HEADLINES

Nagpasalamat sa gobyerno ng Japan at Japan International Cooperation Agency (JICA) si Pangulong Ferdinand “Bongbong” Marcos Jr. dahil sa pagsasakatuparan ng Metro Manila Subway project sa bansa.

Ayon kay Pangulong Marcos, ang pagiging active partners ng Japan, ay malaking tulong sa mga programa ng Pilipinas.

Sa naging pahayag ni Matsuda Kenichi, minister at Deputy Chief of Mission ng embahada ng Japan sa Pilipinas, ang ugnayan sa pagitan ng dalawang bansa ay maituturing na isang “reliable partnership.”

Tiniyak din ng Japan ang kanilang suporta at kooperasyon sa mga plano at programa ng administrasyong Marcos na maituturing na isang “legacy project” upang magkaroon ng “japan-quality” public transportation systems ang Pilipinas.

Aabot sa 3,127 bagong kaso ng Covid-19 ang naitala ng Department of Health (DOH) sa bansa sa unang linggo ng 2023.

Batay sa weekly bulletin na inilabas ng kagawaran, average na 447 arawang kaso ng sakit ang kanilang naitala, na 9% mas mababa kumpara noong Disyembre 26 hanggang Enero 1.

Nitong linggo umabot sa higit 500 ang naitala ng DOH na pasyente ng Covid-19, na nasa  severe at kritikal na kondisyon.

Higit ding 400 intensive care unit beds ang naiulat nitong linggo, na okupado na ng mga pasyente.

Batay sa huling datos ng DOH, umaabot na ngayon sa 73M target population sa bansa ang bakunado laban Covid-19.

Ikinatuwa ng Department of National Defense (DND) ang pagkakatalaga ni Pangulong Ferdinand Marcos Jr., kay  Secretary Carlito Galvez Jr., bilang bagong kalihim ng kagawaran.

Ayon kay Arsenio Andolong, tagapagsalita ng DND, tiwala silang magagampanan ng maayos ni Sec. Galvez ang trabaho, dahil sa malawak nitong  karanasan bilang isang military commander at public servant.

Bago maitalaga bilang kalihim ng DND, si Sec. Galvez ay nagsilbi munang ika-50 Chief of Staff ng Armed Forces of the Philippines at naglingkod bilang Presidential Adviser on Peace, Reconciliation and Unity sa ilalim ng administrasyon ni dating Pangulong Rodrigo Duterte.

Pinasalamatan naman ni Andolong ang dating officer-in-charge at undersecretary ng DND na si Jose Faustino Jr., dahil sa serbisyo nito.

Bumababa na ang lebel ng polusyon sa Manila Bay.

Ito ang sinabi ng Department of Environment and Natural Resources (DENR) kung saan binigyang-diin nito na nagbubunga na ang pagsisikap  ng pamahalaan na ayusin ang Manila Bay at ipatupad ang Operational Plan for the Manila Bay Coastal Strategy.

Ayon kay  Jacob Meimban, Executive Director ng Manila Bay Coordinating Office, bumaba na ang fecal coliform lebel sa naturang baybayin kung saan nitong Oktubre nakaraang taon ay nakapagtala ang National Capital Region ng 51,300 na antas ng coliform, mas mababa kumpara sa 126,000 noong 2019.

Maliban sa Metro Manila, naitala rin ng DENR ang pagbaba ng fecal coliform level sa CALABARZON kung saan, mula sa dating 3,040 coliform level ay pumalo na ito ngayon sa 643.

Bumaba rin ang fecal coliform level sa Central Luzon mula sa 5,099 ay nasa 1,243 na lang ngayon.

Namemeligrong makaranas ng rotating brownouts sa bansa sa ikalawang quarter ng taon.

Ito ang ibinabala ng Institute for Climate and Sustainable Cities (ICSC) kung hindi masosolusyonan ang ilang problema sa power o energy sector.

Ayon kay ICSC Senior Policy Advisor Pete Maniego Jr., may dalawang rason na hindi isinama sa mga naunang projections ng National Grid Corporation of the Philippines.

Una ay ang weekly demand, supply at operating margin sa 2023 report ng NGCP Kung saan inihayag nitong sapat ang operating reserves sa 2^nd quarter, partikular sa April 24 hanggang May 28, 2023.

Bagaman napaka-positibo ng ganitong projected margins, inihayag ng ICSC Na maaaring hindi ito sumasalamin sa aktuwal na operasyon ng grid

Binigyang-diin ni Maniego na wala rin silang nakikitang improvement sa supply mula sa coal at fossil gas power plants.

Dahil dito, posible anyang makaranas ng yellow at red alerts status, na maaaring sabayan ng rotating blackouts, sa ikalawang quarter o mula Abril hanggang Hunyo kung hindi matutugunan ang ilang nabanggit na problema.

Nilinaw ni Department of Agriculture deputy Spokesman Rex Estoperez na ikinukunsidera pa lamang ang planong pag-a-angkat ng sibuyas at wala pang pinal na desisyon ang gobyerno.

Ayon kay Estoperez, hindi nila minamadali ang importasyon at hindi rin lang naman sila ang nagdesisyon bagkus ay inirekomenda ito ng mga mismong magsasaka.

Ipinarating na anya nila kay Pangulong Bongbong Marcos, bilang kalihim ng DA, ang rekomendasyon at hinihintay na lamang ang pasya kung gaano karami ang aangkating sibuyas.

Bukod dito, binigyang-diin ng tagapagsalita ng DA na ikinukunsidera rin nila sa importasyon ang local production volume ngayong Enero hanggang matapos ang anihan.

Kasabay ng pag-arangkada ng anihan ngayong Enero, inaasahan na ang pagbaba ng presyo ng sibuyas simula sa susunod na buwan.

Ipinaliwanag ni Samahang Industriya ng Agrikultura (SINAG) chairman Rosendo So na kung madaragdagan na ang onion supply simula ngayong buwan ay posibleng magmura na ito.

Ayon kay So, nasa P250 kada kilo ang farmgate price, partikular sa Bayambang, Pangasinan at Bongabon, Nueva Ecija batay sa kanilang monitoring.

Umaasa anya silang bababa sa P150 hanggang P170 ang kada kilo ng puti at pulang sibuyas sa mga susunod na linggo at makamit ang target na aning 8,000 hanggang 9,000 metric tons ngayong buwan at 20,000 sa Pebrero.

Una nang inihayag ng Department of Agriculture ang planong pag-angkat ng sibuyas na posibleng isabay sa kasagsagan ng anihan sa Pebrero, upang mapababa umano ang presyo.

Isa na namang opisyal ng ahensya ng gobyerno sa katauhan ni Bureau of Animal Industry (BAI) OIC Director Paul Limson ang nakatikim ng sermon mula kay Senador Cynthia Villar.

Ito’y matapos lumabas sa pagdinig ng Committee on Agriculture na pinamumunuan ng senador na pinayagan pa rin ang pag-i-import ng baboy noong mga nakaraang taon kahit sapat naman ang local supply.

Iginiit ng mambabatas na ngayon lang niya nalaman na pinapayagan pala ang pag-iimport ng livestock kahit pa may sapat namang supply at kayang ibigay ang demand ng merkado.

Ayon pa kay Villar, ang pag-iimport lalo ng karneng baboy kahit may sapat na production ay simula pa noong 2020 nangyayari.

Bagaman nanggigil ang Senadora sa Bureau of Animal Industry, kailangan anyang may pangmatagalang plano para hindi na magkulang ang supply.

Ipinatawag na rin ng Senate Committee on Public Services si dating Transportation Secretary Arthur Tugade para sa isasagawang pagdinig kaugnay sa naranasang aberya sa NAIA noong Enero 1.

Ayon kay Senator Grace Poe, chairperson ng Komite, pagkakataon na ito para ituwid at sagutin ni Tugade ang impresyon na sa ilalim ng kaniyang panunungkulan ay napabayaan ang Air Traffic Management System.

Kabilang din sa mga imbitado sa Huwebes ang mga kasalukuyan at dating opisyal ng Department of Transportation, Civil Aviation Authority of the Philippines at Manila International Airport Authority.

Target ng pagdinig na alamin ang ugat ng aberya sa Air Traffic Control Management System na nagresulta  sa kanselasyon ng maraming flights at nakaperwisyo  sa tinatayang 60,000 pasahero.

Ipinaliwanag ni Poe na kaya imbitado kahit dating DOTr official ay dahil tiyak na hindi lang “overnight” nangyari ang problema at maaaring resulta ito ng maraming taon ng isyu sa system maintenance at upgrade.

Sa kabila nito, hindi naman anya kailangang magbitiw si Transportation secretary Jaime Bautista nang dahil sa nangyari sa airport operations.

Binigyang-diin ng senador na bago pa lang si bautista sa tungkulin subalit masusubok ang liderato nito sa pagkakaron ng patas na imbestigasyon sa maaaring responsable sa kapalpakan sa paliparan. —ulat mula kay Cely Ortega Bueno (Patrol 19)

Pinapurihan ni dating Senator Panfilo Lacson ang pagkakatalaga ni Pangulong Bongbong Marcos kay dating Presidential Peace Adviser Carlito Galvez bilang bagong Defense Secretary.

Ito’y makaraang magbitiw sa puwesto si Department of National Defense Officer-In-Charge Jose Faustino Junior.

Ayon kay Lacson, makapagbibigay si Galvez ng kinakailangang liderato sa DND lalo sa transition period para sa implementasyon ng batas sa fixed term sa mga heneral na may hawak ng pangunahing posisyon sa Armed Forces of the Phillipines.

Samantala, aminado naman si Senate Minority Leader Koko Pimentel na wala siyang ideya sa mga pagbabago sa namumuno sa DND at AFP.

Umaasa anya sila na wala namang seryosong dahilan sa likod ng developments o pagbabago sa mga naturang ahensya.—ulat mula kay Cely Ortega Bueno (Patrol 19)