HEADLINES

Mariing pinuna ni Senador Panfilo Lacson ang umano’y ginawa ni Senador Alan Peter Cayetano matapos umanong idawit ang kanyang pangalan sa pagdinig ng Blue Ribbon Committee, kahapon.

Ayon kay Lacson, “desperately dragged” umano ang kanyang pangalan sa naturang pagdinig kahit wala umanong anumang ebidensya upang isama siya sa isyu ng flood control scam.

“Disgraced ex-SP Cayetano desperately dragged my name in a bogus BRC hearing w/o an iota of evidence or even a tiny bit of basis or reason except to pull me into a corruption controversy. He exposed his loathsome behavior by using overstretched innuendos.” — Sen Ping

Pinayagan ng Sandiganbayan 5th Division ang mosyong inihain ni dating DPWH Secretary Manuel Bonoan na humihiling ng hospital arrest habang nahaharap ito sa non-bailable plunder case kaugnay ng umano’y pagkakasangkot niya sa maanomalyang flood control projects.

Pinagbigyan din ng korte ang panawagan ni Bonoan na ma-confime siya sa Philippine National Police General Hospital in Camp Crame, Quezon City.

Ayon sa medical certificate na inisyu ng personal physician ng dating opisyal, na kalaunan ay isinumite sa korte, si Bonoan ay dumaranas ng Stage IV chronic renal disease, hypertension, diabetes mellitus, gouty arthritis, spinal condition na tinatawag na spondylolisthesis, at prostate cancer.

Sinuhulan umano ni dating Congressman Mike Defensor ang labingwalong mga dating sundalo ng tig-limang milyong piso bawat isa para tumestigo sa flood control probe.

Ayon sa National Bureau of Investigation, isa sa mga kaanak ng dating mga sundalo ang umamin sa kanyang affidavit na nabayaran ang bawat miyembro ng grupo para magsalita.

Samantala, nilinaw naman ni NBI Director Melvin Matibag na itinuturing pang unverified ang naturang akusasyon habang nagpapatuloy ang ginagawang imbestigasyon.

Gayunman, tiniyak ng NBI na agarang ipapa-subpoena si Cong. Defensor kapag napatunayang may basehan ang paratang na ibinabato sa kanya. | Sa panulat ni Reabelle Medina

Tiniyak ng Malacañang na hindi kukunsintihin ni Pangulong Ferdinand Marcos Jr. ang mga kaguluhan at komprontasyong nagaganap sa Senado.

Kaugnay ng mga naganap sa Senado, tulad ng “tulakan” sa pagitan ni Senador Robin Padilla at Interior Secretary Jonvic Remulla.

Ayon kay Palace Press Officer Claire Castro, dapat nang maayos ng Senado ang mga suliranin sa loob ng kanilang institusyon at magkaroon ng kaayusan sa hanay ng mga senador.

Kasabay nito, inamin ng Palasyo na posibleng makaapekto sa ilang bahagi ng State of the Nation Address ng Pangulo ang nagpapatuloy na sigalot sa Senado, lalo na kung maaantala ang pagpasa ng mga panukalang kailangan ng administrasyon.

Gayunman, iginiit ni Usec. Castro na mananatiling nakatutok ang Pangulo sa pagsusulong ng mga programa at panukalang makakatulong sa publiko.—sa panulat ni Reianne Antiquina

Agad aaksyunan ni Pangulong Ferdinand Marcos Jr. ang anumang pormal na kahilingan para sa special session ng Senado.

Ito ang sinabi ni Palace Press Officer Claire Castro matapos ihayag ng kampo ni Acting Senate President Sherwin Gatchalian ang planong humiling ng special session.

Ayon kay Usec. Castro, bukas ang Pangulo sa naturang hakbang dahil ayaw nitong maantala ang trabaho ng Senado at ang pagtalakay sa mahahalagang panukala.

Gayunman, ipinaabatid ng Malacañang na kinakailangang may sapat na batayan ang kahilingan para sa pagpapatawag ng special session.

Muli ring iginiit ng Malacañang na ang kinikilala nilang liderato ngayon sa Senado ay kay Acting Senate President Sherwin Gatchalian.—sa panulat ni Reianne Antiquina

Iginiit ni Senate Committee on Finance Chairman Sherwin Gatchalian na “pork-free” ang napagkasunduang 2026 national budget sa bicameral conference committee.

Ito’y matapos ang alegasyon ng People’s Budget Coalition na hindi pa rin “pork-free” ang 2026 national budget.

Gayundin ang pahayag ni ACT-Teachers Rep. Antonio Tino na mayroong itinatagong 17.9 billion pesos pork na kinuha umano sa pondong nakalaan sana sa government employees.

Ipinunto ni Sen. Gatchalian na natalakay ang budget sa open bicam at na-justify ng mga mambabatas ang mga amendments sa General Appropriations Act.—sa panulat ni John Riz Calata