HEADLINES

Plano ni Senate Committee on Finance Chairman Sherwin Gatchalian na gawing mas aktibo ang kanilang pag-oversight sa paggamit ng pondo ng ilang mga sektor sa bansa.

Ayon kay Senador Gatchalian, magiging “busy” ang Senate Committee on Finance buong taon at hindi lamang ngayong budget season.

Target din aniya nilang personal na bisitahin ang mga pasilidad, partikular na ang mga irrigation systems, upang matiyak na maayos ang operasyon ng mga ito.

Nang tanungin naman kung nagkaroon ng kapabayaan sa oversight functions ang mga nakaraang chairman ng komite, tugon ni Sen. Gatchalian, kanya-kanya naman ng istilo ng pamumuno ang bawat senador.—sa panulat ni John Riz Calata

Epektibo na ngayong buwan ang paggalaw ng singil sa transmission rates sa Luzon, Visayas, at Mindanao.

Ayon sa National Grid Corporation of the Philippines, 22 centavos per kilowatt-hour ang bawas sa transmission rates sa Luzon.

Tataas naman ng 44 centavos per kilowatt-hour ang transmission rates sa Visayas at Mindanao.

Sinabi ni NGCP revenue management head Ryan Datinggaling na ang paggalaw ng presyo ay bunsod ng paggalaw sa presyo ng ancillary services o ang karagdagang serbisyo na nagtitiyak sa katatagan ng supply.

Iginiit ng mga tagapangasiwa ng Masungi Georeserve na napapanahon na para bigyang-proteksyon ang mga green infrastructure sa bansa, kasunod ng malawakang pagbahaang naganap sa bansa nitong mga nakaraang buwan.

Binigyang-diin ni Ann Dumaliang, co-founder and managing trustee ng Masungi Georeserve, na bukod sa pag-iimbestiga sa maanomalyang flood control projects, dapat ding aksyunan ng pamahalaan ang iba pang mga aspeto na nagdudulot ng pagbaha.

Dahil dito, humihingi na ng suporta ang mga tagapangasiwa ng Masungi Georeserve kay Pangulong Ferdinand Marcos Jr. upang tugunan ang pagprotekta sa conservation area.

Naniniwala si Dumaliang na dapat nang ipatupad ang batas at patawan ng multa ang mga nagtatayo ng negosyo o mga imprastraktura sa Masungi Georeserve.

Handa na ang Land Transportation Office na i-impound ang mga light electric vehicle o L.E.V. na daraan sa mga national highway simula sa susunod na taon.

Ayon kay L.T.O. chief, Assistant Secretary Markus Lacanilao, binabalangkas na nila, katuwang ng Department of Transportation, ang mga panuntunan para sa pag-impound ng mga L.E.V. na sisimulan sa Enero a-dos.

Bukod dito, tiniyak din ni Asec. Lacanilao na sapat ang supply ng mga plaka kasabay ng kanilang pagsisikap na mabawasan ang backlog.

Hinimok ng Land Transportation Office ang mga motorista na maging kalmado at iwasan ang pagiging mainitin ang ulo, lalo ngayong holiday rush, kung saan inaahasan ang pagbigat pa ng daloy trapiko.

Ayon kay LTO chief, Assistant Secretary Markus Lacanilao, mainam na magtimpi o umiwas sa pagmumura at pagbaba sa sasakyan para makipag-away sa mga kapwa motorista para maiwasan ang road rage.

Muling ibinabala ni Asec. Lacanilao na hindi nila palalampasin ang mga insidente ng road rage at sinuman ang masasangkot at mapapatunayang nagkasala ay tatanggalan ng lisensya.

Kinumpirma ng Bureau of Immigration na bigong makabalik sa idineklaràng petsa ng pag-uwi sa Pilipinas si dating Public Works Secretary Manuel Bonoan.

Ayon kay B.I. Spokesperson Dana Sandoval, hanggang Disyembre a-disiyete lamang ang sinabing petsa ni Sec. Bonoan na babalik siya sa bansa.

Gayunman, sinabi ni Spokesperson Sandoval na hanggang ngayon ay wala pa ring record na dumaan si Bonoan sa alinmang immigration counter sa mga paliparan at pantalan ng bansa.

Nabatid na inilagay sa immigration lookout bulletin si Bonoan matapos masangkot sa anomalya sa flood control projects.

Lumabas naman ito sa bansa upang samahan umano sa pagpapagamot ang kanyang asawa sa Estados Unidos.

 Magsasagawa ng malawakang recruitment ang Department of Public Works and Highways sa mga paaralan sa Enero ng susunod na taon.

Ayon kay DPWH Sec. Vince Dizon, kabilang sa kanilang hahanapin ay mga engineer at accountants na kanilang makakatulong sa pag-reporma sa ahensiya.

Dagdag pa ni Sec. Dizon, personal siyang magpupunta sa mga paaralan para kumbinsihin ang mga indibidwal na kwalipikadong maging empleyado ng DPWH.

Binigyang-diin ng kalihim na kinakailangan nila ng “fresh blood” o mga bagong kawani.

Nananatiling kumpiyansa si Public Works and Highways Secretary Vince Dizon na mahuhuli at mapapauwi ng bansa si dating Ako Bicol Party-list Rep. Zaldy Co.

Ito’y para harapin ang mga kaso laban sa kanya kaugnay sa maanomalyang flood control projects, kasunod na rin ng kanselasyon ng pasaporte nito.

Ayon kay Secretary Dizon, naniniwala siya sa kakayahan ni Interior and Local Government Secretary Jonvic Remulla na mapababalik ng bansa si Co, gaya ng pagpapauwi nito kay dating Negros Oriental Rep. Arnolfo Teves Jr. mula sa Timor-Leste.

Kabilang si Co sa mga pinakasuhan ng DPWH dahil sa guni-guning flood control project sa Oriental Mindoro.

Bukod sa dating party-list solon, kinasuhan din ang contractor na si Sara Discaya at ilang DPWH officials.

Inamin ng Department of Justice na wala pang katiyakan kung kailan ang eksaktong araw na magaganap ang ikalawang restitution o pagsasauli ng pera mula kay dating Department of Public Works and Highways–NCR Director Gerard Opulencia.

Matatandaang nauna nang naibigay sa DOJ ang paunang 40 million pesos bilang bahagi ng kabuuang 150 million pesos na sinasabing nakuha sa maanomalyang infrastructure projects.

Ipinaliwanag ni DOJ Spokesman Polo Martinez na ang restitution ay bahagi ng proseso upang maisailalim si Opulencia sa Witness Protection Program, kung saan provisionally admitted na ito.

Matapos naman ang pormal na pagtanggap ng pera kahapon, agad naman itong nailipat sa kustodiya ng National Treasury.

Ayon naman kay Acting Justice Secretary Fredderick Vida, pinag-uusapan pa ng kagawaran at ng abogado ni Opulencia kung kailan maibabalik ang nalalabing halaga na 110 million pesos.