Krystine Belen

Karamihan sa atin, itinuturing nang bahagi ng pamilya ang mga alaga nating hayop.

Ganito ang trato ng isang ama sa kanyang pit bull na karga-karga ito habang namamasyal. Ngunit ang kanyang sariling anak, naglalakad lang!

Sa viral video, makikitang tumawid ang tatlo sa kalsada at patuloy na naglakad sa sidewalk. Maya-maya pa, nakasunod na sa kanila ang isang babaeng tinutulak ang isang stroller na may lamang malaking karton.

Pinaniniwalaan ng mga netizen na siya ang ina ng bata.

Naging diskusyon sa comments section ng original video ang family priorities dahil ayon sa ilang netizen, imbes na kargahin o isakay sa stroller ang bata, pinaglakad lamang nila ito.

Sa kabila nito, mas marami ang humanga sa ama at sumang-ayon na dapat lang kargahin ang pit bull dahil mainit ang kalsada at sensitive ang paws ng mga aso. Nakasapatos umano ang bata kaya protektado ang mga paa nito.

Komento ng iba, hawak naman ng ama ang kamay ng bata at kung mapagod ito, pasasakayin din sa stroller.

Naipakita ng video na hindi lamang alaga, kundi mahalagang miyembro ng pamilya, ang ating fur babies. Dapat din natin silang bigyan ng wastong pag-aaruga, proteksyon, at pagmamahal na animo’y kadugo natin sila.

Kung magkakaroon ng pelikula ang buhay ng babaeng ito mula sa Barranquilla, Colombia, posibleng maging titulo nito ay “Lina and the Seven Old Men”.

Mayroon kasing pitong karelasyon si Lina at lahat sila, mga lolo na!

Matapos makaranas ng ilang nakadidismayang romantic relationships sa mga lalaking kaedad niya, na-realize ni Lina na makukuha niya lamang ang hinahangad na emotional at financial stability kung mga pensiyonado na ang makakarelasyon niya.

Napansin niya kasi kung paano siya landiin ng kanyang matandang kapitbahay, kahit may asawa na ito.

Naisip niyang mas desirable siya sa mga senior citizen dahil gagawin umano nila ang lahat upang magkaroon ng relasyon sa mas nakababatang babae.

Kaya naman sinimulan niyang pumunta sa mga parke at iba pang mga lugar kung saan tumatambay ang mga lolo.

Hindi nakuntento si Lina sa isang nobyo, kaya naghanap pa siya ng makakarelasyong matanda—hanggang sa umabot sila sa pito. At lahat sila, tinutustusan ang dalaga!

Kilala ng mga lolo ang isa’t isa. Sa katunayan, pinag-aagawan pa nila ang atensyon at pagmamahal ni Lina.

Ngunit para kay Lina, itinuturing niyang negosyo at hindi romantic relationship ang kanilang polyamorous arrangement. Aniya, kung sino ang magbibigay ng mas maraming pera, siya ang magiging katabi nito sa pagtulog.

Marami naman ang hindi natuwa sa ginagawa ng dalaga at naniniwalang dapat siyang makulong dahil sa pananamantala sa mga matatanda.

Gayunman, may ilan ding humanga sa resourcefulness at “katalinuhan” umano ni Lina dahil nakaisip siya ng madaling paraan upang makaahon mula sa kahirapan.

May ilang naniniwala na unti-unti nang nawawala ang mga sinehan. Sa paglaganap ng online streaming platforms, mas pinipili na lamang ng karamihan na manood sa kanilang sariling tahanan.

Sa kabila nito, hindi tumitigil ang cinema sa pag-evolve. Sa katunayan, bukas na sa publiko ang Sphere, isang music and entertainment arena sa Las Vegas, Nevada, United States na mayroong pinakamalaking LED screen sa buong mundo!

Katulad ng ipinahihiwatig ng pangalan nito, spherical o pabilog ang hugis ng Sphere arena.

Pinalilibutan ng 16K resolution LED screen ang 18,000 seats nito sa loob. Dahil sa 360-degree panoramic view, tiyak na mae-enjoy mong manood rito, saan ka man nakaupo.

Gumagamit din ang arena ng 4D physical effects at state of the art sound system, kaya hindi ka lang basta makakapanood, mararanasan at maisasabuhay mo rin ang exhibit.

Kahit nasa labas ka pa lang, mai-entertain ka na agad dahil mayroong LED displays ang exterior ng Sphere at makikita mo ang pagpapalit-anyo nito sa isang emoji, mata, buwan, o mundo.

Nagkakahalaga ng P4,640 hanggang P14,600 ang tickets sa The Sphere Experience. Hindi pa kasama rito ang taxes.

Ipinapakita ng Sphere na maaaring ipagsama ang sining at teknolohiya upang lumikha ng mga kakaiba at hindi malilimutang karanasan. Patunay rin itong puno ng posibilidad ang entertainment industry at patuloy itong lalakas sa paglipas ng panahon.