HEADLINES

Kinakailangang maresolba ang problema sa Air Traffic System sa NAIA para maiwasan ang nangyaring technical glitch nitong nakalipas na January 1 na naka perhuwisyo sa mahigit 60,000 pasahero.

Binigyang diin ito ni dating CAAP Chief at Energy secretary Alfonso Cusi  sa gitna na rin nang ikinasang imbestigasyon ng Senado at Kamara sa nangyaring aberya sa NAIA Terminal 3 dahilan kayat naparalisa ang operasyon ng paliparan sa loob ng  mahigit anim na oras.

Bilang dating CAAP Chief, sinabi ni Cusi na hindi madaling i maintain ang mga kagamitan ng paliparan at dapat na nakabatay ito sa  international standards.

Ang sistema aniyang ginagamit  sa paliparan ay mula sa technology at supervision ng Japan International Cooperation Agency (JICA) kaya’t hindi ito dapat magka aberya.

Una nang inihayag ng  Malacañang na iniimbestigahan na ng ilang ahensiya ng gobyerno ang insidente  upang  mabatid kung saan at ano ang pinagmulan ng aberya at kung mayroon bang dapat na managot sa insidente.

Nagsagawa na rin ng inspeksiyon ang Pangulong Ferdinand Marcos Jr.  sa NAIA T3 noong  nakalipas na Biyernes kasabay nang pagbinigay ng briefing sa kanya ng airport officials hinggil sa nangyaring insidente.

Gagawa ng hakbang ang Department of Transportation (DOTr) para magkaroon ng karagdagang pondo ang Civil Aviation Authority of the Philippines (CAAP).

Sa pahayag ni DOTr Usec. for Aviation Roberto Lim, aapela ng dispensasyon ang kanilang ahensya para ma-exempt sa implementasyon ng dividend Remittance Law at magkaroon ng fund ang CAAP para sa pag-upgrade ng Air Traffic Management System.

Nabatid na bilang isang Government-Owned and Controlled Corporation (GOCC), obligado ang CAAP na magsumite ng bahagi ng kita nito sa National Government.

Ayon sa CAAP, kailangan ng kanilang ahensya ng subsidiya para sa pagsasaayos sa kanilang operation system upang maiwasan ang iba’t ibang uri ng aberya na nagdudulot ng kanseladong flights.

Matatandaang kamakailan ay nagkaroon ng technical glitch sa NAIA kung saan, libu-libong pasahero ang naapektuhan.

Nakapagtala ang Commission on Elections (COMELEC) ng pagtaas sa bilang ng aplikasyon para sa voter’s registration.

Sa gitna ito ng ikalawang linggo nang implementasyon ng Register Anywhere Project (RAP) sa iba’t ibang malls sa Metro Manila at 200 probinsya sa bansa.

Batay sa pinakahuling datos ng Comelec, pumalo na sa 1,129 na aplikante ang nagpatala sa RAP booths, sa 8 malls nitong Enero 7 at 8.

Halos doble ito kumpara sa 611 aplikante, sa unang bugso ng rehistrasyon noong Disyembre 17 hanggang 18 nakaraang taon.

Ang SM Fairview sa Quezon City ang nakapagtala ng pinakamataas na bilang ng rehistrasyon na may 381, sinundan ng; Manila, 269; Robinsons Galleria, 169;  SM Sucat, 149.

Ang iba pang lugar na mayroong RAP registrations ay ang; SM Mall of Asia, Robinsons Tacloban, SM City Legazpi at Robinsons Naga.

Pumalo na sa mahigit 564,000 deboto ang nagtungo sa Quiapo Church sa Maynila, para dumalo sa Pista ng Poong Itim na Nazareno.

Batay sa huling ulat ng Quiapo Church Command Post hanggang alas-10 kagabi, umabot na sa 564, 200 ang dumalong deboto kung saan 122,710 ang dumalaw sa  “Pagpupugay” bago ito matapos alas-7 ng gabi.

Hanggang alas-11 lang dapat ng gabi ang huling misa sa Quiapo Church, pero binuksan ito magdamag para sa mga gustong manatili at magdasal.

Inabisuhan naman ng Philippine National Police ang mga motorista na sumunod pa rin sa traffic re-routing scheme upang hindi maabala sa mga saradong kalsada.

Naging mapayapa at maayos ang pagdaraos ng Pista ng Poong Itim na Nazareno ngayong taon.

Ito ang sinabi ni Philippine National Police (PNP) chief, Pol. Gen. Rodolfo Azurin Jr., kasabay ng ginanap na event kahapon kung saan mapapansing kaunti ang dumalo dahil suspendido pa rin ang taunang “Traslacion” dahil sa Covid-19.

Ayon kay azurin, bagaman nakapagtala sila ng ulat na ilang deboto ang nahilo, agad naman itong nabigyan ng medikal na atensyon.

Wala ring naitala ang Pambansang Pulisya na untoward incident sa Quiapo Church at Quirino Grandstand, maging sa kapistahan ng Señor Santo Niño sa Cebu at Pista ng Nazareno sa Northern Mindanao.

Sa datos ng PNP, hihigit sa 5,000 pulis ang ipinakalat ng NCRPO bilang first line of defense na kokontrol sa buhos ng tao.

Hiwalay pa dito ang 300 force multipliers na kinabibilangan ng mga tauhan ng MMDA, NDRRMC, PRC at mga Quick Response and Tactical Forces, Crowd and Traffic Control Units at Medical Team.

Nagbabala ang Philippine Coast Guard (PCG) sa kanilang mga tauhan na nasasangkot sa ilegal na droga.

Kasunod ito ng pagkaka-aresto sa isa nilang tauhan na kinilalang si CG seaman first class (SN1) Bernabe Cosme, 32-anyos, matapos makuhanan ng limang sachet ng hinihinalang shabu sa ikinasang operasyon sa Brgy. Cabatangan, Zamboanga City.

Ayon kay PCG Commandant, CG admiral Artemio Abu, kasama din sa naaresto ang dalawa pang suspek na kinilala namang sina Gilbert Johnston, 53-anyos at Edgar Maghinay, 32-anyos.

Nakuha sa kanila ang ilegal na droga na nagkakahalaga ng P11,628 kung saan, inihahanda na ang kaukulang kaso laban sa mga suspek.

Sakali namang mapatunayang guilty ang nasabing opisyal, agad itong aalisin sa kaniyang puwesto.

Dahil dito, magsasagawa ng imbestigasyon ang Southwestern Mindanao kasabay ng ikakasang random drug test sa mga coast guard personnel para mapanatili ang mataas na antas ng integridad, propesyonal, at kahusayan sa pagbibigay ng serbisyo publiko.

Blangko pa rin ang Western Command ng Armed Forces of the Philippines (WESCOM), kung ano ang sanhi ng napaulat na pagsabog at pagliwanag ng kalangitan sa bayan ng Bataraza at Rizal sa Palawan.

Ayon kay Captain Reynaldo Aragones, tagapagsalita ng WESCOM, pawang walang nakitang bakas ng “unidentified flying object” ang Philippine National Police, Philippine Coast Guard at Municipal Disaster Risk Reduction and Management Office sa dalawang bayan.

Una rito, ilang residente ang nakasaksi sa pagsabog ng isang ‘object’ sa kalangitan, na nagdulot pa umano ng paggalaw ng lupa.

Tiniyak naman ni Aragones na patuloy ang pag-iikot ng kanilang tauhan sa mga lugar na malapit sa insidente.

Hinimok ng Globe ang kanilang mga kustomer na umiwas sa mga nag-aalok ng tulong online para sa pagpaparehistro ng mga SIM at huwag magbigay ng anumang personal na impormasyon para maprotektahan ang kanilang data security at privacy.

Ito’y matapos mapaulat na kumakalat sa social media ang posts ng mga indibidwal na nag-aalok ng kanilang serbisyo, libre man o may bayad, para sa SIM registration.

Humihingi sila ng pangalan, larawan, valid ID, kaarawan, cellphone number, at address ng kanilang inaalukan.

Dahil dito, nagpaalala ang Globe na ang mga sensitibong personal na impormasyon ay delikadong mapasakamay ng mga manloloko. Ito ay maaaring gamitin para nakawin ang identity ng tunay na may ari at magnakaw, mangutang, o gumawa ng iba pang krimen.

“Gusto naming paalalahanan ang aming mga customer na maging maingat sa ganyang mga uri ng mga alok at gamitin lamang ang mga official channels para sa pagpaparehistro ng SIM,” sabi ni Irish Salandanan-Almeida, Globe Chief Privacy Officer. “Mahalaga ang inyong personal na impormasyon at hinihikayat namin kayo na protektahan ito mula sa mga taong gustong gamitin ito para sa mga masamang layunin.”

Libre ang pagpaparehistro ng SIM sa https://new.globe.com.ph. Bago matapos ang Enero, maaari na ring gamitin ang GlobeOne app para sa SIM registration. Kung kinakailangan ng tulong para makapagrehistro, lumapit lamang sa mga mapagkakatiwalaang kamag-anak o kaibigan.

Mula Pebrero 2023 naman, magkakaroon din ng assisted registration sites ang Globe para sa mga senior citizen, mga taong may kapansanan, mga buntis, at mga may-ari ng basic o feature phones.

Mayroong 87.9 milyong SIMs sa ilalim ng Globe network. Sa ngayon, mahigit sa 7 milyon ang nakaparehistro na.

Para mas maging accessible at convenient ang proseso ng pagpaparehistro ng SIM para sa lahat, hinihikayat ng Globe ang mga customer na gamitin ang iba’t ibang channels. Kailangan ding matapos ang pagpaparehistro bago ang deadline sa Abril 26, 2023 para hindi ma-deactivate ang SIM.

Layon ng SIM Registration Act na pigilan ang fraudulent activities at iba pang krimen na naglipana dahil dati ay maaaring gamitin ang SIM ng walang pagkakakilanlan.

Maaaring bisitahin ang website ng Globe para sa karagdagang impormasyon.