ENTERTAINMENT

Nagsampa ng tatlong kaso ang sexy star na si Debbie Garcia laban sa Kapamilya actress na si Barbie Imperial matapos umanong saktan siya nito.

Inihain kahapon ng Viva starlet sa Quezon City Prosecutor’s Office ang slight physical injuries case, grave oral defamation at grave slander by deed laban kay Barbie.

Matatandaang nakunan ng CCTV ang naganap na confrontation sa pagitan ng dalawang aktres na nag-trending pa sa social media.

Sinasabing pinagselosan umano ni Barbie si Debbie noong sila pa ng aktor na si Diego Loyzaga, kung saan naging on-screen partner ni Debbie ang aktor sa Vivamax film na “The Wife.”

Sa ngayon ay wala pang pahayag ang kampo ni Barbie sa nasabing insidente. —sa panulat ni Hannah Oledan

Nasaksihan ni Kim Atienza o kilala rin bilang “Kuya Kim,” ang naganap na stampede sa Itaewon, South Korea.

Naroon ang mamamahayag kasama ang kaniyang team para sa unang anibersaryo ng kanilang programang “Dapat Alam Mo!” kung saan may live coverage sana ito para sa Halloween parade, na isang tradisyon sa nasabing bansa ngunit nauwi ito sa isang trahedya.

Ayon kay Kuya Kim, mula nang nag-umpisa ang party ay nagdagsaan na ang mga kabataang Korean at ibang foreigner hanggang sa namalayan nalang niya ang nagsidatingang ambulansya at fire truck.

Base sa naging obserbasyon ni Kuya Kim, wala umanong crowd control at naging complacent ang pamahalaan ng South Korea.

Sa pinakahuling datos, nasa 151 na ang nasawi, 19 dito ang foreigners at isang sikat na South Korean actor.
Samantala, nakapagtala rin ng 82 na taong sugatan, at 19 sa mga ito ang seriously injured. —sa panulat ni Hannah Oledan

Handa na si Binibining Pilipinas 2022 1st runner-up Herlene Nicole Budol sa kaniyang kauna-unahang international pageant na lalahukan sa Kampala, Uganda.

Sa Instagram post ng Beauty Queen, kaniyang ibinahagi ang isang bikini photo, kasabay ng paghingi ng suporta at panalangin sa kaniyang mga fans para sa  gaganaping Miss Planet International 2022 sa darating na November 19.

Matatandaang pormal na inedorso ng Binibining Pilipinas si Budol kamakailan, para ipresenta ang Pilipinas laban sa iba pang mga kandidata na lalahok rin sa nabanggit na kompetisyon.

Sa ngayon, abala sa paghahanda si Herlene para sa sasalihang pageant kung saan, kaniyang ibabandera ang watawat ng Pilipinas.

Planong gawing regular host country ng Jkn Global Group Public Company Limited ang bansang Thailand para sa Miss Universe Pageant.

Ito’y matapos mabili ng Thai transwoman billionaire na si Jakkaphong “Anne” Jakrajutatip ang Miss Universe Organization kamakailan sa halagang $14-M.

Una nang inihayag ng JKN Company na nakasentro sila sa pagsuporta sa paggamit ng Copyright and Copyright Management mula sa Licensing ng Miss Universe brand hanggang sa pag-oorganisa ng mga national pageant.

Bukod pa dito, kanila ring palalakasin ang nasabing organisasyon upang maipagpatuloy ang legasiya nito sa pagbibigay ng plataporma sa bawat indibidwal hindi lang sa ibat-ibang uri ng kultura, at tradisyon, kundi pati na rin sa pagpapaunlad nito para sa susunod pang henerasyon.

Sa darating na January 2023, nakatakdang ganapin ang Miss Universe 2022 sa New Orleans, Louisiana sa Amerika.

Pumanaw na sa edad na 75 ang OPM legend at miyembro ng iconic trio na Apo Hiking Society na si Danny Javier.

Ito ang kinumpirma sa Facebook account ng kaniyang anak na si Justine Javier kung saan, sinabi niya na ang kaniyang ama ay may kumplikasyon at may iniindang karamdaman, na naging sanhi ng pagkamatay nito.

Matatandaang sa naging pahayag ng isa pang miyembro ng Apo Hiking na si Boboy Garovillo, sinabi niya na imposible nang magkaroon ng reunion ang kanilang grupo dahil sa karamdaman ni Danny.

Humingi naman ng pang-unawa at privacy ang pamilya ng pumanaw na singer-songwriter, kasabay ng kanilang pasasalamat sa lahat ng nakikiramay, nagpapadala ng mensahe at patuloy na nagdarasal sa kanilang pamilya at sa yumaong si Danny.