa ni Representative De Lima, maaari ring magsilbing batayan ang magiging findings ng Ombudsman para sa panibagong impeachment complaint sa Kamara pagsapit ng Pebrero, lalo’t nananatiling nakabinbin ang ilang mosyon sa Korte Suprema at naka-archive pa rin ang naunang impeachment nito sa Senado.

Sumiklab ang panibagong panawagan para sa transparency at reporma sa paggamit ng pondo ng bayan matapos umalingawngaw sa social media at ilang digital platforms ang umano’y pagkakasangkot ni DICT Undersecretary Faye De Sagon sa tinatawag na “insertion mafia,” isang grupong iniuugnay sa bilyon-bilyong pisong budget insertions sa iba’t ibang ahensya. Bagama’t personal na pinabulaanan ni Usec. De Sagon ang mga alegasyon, iginiit ng mga netizen at ilang sektor na higit pa sa pangalan ang dapat imbestigahan kundi ang mismong sistemang nagbibigay-daan sa paulit-ulit na anomalya sa budget process ng pamahalaan. Sa gitna ng mga magkakaibang reaksiyon online, isang malinaw na tono ang lumutang, pagod na umano ang publiko sa paulit-ulit na isyu ng insertions at katiwalian. Komento pa ng isang netizen, “Parang across all agencies na talaga ang insertions,” na sinang-ayunan naman ng iba pa na humirit sa Senado at ICI na magsagawa ng malalim na imbestigasyon. Hindi lamang personalidad ang inulan ng puna kundi ang mismong budget manipulation. Ayon sa ilang observers, hindi umano mauulit ang mga kahalintulad na kontrobersiya kung may sapat na safeguards at real-time transparency tools sa pagbuo at pag-apruba ng pondo. Sa mga lumulutang na alegasyon, inilalarawan si De Sagon bilang malakas ang impluwensiya sa paggalaw ng ilang proyekto sa DICT at umano’y nakagagawa ng mga desisyon sa panahon na wala ang kalihim. Ngunit higit pa rito, mas naging sentro ng diskurso ang sinasabing alegasyon na may umiiral na network ng ilang opisyal sa iba’t ibang ahensya kung saan lumitaw din sina dating Cong. Zaldy Co at resigned DepEd Usec. Trygve Olaivar noong mga nakaraang linggo. Sa kabila nito, nanindigan si De Sagon na pawang kasinungalingan ang mga paratang at wala siyang kinalaman sa anumang kickback scheme. Giit pa niya, handa siyang humarap sa anumang imbestigasyon upang linisin ang kanyang pangalan. Habang patuloy na umiinit ang usapin, nanawagan ang publiko ng mas komprehensibong audit, hindi lamang sa DICT kundi sa kabuuang budget insertion practices ng gobyerno bilang bahagi ng mas malaking laban para sa integridad, accountability, at tunay na reporma sa pamahalaan.