Taos-pusong nagpasalamat si Presumptive president Ferdinand Marcos Jr. at ang kanyang asawang si Liza Araneta-Marcos sa mga Negrense sa kanilang suporta.
Magugunitang nagdaos ng victory party ang mag-asawa para sa mga tagasuporta sa Talisay City, Negros Occidental.
Ayon kay Vice Governor Jeffrey Ferrer, nagsilbing host ng party si Leo Rey Yanson at kanyang pamilya sa rest house sa Barangay Bubog.
Kaya pinasalamatan ng mag-asawang Marcos si Leo Rey at ang Yanson Family na may-ari ng pinakamalaking bus firm sa bansa.
Maliban dito, ipinaabot din ang pasasalamat sa kanilang volunteers at supporters sa Negros Occidental at Bacolod sa pamamagitan ng video message.
“We will never forget all of your help for the rest of out lives,” ayon kay Marcos.
Samantala, tinawag ni Ferrer ang Negros Occidental campaign para kay Marcos bilang “big victory”.
Kung maaalala, nagawa nilang pababain ang 571,000 na lamang VP Leni Robredo sa Negros Occidental at Bacolod City laban Marcos noong 2016 vice presidential race sa 35,883 na lang noong katatapos na 2022 presidential race.
Napag-alaman na nakakuha si Robredo ng 638,932 na boto sa Negros Occidental at Bacolod City habang si Marcos ay 603,049 votes ang nasungkit noong nakaraang halalan.
