Pinangunahan ni Pangulong Ferdinand Marcos Jr. ang pamamahagi ng tulong pinansyal para sa mga magsasaka at mangingisdang tinamaan ng El Niño sa Western Visayas.
Nakatanggap ang ilang piling benepisyaryo mula sa Antique, Iloilo, Guimaras, Capiz, at Aklan ng P10,000.
Bukod pa rito ang P10,000 na ibinigay ng Department of Social Welfare and Development (DSWD) para sa 10,000 magsasaka, mangingisda, at pamilyang apektado ng matinding tagtuyot.
Pinamunuan din ni Pangulong Marcos ang turnover ng iba’t ibang farm machineries at equipment, kabilang na ang post-harvest kits, bio-fertilizers, at mga binhi; habang nagkaloob ang opisina ni House Speaker Martin Romualdez ng limang kilong bigas para sa bawat benepisyaryo.
Kaugnay nito, tiniyak ng pangulo na sisikapin ng kanyang administrasyon na maabutan ng tulong ang mga liblib at malalayong lugar sa bawat sulok ng bansa.
