Kumpiyansa ang ilang mga Senador na darating na ang bagong araw para sa Marawi City makaraang lumaya na ito mula sa kamay ng mga terorista.
Ayon kay Senate Majority Leader Tito Sotto, hangad niyang makita ang Marawi bilang isang bago, moderno at magandang lungsod sa hinaharap.
Hindi na rin aniya kailangan pa ang martial law para ganap na maipatupad ang rehabilitasyon sa lungsod subalit kailangan pa ring nakataas ang alerto para sa anumang banta ng terorismo.
Para naman kay Senador Gringo Honasan, malaking hamon aniya sa ngayon ang rehabilitasyon, muling pagtatayo ng mga nasirang gusali at muling pagbangon ng mga residente ruon.
Sa panig naman ni Senador JV Ejercito, sinabi nito na pabor para sa mga taga Mindanao ang martial law dahil sa napipigilan nito ang warlordism at hindi makakikilos pa ang mga private armies.
Kaugnay nito, naniniwala naman si Senador Francis Escudero na hindi pa rin ganap na matatapos ang mga aktibidad ng mga terorista dahil sa tiyak na may kapalit ang mga napatay nilang lider na sina Isnilon Hapilon at Omar Maute.
