Judith Estrada-Larino

Tiwala ang Malakaniyang na mababawasan ang mga insidente ng karahasan sa mga kababaihan at bata ngayong niluwagan na ang restrictions para labanan ang ng coronavirus disease 2019 (COVID-19).

Ito ayon kay Presidential Spokesman Harry Roque ay matapos silang malungkot sa report ng mataas na insidente ng karahasan laban sa kababaihan at mga bata sa panahon nang ipinatutupad ang community quarantine.

Nakakalungkot aniyang naitala pa ang mga nasabing insidente ng karahasan sa panahong magkakasama pa ang buong pamilya.

Hinimok ni Roque ang mga biktima na i-report sa mga otoridad ang mga nararanasang pang aabuso sa gitna na rin nang mahigpit na pakikipag ugnayan ng Philippine National Police (PNP) women and children protection desks sa local government units para matiyak ang proteksyon ng mga kababaihan at mga bata.

Tinatayang mahigit $1-M dolyar o halos P55-M  ang halaga ng mga supply na i-dinonate ng Amerika sa Bureau of Fire Protection (BFP) National headquarters sa Quezon City.

Ang hakbang ayon sa US Embassy ay sa pamamagitan ng Defense Threat Reduction Agency (DTRA).

Sinabi ng US Embassy na makakatulong ang supplies para matugunan ng BFP ang mandato bilang chemical, biological, radiological and nuclear response agency ng Pilipinas.

Isa rin ang BFP sa primary agencies sa bansa na nagsasagawa ng decontamination at response activities sa gitna ng banta ng coronavirus disease 2019 (COVID-19) pandemic.

Suportado rin ng DTRA ang BFP at iba pang ahensya para mapabuti ang counter weapons of mass destruction capabilities ng bansa.

Mahigit 6-M estudyante ang nakapag enroll na sa public at private schools sa buong bansa para sa bagong school year.

Ipinabatid ni Department of Education (DepEd)  Secretary Leonor Briones na nasa 6,415,878 ang kabuuang bilang ng mga nag enrol sa kindergarten, elementary, junior high school, senior high school, alternative learning system gayundin yung may mga disability o kapansanan.

Sinabi ni Briones na lumampas pa ang bilang sa inaasahan nilang mag-eenrol sa darating na school year sa unang linggo ng buwang ito.

Ang enrolment ay tatagal hanggang sa Hunyo 30 samantalang ang itinakdang pagbubukas ng klase ay sa Agosto 24.

Tuluy-tuloy ang pagbibigay ng gobyerno ng cash aid at iba pang tulong sa mga apektado ng coronavirus disease 2019 (COVID-19) kahit pa matapos na o mag-expire sa special powers na ibinigay ng kongreso sa Pangulong Rodrigo Duterte para tugunan ang nasabing pandemic.

Binigyang diin ito ni Presidential Spokesman Harry Roque kayat hindi na dapat maging usapin ang expiration ng Bayanihan to Heal as One Act (BAHO).

Sinabi ng Palasyo na ang tatlong buwang effectivity ng nasabing batas ay matatapos sa Hunyo25 subalit iginigiit ng mga senador na ang ibinigay na special powers sa pangulo para tugunan ang national emergency ay nag-expire o natapos na kasunod ng pag adjourn ng Kongreso nitong nakalipas na Hunyo 5.