Judith Estrada-Larino

Umakyat nasa mahigit 106,000 ang kumpirmadong kaso ng coronavirus disease 2019 (COVID-19) sa bansa.

Ayon sa Department of Health (DOH) naitala sa 3,226  ang mga bagong kaso ng COVID-19 dahilan kaya’t pumapalo na sa 106,330 ang kabuuang kaso ng COVID-19.

Ito ang ikalimang sunud na araw na sumampa sa 3,000 mark ang mga bagong kaso ng COVID-19 matapos ang apat na sunod na araw ng record high new cases.

Kabilang sa mga nakapagtala ng pinakamataas na bagong kaso ng COVID-19ang Metro Manila – 1, 541, Cebu – 503, Laguna – 181, Rizal – 158 at Cavite – 129.

Nadagdagan naman ng 275 ang mga bagong gumaling sa COVID-19 kaya’t nasa 65,821 na ang total recoveries.

Sumirit naman sa 2,104  ang death toll matapos madagdagan ng 46 na mga bagong nasawi sa nasabing virus.

Rumehistro na sa 38,405  ang aktibong kaso ng COVID-19.

Handa na ang Philippine National Police (PNP) na bigyang seguridad ang mga opisyal ng PhilHealth.

Sa harap na rin ito nang ipapatawag na pagdinig ng Senado ngayong araw hinggil sa mga panibagong umano’y anomalya sa nasabing ahensya.

Sinabi ni PNP Spokesman Brigadier General Bernard Banac na wala pa naman silang natatanggap na request mula sa PhilHealth o sinumang opisyal nito na ipapatawag sa pagdinig.

Kasabay nito dumistansya ang PNP sa anumang ihahayag ni Atty. Thorrson Montes Keith dahil matagal na itong wala sa serbisyo bagama’t 2012 nang pumasok ito sa PNP bilang commissioned officer na may ranggong police senior inspector subalit sinibak nuong 2014 dahil sa labis na paga-AWOL.

Ibinasura ng Civil Service Commission ang inihaing apela ni Keith nuong 2017 para makabalik sa serbisyo.

Si Keith ay isa sa tatlong tinukoy na testigo ni Senador Panfilo Lacson na haharap sa pagdinig ngayon araw na ito. —ulat ni Jaymark Dagala (Patrol 9)

Pormal nang nanungkulan bilang ika-54 na chief of staff ng Armed Forces of the Philippines (AFP) si Lt. General Gilbert Gapay.

Kasunod na rin ito nang pagsasalin ni dating AFP chief General Felimon Santos Jr. ng kapangyarihan kay Gapay sa idinaos na Change of Command sa AFP commissioned officers club sa Kampo Aguinaldo.

Nahati sa tatlong bahagi ang change of command kung saan ang arrival honors ay ginawa sa harap ng Lapu-Lapu Grandstand habang ginawa sa Tejeros Hall ang ikalawa at ikatlong bahagi ng programa kasama na ang retirement honors para kay Santos.

Ang nasabing okasyon ay pinangunahan ni Defense Secretary Delfin Lorenzana bilang kinatawan ng Pangulong Rodrigo Duterte. —ulat ni Jaymark Dagala (Patrol 9)

Madaragdagan muli ang mga checkpoints.

Tiniyak ito ni Joint Task Force COVID-19 Shield deputy chief for operations Lt. General Guillermo Eleazar sa pagsailalim sa Metro Manila at mga karatig lalawigan epektibo ngayong araw na ito hanggang August 18.

Ayon kay Eleazar inatasan na niya ang police commanders sa mga nabanggit na lugar para magkasa ng quarantine controlled checkpoints at higpitan pa ang ipinatutupad na seguridad.

Sa ilalim ng MECQ tanging ang mga essential workers at APOR o authorized persons outside of residence lamang ang papayagang lumabas ng kani kanilang tahanan.

Subalit sinabi ni Eleazar na naka depende sa mga lokal na pamahalaan kung magpapatupad pa muli ng quarantine passes. —ulat ni Jaymark Dagala (Patrol 9)

Umaapela ang Palasyo sa publiko na huwag mag panic buying.

Kasunod na rin ito nang pagsasailim muli sa modified enhanced community quarantine (MECQ) sa Metro Manila at mga karatig na lalawigan simula ngayong araw na ito.

Tiniyak ni Presidential Spokesman Harry Roque na sapat ang supply ng pagkain sa mga grocery at palengke.

Localized lockdown lang naman aniya ang ipatutupad sa ilang lugar

Binigyang diin ni Roque na ang MECQ ay tugon lamang ng gobyerno sa panawagan ng frontliners na magkaruon muna sila ng break dahil sa pagtaas ng kumpirmadong kaso ng coronavirus disease 2019 (COVID-19).

Inilabas na ng Malakaniyang ang official regular at special non-working holidays para sa susunod na taon.

Kabilang sa regular holiday ang New Year’s Day, Araw Ng Kagitingan – April 9, Huwebes Santo – April 1, Biyernes Santo – Aprl 2, Labor Day – May 1, Independence Day – June 12, National Heroes Day – August 30, Bonifacio Day – November 30, Christmas Day – December 25 at Rizal Day – December 30.

Itinuturing namang special non-working days ang Chinese New Year – February 12, Edsa People Power Revolution Anniversary – February 25, Black Saturday – April 3, Ninoy Aquino Day – August 21, All Saints Day – November 1, Feast Of The Immaculate Concepcion – December 8 At Last Day Of The Year – December 31.

Dagdag pang special non-working days ang All Soul’s Day – November 2 at December 24 – Biyernes.

Naka-depende naman sa lunar calendar ang holiday sa Eidl Fitr at Eidl Adha.

Nagtipon-tipon sa Rizal Memorial Stadium ang halos 20 locally stranded individuals (LSI) sa pag-asang makauwi sa kani-kanilang lalawigan.

Isang araw ito bago muling ibalik sa modified ECQ ang Metro Manila at apat na lalawigan sa Luzon.

Una nang napauwi sa kanilang mga probinsya kada batch nitong mga nakalipas na araw ang libo-libong LSI’s na nanatili sa Rizal Stadium.

Dalawang linggong naka-lockdown ang Pamantasan ng Lungsod ng Maynila (PLM) simula ngayong araw na ito.

Kasunod na rin ito nang pagtaas ng kaso ng coronavirus disease 2019 (COVID-19) sa campus.

Dahil dito ipinabatid ng PLM administrator na magwo-work from home set up ang lahat ng mga empleyado ng PLM maliban lamang sa maintenance staff at disinfection and sanitation crew.

Samantala lahat ng transaksyon sa PLM kabilang ang enrollment ay gagawin na lamang online.