ENTERTAINMENT

Magdaragdag ng marami pang tickets ang Eraserheads para sa Reunion Concert sa December sa SMDC Festival Grounds sa Parañaque City.

Ito’y inanunsyo ng grupo matapos agad na masold-out ang mga tickets nakaraang buwan.

Magkakaroon din ng mas malaking venue capacity para sa General Admission section.

Bukod pa rito, nagkakahalagang 1,222 ang General Admission tickets.

Inabisuhan naman ang publiko na huwag nang palagpasin ang concert dahil may natitira pang tickets para sa expanded sections at Gen Ad. —sa panulat ni Jenn Patrolla

Pumanaw na ang Author-Journalist na si Beth Day Romulo, ang butihing maybahay ni late former Foreign Affairs secretary Carlos P. Romulo.

Sa Facebook post ni Maritina Romulo, kinumpirma nito ang pagyao ng kanyang lola o grandmother sa edad na 98.

Ayon kay Maritina, iaanunsyo sa takdang oras ang iskedyul ng memorial services ng kanyang yumaong lola sa pamamagitan ng Carlos P. Romulo Foundation.

Hiling naman ni Maritina sa publiko na magbigay na lamang ng donasyon sa foundation na itinatag ng kanyang lola at lolo, kesa magpadala ng bulaklak.

Ipinanganak si Beth Romulo sa Estados Unidos, noong May 25, 1924 at nagtrabaho dito sa Pilipinas bilang Associate Editor ng Manila Bulletin at naging author ng ilang aklat gaya ng “Grizzlies in their backyard” at “The Writer, The Lover and The Diplomat.”

Umatras sa Miss Planet International pageant si Binibining Pilipinas 2022 1st runner-up Herlene Budol.

Ito ang kinumpirma ng manager ni Herlene na si Wilbert Tolentino sa kaniyang Facebook post.

Ayon kay Tolentino, napagpasyahan niyang mag-withdraw na lang si Herlene sa kompetisyon dahil sa kawalan ng katiyakan sa mga organizer.

Lumalabas kasi na walang inisyatibang mamagitan ang Ugandan government, para ayusin ang gulo sa kompetisyon na hindi naman binanggit kung ano.

Humingi naman ng paumanhin si Tolentino sa kanilang supporters at nagpasalamat dahil sa patuloy na pagsuporta sa kanila.

Sa November 19 dapat gaganapin ang Miss Planet International sa Kampala, Uganda.

 Napili ng liquor brand na Tanduay ang Beauty Queen-turned-Actress na si Kylie Verzosa bilang 2023 calendar girl nito.

Dito muling ibinida ni Kylie ang kanyang kaseksihan tampok ang iba’t-ibang ‘daring’ looks.

Sinabi ni Tanduay Distillers International Business Development Manager at Senior Brand Manager, Inc. Marc Ngo, na si Kylie ang perfect calendar girl para sa kanilang brand.

Sinabi naman ni Kylie na isang karangalan na maging calendar girl at isa aniya itong pangarap na natupad.

Say pa ng beauty queen-actress na hindi kailangan na ikumpara siya sa iba pang calendar girls dahil bawat babae ay may kanya kanyang katangian.

Ikinadismaya ni Ronnie Liang ang natanggap nitong offer para gumawa ng isang pornographic movie.

Sa kanyang Facebook post ay ibinahagi ng singer-actor ang kanyang saloobin hinggil sa usapin.

Ayon kay Ronnie, hindi siya nag-aral at kumuha ng masteral degree para lamang ibalandra ang pribadong bahagi ng kanyang katawan sa publiko.

Importante pa rin aniya sa kanya ang respeto sa sarili at wala ring problema sa kanya ang kawalan ng project sa ngayon.

Pagbibiro naman ni Ronnie, hanggang topless lang ang kaya nitong gawin.

Si Ronnie ay isa ring Army Reservist Officer, Piloto at Brand Ambassador ng ilang kumpanya at ahensya ng gobyerno. - sa panulat ni Hannah Oledan

Opisyal nang kinoronahan si Roberta Tamondong bilang fifth runner up ng Miss Grand International 2022.

Batay sa social media post ng Miss Grand, ginanap ang koronasyon sa Thailand.

Nagtapos si Tamondong sa top 20 ng Miss Grand International 2022, ngunit itinalaga bilang fifth runner-up ilang sandali matapos ang coronation night.

Pinalitan ng Filipina Beauty Queen si Yuvna Rinishta mula sa Mauritius kung saan nagdesisyon ito magbitiw sa kanyang pwesto.

Babalik sa Pilipinas ang American band na Boyce Avenue para sa serye ng concert na gaganapin sa iba’t-ibang bahagi ng bansa.

Ito ay kinumpirma ng Willbros Live na concert promoter ng American Trio.

Gaganapin ang naturang concert sa February 11 sa Araneta Coliseum, 12 sa Waterfront Hotel sa Cebu at 14 sa SMX Convention sa Davao.

Makakasama naman sa concert sa Manila ang The Juans, Adie at Nobita habang ang huling dalawa lamang ang makakasama sa Cebu at Davao.

Samantala, magsisimula ang bentahan ng ticket sa November 19, 10 a.m. via ticketnet.com.ph sa Manila at smtickets.com sa Cebu at Davao.  – sa panulat ni Hannah Oledan

Viral ngayon ang isang netizen nang matulala matapos ang kanilang exam.

Sa ibinahaging litrato  ni Jhon Kenneth Acbayan, makikita sa larawan na mukhang nahirapan naman talaga ang estudyante kaya’t nakuha na lang nitong matulala.

Nakasaad sa caption nito na wala sa exam ang kaniyang nireview dahil ang kanyang guro ang gumawa nito.

Umani naman ito ng mga nakakatuwang reaksyon sa mga netizen gaya ng  “mapapatulala ka nalang talaga!”

Parang binagsakan ng langit at lupa “!