Judith Estrada-Larino

Nadagdagan pa ang bilang ng mga Pilipinong apektado ng coronavirus disease 2019 (COVID-19) sa ibang bansa.

Ayon sa Department of Foreign Affairs (DFA), nasa 1,122 na ang mga Pilipinong kumpirmadong positibo sa COVID-19 sa 43 bansa at rehiyon.

Sa nasabing bilang, 653 ang patuloy na nagpapagamot sa iba’t ibang ospital.

(1/3) Today, the DFA records a total of 1,122 Filipinos abroad infected with COVID-19 across the Americas, Asia and the Pacific, Europe, and Middle East/Africa, of which almost 400 have been verified by DOH through the IHR. pic.twitter.com/g8ShkJHjeP

— DFA Philippines (@DFAPHL) April 23, 2020

307 naman ang nakarecover sa COVID-19, samantalang nadagdagan ng tatlo ang mga nasawing Pinoy abroad kaya’t nasa 162 na ang death toll ng mga Pilipino sa ibang bansa na nasawi dahil sa naturang virus.

Pinakamarami pa ring naitalang kumpirmadong COVID-19 positive na Pinoy sa Europa  na may 374 na kaso, sumunod sa Asia Pacific Region na mayroong 302 na kaso, Middle East/Africa na nakapagtala naman ng 165 cases at Americas na nasa 281 na kaso.

Nakatakda nang ilabas sa susunod na linggo ang resulta ng 2019 bar examinations.

Ayon sa Office of the Bar Confidant (OBC), sa ika-29 ng Abril ay ipopost na lamang nila sa website ng Korte Suprema ang mga pangalan ng mga bagong abogado kaya’t hindi na kailangang magtungo pa sa tanggapan ng high tribunal.

Maglalabas na lamang ng anunsyo ang OBC sa petsa ng oath taking ng mga bagong abogado gayundin ang roll signing.

Mayroong mahigit 7,000 law graduates ang kumuha ng nasabing pagsusulit na sinasabing pinakamahirap sa buong bansa.

Mayroon nang mga indikasyong nagpa-flatten ang “curve” sa mga kaso ng coronavirus disease 2019 (COVID-19) sa bansa –base sa mga nakukuhang datos ng mga otoridad.

Ayon ito kay Health Undersecretary Maria Rosario Vergeire, bagamat hindi pa rin masasabing nagpa-flatten ang “curve” sa regular o araw-araw nilang tinitingnan kung kailan nag-uumpisa ang sintomas ng tao.

Sinabi muli ni Vergeire na nag-iimprove naman ang doubling time o pagitan ng oras na kailangan sa pagdoble ng bilang ng kaso ng COVID-19.

Bumabagal na aniya ang doubling time sa bansa na dating nasa tatlong araw ay limang araw na ngayon na nangangahulugang mas mabagal na ang pagdami ng kaso ng COVID-19 sa Pilipinas.

Gayunman, inihayag ni Vergeire na hindi dapat maging kampante ang bansa at patuloy na labanan ang COVID-19.

Pinarerekonsidera ng isang grupo ng human rights lawyers sa Philippine National Police (PNP) ang kautusang arestuhin ang mga lumalabag sa Luzon-wide enhanced community quarantine (ECQ) ng walang kaukulang babala.

Sinabi ng Free Legal Assistance Group (FLAG) na dapat ma-obserba ang batas at mga panuntunan hinggil sa pag-aresto at matiyak na napoprotektahan ang mga pangunahing karapatan ng mga taong nasa kustodiya nila.

Ayon pa sa FLAG, ang pahayag ni PNP Chief Archie Gamboa  na wala nang babala kun’di diretso aresto na at kakasuhan ang mga lalabag sa ECQ sa pagpapatupad ng mga otoridad ng mas mahigpit na lockdown, ay nagbibigay sa mga pulis ng go signal na damputin ang ECQ violators ng walang dahilan.

Binigyang diin ng FLAG na ang paglabag sa ECQ ay magiging offense lamang kung mayroong batas o ordinansang nagpaparusa rito.

Iniimbestigahan na ng Commission on Human Rights (CHR) ang insidente ng pamamaril sa isang dating sundalo sa Quezon City.

Magugunitang nabaril ni Police Master Sergeant Daniel Florendo, Jr. ang retiradong sundalo na si Winston Ragos malapit sa checkpoint sa Barangay Pasong Putik.

Ayon kay Atty. Jacqueline De Guia, tagapagsalita ng CHR, iginigiit na nila sa pagsisimula pa lamang ng enhanced community quarantine (ECQ) na dapat manatili ang respeto sa karapatang pantao.

Nauunawaan aniya nila ang kahalagahan ng mga law enforcement official para protektahan ang bawat mamamayan subalit mayroong itinakdang panuntunan sa pagpapairal ng batas na dapat sundin ng mga otoridad.

Tiwala naman ang CHR na magiging patas ang imbestigasyon ng Quezon City Police District sa nasabing insidente.

Isang preso mula sa New Bilibid Prison (NBP) medium security compound ang tinamaan ng coronavirus disease 2019 (COVID-19).

Ayon sa Bureau of Corrections (BuCor) unang sinuri ang nasabing preso sa NBP Hospital at kaagad dinala sa RITM nitong nakalipas na Abril 17.

Bilang precautionary measure ipinabatid ng BuCor na kaagad silang nagsagawa ng contact tracing na naging dahilan nang pagsailalim sa isolation ng 40  pang bilanggo

Sinabi ng BuCor na naka quarantine na rin ang medical staff na nag asikaso sa nasabing pasyente bilang suspected case.

Dinala na rin ang mga person deprived of liberty (PDL) na nagkaruon ng exposure sa positibong kaso sa mas malaking quarantine area sa Site Harry kung saan sila mas matututukan habang hinihintay ang COVID-19 testing.

Nakatutok din ang BuCor medical staff sa pagbibigay ng atensyong medikal sa lahat ng suspect PDL’s at sa positibong kaso.

Tiniyak naman ng BuCor ang patuloy na pagpapatupad ng nati COVID-19 measure gayundin ng operational plans matapos maitala ang unang kaso ng virus.

Ipinabatid ng Department of Health (DOH) na hanggang kahapon, Abril 23 271 kaso ang nadagdag sa mga kumpirmadong kaso ng COVID-19 sa bansa na ngayoy nasa 6,981.

16 na pasyente ang nasawi sa nakalipas na magdamag kayat umabot na sa 462 ang death toll sa nasabing virus.

Nasa 722 ang total recoveries ng COVID-19 sa bansa matapos madagdag ang 29 na pasyenteng gumaling na at naka-recover.

Tanging sina Presidential Spokesman Harry Roque at Health Undersecretary Maria Rosario  Vergiere lamang ang otorisadong magsalita para sa gobyerno sa isyu ng coronavirus disease 2019 (COVID-19) pandemic.

Binigyang diin ito ni Executive Secretary Salvador Medialdea na hindi naman tinukoy ang dahilan sa pagpapalit ng communication strategy.

Una nang inihayag ni Roque na wala siyang alam sa nasabing desisyon.

Bago ang direktiba si Cabinet Secretary Karlo Nograles ang sumasalang sa araw araw na briefing hinggil sa laban sa COVID-19 bilang siyang tagapagsalita ng inter agency task force for the management of emerging infectious diseases.

Winelcome ng Department of Transportation (DOTr) ang pahayag ng management ng 2GO group hinggil sa pagpapagamit na ng libre sa kanilang dalawang barko bilang quarantine facilities.

Nagpasalamat ang dotr sa anunsyo ni 2GO Chairman of the Board Dennis Uy na hindi na nito sisingilin ang gobyerno sa pagpapagamit ng kanilang mga barko bilang tulong na rin sa pamahalaan.

Sinabi ng DOTr na ang hakbang ng 2GO ay pagpapakita ng bayanihan spirit sa pagitan ng gobyerno at ng pribadong sektor sa paglaban sa coronavirus disease 2019 (COVID-19) pandemic.