Judith Estrada-Larino

Sinuspindi ng gobyerno ang Balik Probinsya, Bagong Pag Asa Program,

Ito ayon kay National Housing Authority (NHA) General Manager at Executive Director Marcelino Escalada, Jr. Ay dahil sabay-sabay na naipon sa Metro Manila ang mga Overseas of Filipino Workers (OFW)’s, construction workers, mga estudyante at iba pang local tourist dahil sa ipinatupad na lockdown

Sinabi ni Escalada na kapag natapos na ang pagpapauwi sa locally stranded individuals saka na lamang nila bubuhayin ang Balik Probinsya Program sa susunod na buwan.

Mahirap aniyang isabay sa bulto ng LSI’s ang pagpapauwi sa mga beneficiary ng Balik Probinsya.

Ino-obliga na ng Bureau of Internal Revenue (BIR) ang online sellers o nagne-negosyo gamit ang digital o electronic means na magparehistro sa ahensya para matiyak ang pagbabayad ng buwis.

Bukod ditto, nais din ng BIR na ideklara ng online sellers ang kanilang mga nakalipas na transaksyon para sa pagbubuwis.

Ang kautusan ng BIR ay hindi lamang para sa partner sellers o merchants, subalit maging sa iba pang stakeholders tulad ng payment gateways, delivery channels, internet service providers at iba pang facilitators.

Ipinabatid ng BIR na hanggang ika-31 ng Hulyo maaaring iparehistro ang mga negosyo online at ang mabibigong gawin ito ay pagmumultahin.

Tiniyak ng India ang patuloy na suplay sa Pilipinas ng mga gamot kabilang ang Hydroxychloroquine na isinasailalim pa sa test bilang posibleng gamot sa coronavirus disease 2019 (COVID-19).

Ayon sa Office of the Presidential Assistant on Foreign Affairs, ang nasabing commitment ay ibinigay ni Indian Prime Minister Narendra Modi sa kaniyang pakikipag-usap sa telepono sa Pangulong Rodrigo Duterte kung saan tinutukan din ang iba pang aspeto ng bilateral relationship kabilang ang defense cooperation.

Binigyang diin naman ng Pangulong Duterte na ang nasabing hakbang ng India ay pagpapakita ng commitment to cooperation and good neighborliness.

Tiniyak din ng opisyal ng India na makikinabang ang Pilipinas sa bakuna kontra COVID-19 na dini-develop ng bansa.

Nadagdagan pa ng 51 ang mga bagong gumaling na Pilipino mula sa coronavirus disease 2019 (COVID-19) sa ibang bansa.

Ayon sa Department of Foreign Affairs (DFA), hanggang kahapon, ika-10 ng Hunyo, pumapalo na sa 2,346 ang overseas Pinoys na naka-recover sa nasabing virus.

10 June 2020

Today is another day of more recoveries than new confirmed cases and fatalities among Filipinos abroad as reported by our Foreign Service Posts – with 51 new recoveries and 29 new confirmed cases in the Asia Pacific region and the Middle East, as well as, (1/2) pic.twitter.com/8PlgM9MvBQ

— DFA Philippines (@DFAPHL) June 10, 2020

Samantala, nasa 5,430 naman ang mga kumpirmadong positibo sa COVID-19 na Pilipino mula sa 51 bansa at rehiyon at 2,702 rito ay patuloy na nagpapagamot sa iba’t ibang ospital.

Dalawang Pinoy naman ang nadagdag sa death toll na nasa 382.

Pinakamarami pa ring naitalang confirmed COVID-19 positive overseas Pinoy sa bahagi ng Middle East/Africa na may 3,374 cases; sumunod ang Europe na mayroong 856 confirmed COVID-19 positive cases; Americas na mayroon namang 654 cases at Asia Pacific Region na nakapagtala nan g 536 na kaso.

Uubrang ipagpaliban ng employers ang pagbabayad ng holiday pay para sa kanilang empleyado na papasok bukas, ika-12 ng Hunyo, Araw ng Kalayaan.

Ayon ito sa Department of Labor and Employment (DOLE) matapos ilabas ang Labor Advisory No. 20 at babayaran na lamang ang holiday pay kapag bumalik na sa normal ang operasyon ng isang negosyo.

Nakasaad din sa advisory na exempted na sa pagbabayad ng holiday pay ang ilang establishments o negosyo na nagsara na sa kasagsagan ng community quarantine period.

Nagsanib-puwersa ang League of Municipalities of the Philippines (LMP) at Partas Transportation Company sa paglulunsad ng libreng transportasyon para sa mga locally stranded individuals (LSIs) sa gitna na rin ng coronavirus disease 2019 (COVID-19) pandemic.

Ayon kay LMP President Luis Chavit Singson, ang kani-kaniyang local government ng mga naturang LSIs ang magbabayad ng pamasahe nila sa ilalim ng BIYAHE-NIHAN Project.

Sinabi ni Singson na nasa 400 bus ang available hanggang sa Mindanao.

Kailangan lamang aniyang maihanda ng mga indibidwal ang kanilang travel documents at makipag-ugnayan sa kani-kanilang mga munisipalidad sa mga detalye.

Pinag-aaralan ng Department of Tourism (DOT) ang tinatawag na “travel bubble”.

Ito, ayon kay Tourism Secretary Bernadette Romulo-Puyat, ay kung saan bubuksan na sa mga turista ang mga lugar na wala o mababa lang ang kaso ng coronavirus disease 2019 (COVID-19).

Tiniyak ni Puyat ang pagpapatupad ng mahigpit na health and safety protocol sa mga lugar na bubuksan sa turismo.

Sinabi ni Puyat na maraming pasyalan sa bansa ang wala o single digit lang ang COVID-19 cases.

Gayunman, inihayag ni Puyat na ikinukunsidera din nila ang alalahanin ng local government unit hinggil sa mga patakaran ng health and safety protocols.

Ipinabatid ni Puyat na hindi lamang Pilipinas sa Southeast Asia at maging ang mga bansang Australia at New Zealand ay pinag-aaralan ang pagpapatupad ng travel bubble.

Ipinagpaliban ng Pangulong Rodrigo Duterte at mga miyembro ng Inter Agency Task Force for the Management of Emerging Infectious Diseases (IATF) ang kanilang pulong ngayong araw na ito sa Davao City.

Ayon ito kay presidential spokesman harry roque ay bagamat hindi naman nito tinukoy kung bakit ipinagpaliban ang naturang pulong.

Kasabay nito ipinabatid ni Roque na nakatakdang magsagawa ng public address ang Pangulong Rodrigo Duterte sa Lunes, Hunyo 15.

Nagbabala ang Department of Education (DepEd) kaugnay sa mga email na nag-aalok ng luma at hindi otorisadong learning materials.

Kasunod na rin ito nang natanggap ng DepEd na chain emails na naglalaman ng link sa learning materials na umanoy galing sa ahensya o sa kanilang online platform na DepEd commons.

Ayon kay Education Undersecretary Alain Pascua ang mga nasabing materials ay hindi tumutugon sa most essential learning  competencies na tumutukoy sa kaalaman at kasanayang kailangang ipamalas ng isang magaaral sa bawat aralin o aktibidad.

Kakasuhan aniya nila ang matutukoy na nasa likod ng mga nasabing chain e-mails.

Binigyang diin pa ni Pascua na ipinagbabawal ang pagbebenta ng libreng learning materials maging sa mga grupo at indibidwal na nagpapabayad para sa dapat sanay libreng webinars.

Una nang iginiit ng DepEd na libre ang lahat ng mga otorisado at may kalidad na materyale na i-a-upload sa DepEd commons.