Judith Estrada-Larino

Nangako ang Department of Health (DOH) na paiigtingin ang mga hakbang nito laban sa coronavirus disease 2019 (COVID-19).

Kasunod na rin ito ng dalawang linggong pagsailalim muli sa modified enhanced community quarantine (MECQ) ang Metro Manila, Bulacan, Cavite, Laguna at Rizal simula ngayong araw na ito.

Ayon sa DOH magpapatupad sila ng mas pinaigting na community based active case finding.

Muli ring aaralin at bubuo ng strategy ang DOH kasama ang medical at public health workers at magkakaroon ng substitution team para sa mga pagod na health workers.

Inaprubahan na ng Social Security System (SSS)  ang mahigit 4,000 unemployment benefit applications.

Ayon kay SSS president at CEO Aurora Ignacio  mula June 22 hanggang July 6 ay nakapagpalabas na sila ng halos P60-million na unemployment benefits  sa 4,400 qualified members na nagsumite ng kanilang application online sa pamamagitan ng mySSS accounts.

Inaasahan aniya nilang madadagdagan pa ito dahil may mga kumpanya pang nag a anunsyo ng retrenchment at pagsasara ng kanilang mga negosyo dahil sa pandemic crisis.

Ipinabatid ng SSS na pinakamalaking bilang ng online applicants ay mula sa Luzon o nasa 1, 697 na sinundan ng National Capital Region – 972, Visayas – 894 at Mindanao – 822.

Dapat na kaagad ikunsider ng gobyerno ang pagkuha ng dagdag na health workers sa gitna na rin nang patuloy na pag akyat ng kaso ng coronavirus (COVID-19).

Ayon ito kay Professor Ranjit Rye, miyembro ng UP OCTA ang pagpapalakas sa hospital capacity ay hindi lamang sa pamamagitan ng pagdadagdag ng mga kama at ventilators kundi kailangan din ang marami pang duktor, nurses at health workers dahil sa pagtaas ng kaso lalo na sa Metro Manila.

Dapat din aniyang matiyak ng gobyerno na hindi naman magsisiksikan sa labas ng mga ospital ang mga non-covid patients.

Magtatayo ng OSS o one-stop shop center ang Philippine Airlines sa NAIA Terminal 2 para magsagawa ng mandatory RT-PCR swab testing sa mga OFW at otorisadong dayuhan.

Ayon sa PAL simula ngayong araw na ito ay magdadagdag sila ng tauhan para ma screen and mga ba biyahe at magpo proseso ng quarantine requirements para sa mga pasaherong lilipad patungong North America, Middle East, Europe, Oceania at buong Asya.

Ipinabatid ng pal na ang kaya ng oss nito ang mag test ng isanlibo at dalawandaang pasahero kada araw at makukuha ang resulta sa loob ng dalawang araw.

Accredited na rin ng National Task Force , IATF at DOH ang nasabing OSS center ng PAL.

Kasado na sa Martes, August 4 ang imbestigasyon ng Senado kaugnay sa mga umanoy katiwalian sa PhilHealth.

Ayon sa Senado Committee of the Whole ang mag iimbestiga sa nasabing usapin ..batay na rin sa resolusyong inihain Nina Senador Leila De Lima, Francis Pangilinan, Panfilo Lacson at Senate President Vicente Tito Sotto the third.

Tututukan din sa imbestigasyon  ang hindi nababayarang insurance claims ng accredited hospitals.

Aalamin din sa imbestigasyon ng Senado kung mayruon pang sapat na pondo ang PhilHealth para sa mga dinapuan ng coronavirus disease 2019 (COVID-19) lalo nat patuloy ang pagsirit ng kumpirmadong kaso ng nasabing virus.

Ayon kay Lacson hindi nawala ang sindikato sa PhilHealth at tila expert na ang mga ito sa influence peddling dahil malinaw na may impluwensya sila sa mga matataas na opisyal ng gobyerno.

Nakakakulo aniya ng dugo na nagagawa pa rin ng PhilHealth mafia na kontrolin ang kakarampot na pondo ng ahensya.